ខេត្តត្បូងឃ្មុំ ៖ ប្រជាពលរដ្ឋរស់នៅស្រុកមេមត់ ខេត្តត្បូងឃ្មុំបានប្រាប់ឱ្យដឹងថា សព្វថ្ងៃសកម្មភាពដឹកជញ្ជូនឈើប្រណីតខុស ច្បាប់ចេញទៅលក់នៅប្រទេសវៀតណាម តាមច្រកដូនរ័ត្ន កំពុងកើតមានយ៉ាងគគ្រឹកគគ្រេង ស្ទើររាល់យប់ដែលពួកគាត់ សង្ស័យមានការឃុបឃិត និងបើកភ្លើងខៀវពីលោកមេគយស្រុកមេមត់ ជាថ្នូរនឹងការបង់ប្រាក់ដាក់ហោប៉ៅផ្ទាល់ខ្លួន ។
ប្រជាពលរដ្ឋស្រុកមេមត់ បានឱ្យដឹងបន្ថែមទៀតថា ឈ្មួញឈើប្រណីតដ៏ល្បីឈ្មោះ ដែលកំពុងធ្វើសកម្មភាពក្នុងស្រុក មេមត់ មានឈ្មោះ ហាប់ និងកំពុងសហការគ្នាយ៉ាងស្អិតល្មួត ជាមួយនឹងលោក ចាន់ សុផាត មេគយស្រុកមេមត់ ។ បច្ចុប្បន្ន ឈ្មួញឈើឈ្មោះ ហាប់ បានប្រមូលទិញឈើប្រណីតខុសច្បាប់គ្រប់ប្រភេទ មកពីខេត្តផ្សេងៗមានដូចជា ឈើសុក្រំ បេង នាង នួន ធ្នង់(ឃ្លុំ)និងឈេប្រិណីតគ្រញូង ដោយបានដឹកតាមមធ្យោបាយផ្សេងៗគ្រប់រូបភាព យកមកគរទុកនៅក្នុងឃ្លាំងរបស់ខ្លួន ចំនួន ២ គឺទីតាំងទី ១ នៅទល់មុខវិទ្យាល័យដារ ។ រីឯទីតាំងទី ២ នៅខាងក្រោយផ្ទះវីឡារបស់បងប្រុសមេឈ្មួញឈ្មោះ ហាប់ ដែលស្ថិតនៅក្បែរផ្សារដារ ។
ជាក់ស្តែងថ្មីៗនេះ ឈ្មួញឈើប្រណីតខុសច្បាប់ ឈ្មោះ ហាប់ បានដឹកជញ្ជូនឈើតាមរថយន្តយីឌុប និងរថយន្តកែច្នៃ ចេញទៅលក់នៅវៀតណាម តាមច្រកព្រំដែនតំបន់ដូនរ័ត្ន នៅពេលយប់ ហើយបានក្រឡាប់ទាំងរថយន្ត ធ្លាក់ទាំងឈើសង្កត់ លើផ្ទះប្រជាពលរដ្ឋទៀតផង ប៉ុន្តែមិនឃើញមានសមត្ថកិច្ចពាក់ព័ន្ធណាទៅត្រួតពិនិត្យទប់ស្កាត់ការបង្ក្រាបនោះឡើយ កុំថា ឡើយដល់ទៅបង្ក្រាបរថយន្តបើកបរលើដងផ្លូវ ។
លើសពីនេះទៀត សកម្មភាពដឹកជញ្ជូនឈើប្រណីតចេញទៅលក់នៅវៀតណាម យ៉ាងគគ្រឹកគក្រេងខាងលើនេះ ច្បាស់ជាមានការត្រូវដងត្រូវផ្លែគ្នា រវាងឈ្មួញ និងមន្ត្រីជំនាញមិនខាន ព្រោះថា បើមន្ត្រីជំនាញមិនបើកភ្លើងខៀវឱ្យទេ មេឈ្មួញឈើប្រណិតឈ្មោះ ហាប់ ក៏មិនអាចដឹកជញ្ជូនឈើចេញទៅលក់នៅប្រទេសវៀតណាម បានយ៉ាងងាយបែបនេះដែរ ។ ហេតុនេះ ពួកគាត់សូមខ្សឹបឱ្យឮដល់ថ្នាក់ដឹកនាំ និងស្ថាប័នពាក់ព័ន្ធ មេត្តាពិនិត្យស្រាវជ្រាវបញ្ហាខាងលើនេះ ឱ្យបានដិតដល់ ផង ពុំដូច្នោះទេ ព្រៃឈើខ្មែរ និងរលាយឆាប់មិនខាន ដោយសារតែមន្ត្រីជំនាញស៊ុំគ្រលុំជាមួយឈ្មួញ ។
ប្រជាពលរដ្ឋស្រុកមេមត់បានបញ្ជាក់ទៀតថា បន្ទាប់ពីគរទុកក្នុងឃ្លាំងដ៏មានសុវត្ថិភាពរួចហើយ ដល់ពេលវេលាសម ស្របឈ្មួញឈើប្រណីតឈ្មោះ ហាប់ បានដឹកជញ្ជូនឈើប្រណីតទាំងនោះ តាមរថយន្តយីឌុបបញ្ជូនចេញទៅលក់នៅប្រទេស វៀតណាម តាមច្រកតំបន់ដូនរ័ត្នយ៉ាងរលូន ដោយគ្មានសមត្ថកិច្ចជំនាញពាក់ព័ន្ធណាចេញមុខទប់ស្កាត់ ឬបង្ក្រាបនោះឡើយ ព្រោះថា សមត្ថកិច្ចតាមផ្លូវច្រកព្រំដែនទាំងអស់នោះ សុទ្ធតែទទួលបានលាភសក្ការៈលុយខ្មៅពីឈ្មួញឈើរូបនេះ ទើបបិទ ភ្នែកទទួលលុយមិនបង្ក្រាប ពិសេសទំនងជាមានការឃុបឃិតបើកដៃពីលោក ចាន់ សុផាត មេគយស្រុកមេមត់តែម្តង ។
ទោះជាយ៉ាងណា ជុំវិញការពាក់ព័ន្ធនឹងព័ត៌មានខាងលើ មិនសុំទាក់ទងការបំភ្លឺពីលោក ចាន់ សុផាត មេគយស្រុកមេមត់បានទេនៅពេលនេះ ? ៕
