កំពត ៖ គេមិនយល់ទាល់តែសោះ នូវទង្វើរបស់អាជ្ញាធរឃុំភ្នំប្រាសាទ ស្រុកកំពង់ត្រាច ខេត្តកំពត ដែលបានបញ្ជាឲ្យក្រុមហ៊ុនមួយមកជីកកកាយដីដែលមានកម្មសិទ្ធិដ៏ស្របច្បាប់ទៅហើយ ដើម្បីធ្វើប្រឡាយយកទឹកប្រើប្រាស់ជាសាធារណៈ លុះម្ចាស់ដីមានប្រតិកម្ម បែរជាក្រុមហ៊ុននិងអាជ្ញាធរក្នុងតំបន់ធ្វើមិនដឹងមិនឮ ថែមទាំងជម្រុញឲ្យម្ចាស់ដីទៅប្តឹងទៀត។
ម្ចាស់ដី ឈ្មោះ ម៉េង យិន ភេទប្រុស អាយុ៥៧ឆ្នាំ រស់នៅភូមិចុងសួងខាងកើត ឃុំភ្នំប្រាសាទ ស្រុកកំពង់ត្រាច បានឲ្យដឹងថា ដីស្រែដែលគ្រឿងចក្រជីកធ្វើទំនប់និងប្រឡាយនោះ ស្ថិតនៅចំណុចភូមិដំណាក់ក្រឡាញ់ខាងកើត ឃុំភ្នំប្រាសាទ ស្រុកកំពង់ត្រាច ខេត្តកំពត ដែលមានផ្ទៃដីជាង២ហិកតា ចែកជា២ប្លង់(ប្លង់កម្មសិទ្ធស្របច្បាប់)ប៉ុន្តែខណៈនេះត្រូវបានអាជ្ញាធរឃុំខាងលើ អនុញ្ញាតឲ្យក្រុមហ៊ុនជីកកកាយដីនិងធ្វើទំនប់ សម្រាប់បម្រើផលប្រយោជន៍សាធារណៈ ដោយពុំបានដោះស្រាយអ្វីជូនរូបគាត់ជាម្ចាស់ដីដែលកំពុងបាត់បង់អស់ប្រមាណជាង២០០០ម៉ែត្រក្រឡានោះទេ។ជាងនេះទៅទៀតការកាយដីធ្វើទំនប់នេះមិនត្រឹមតែរំលោភយកដីកម្មសិទ្ធិរបស់គាត់ប៉ុណ្ណោះទេ គឺមិនបានដាក់ប្រព័ន្ធលូត្រឹមត្រូវ ដែលធ្វើឲ្យរូបគាត់មិនបានប្រកបការងារកសិកម្មបានឡើយ លុះពេលរូបគាត់សួរ២ឬ៣ម៉ាត់បែរជាជម្រុញឲ្យទៅប្តឹងចុះ។
មជ្ឈដ្ឋានដឹងរឿងរ៉ាវខាងលើបានលើកឡើងដោយលើកយកច្បាប់អស្សាមិករណ៍ ដែលបានតម្កល់ក្នុងក្រសួងសេដ្ឋកិច្ចនិងហិរញ្ញវត្ថុនោះថា ការកេងយកដីដែលមានប័ណ្ណសម្គាល់រួចហើយ គឺអាចពាក់ព័ន្ធនឹងការរំលោភដីកម្មសិទ្ធយ៉ាងធ្ងន់ធ្ងរ ហើយច្បាប់ខាងលើក៏បានចែងយ៉ាងច្បាស់លាស់សម្រាប់ឲ្យស្ថាប័នជំនាញ យកទៅអនុវត្តដ៏មានប្រសិទ្ធភាព ក្នុងការដោះស្រាយសំណងទៅលើបុគ្គលម្ចាស់ដីដែលមានកម្មសិទ្ធស្របច្បាប់ និងដើម្បីបម្រើផលប្រយោជន៍សាធារណៈផងដែរ។
ទាក់ទិននឹងរឿងរ៉ាវនេះ លោកម៉េង យិន សំណូមពរ ដល់អភិបាលស្រុកកំពង់ត្រាច គឺលោក អ៊ុម ស៊ីណាត មេត្តាជួយគិតគូរជួយដោះស្រាយរឿងនេះ តាមការគួរផងទៅចុះ។
គួររំឭកថា ដីមានប័ណ្ណកម្មសិទ្ធិស្របច្បាប់ខាងលើ ដែលមានទំហំជាង២ហិកតា ស្ថិតក្នុងភូមិដំណាក់ក្រឡាញ់ខាងកើតនេះ ត្រូវបានអាជ្ញាធរក្នុងតំបន់ បញ្ជាឲ្យគ្រឿងចក្រជីកធ្វើប្រឡាយ ដោយមិនដឹងដីខាងលើនេះមានប្លង់បែបនេះឡើយ ហើយការអភិវឌ្ឍន៍នេះ បន្ទាប់ពីបានកោះប្រជុំពីតម្រូវការចាំបាច់នូវការប្រើប្រាស់ទឹកសម្រាប់បម្រើការងារកសិកម្មរបស់ប្រជាពលរដ្ឋក្នុងមូលដ្ឋាន។ប៉ុន្តែក្រុមហ៊ុនបែរជាមកជីកកកាយចំដីដែលមានប័ណ្ណកម្មសិទ្ធទៅវិញ ។ ហើយករណីនេះ លោកអ៊ុម សីុណាត អភិបាលនៃគណៈអភិបាលស្រុកកំពង់ត្រាច ក្រោយពីបានជ្រាបហើយ លោកក៏សន្យាថានឹងរកដំណោះស្រាយជូនម្ចាស់ដីកម្មសិទ្ធិ ថែមទាំងទទួលស្គាល់ថាប្លង់កម្មសិទ្ធិដីខាងលើពិតជាស្របច្បាប់ទៀតផង។ ម្យ៉ាងទៀតលោកលើកឡើងថា ពេលនេះលោកជាប់រវល់ច្រើនក្នុងកិច្ចការផ្សេងៗ ដូចជាការរៀបចំបោះឆ្នោតជ្រើសរើសក្រុមប្រឹក្សាឃុំ សង្កាត់ និងបន្តរហូតរៀបចំប្រកាសសុពលភាពក្រុមប្រឹក្សាឃុំ សង្កាត់អាណត្តិទី៤ឲ្យរួចរាល់ទើបដោះស្រាយជូន តែពេលនេះលោកទំនេរទៅហើយគួរតែកុំបំភ្លេចការសន្យា ព្រោះម្ចាស់ដីកំពុងអន្ទះសារចង់ដឹងនូវលទ្ធផលជាវិជ្ជមាន ចំណែកក្រុមហ៊ុនគ្រឿងចក្រមួយនេះ ក៏បោះទីតាំងនៅជិតបង្កើយក្នុងមូលដ្ឋាននេះដែរ បើចង់ដោះស្រាយវិញងាយជាងបកចេកទៅទៀត ៕
ណារិទ្ធ
