ភ្នំពេញ ៖ បន្ទាប់ពីបង្កការបាញ់បោះសេរី កណ្ដាលក្រុងភ្នំពេញ បង្កការភ្ញាក់ផ្អើលពេញប្រទេសហើយនោះ តុលាការក្រុងភ្នំពេញ នៅរសៀលថ្ងៃទី១២ ខែកក្កដានេះ បានចេញដីកាបញ្ជាឲ្យជនបង្កចូលខ្លួនបំភ្លឺនៅអធិការដ្ឋាននគរបាលខណ្ឌដូនពេញ ។
លោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានបង្គាប់បញ្ជាឲ្យឈ្មោះ ទូច បូភាព ភេទប្រុស អាយុ៣៥ឆ្នាំ ទីលំនៅផ្ទះលេខ១០០E0 ផ្លូវ២១៥ ក្រុមទី៧២ ភូមិទី១១ សង្កាត់វាលវង់ ខណ្ឌ៧មករា រាជធានីភ្នំពេញ ចូលបង្ហាញខ្លួននៅអធិការដ្ឋាននគរបាលខណ្ឌដូនពេញ នៃស្នងការដ្ឋាននគរបាលរាជធានីភ្នំពេញ ឲ្យបានមុនថ្ងៃទី២២ ខែសីហា ឆ្នាំ២០១៧។
ការកោះឲ្យជនរូបនេះ ចូលខ្លួនបំភ្លឺ គឺដើម្បីសាកសួរលើករណី កាន់កាប់អាវុធខុសច្បាប់ ដោយគ្មានការអនុញ្ញាត ពាក់ព័ន្ធករណីផ្ទុះអាវុធជាច្រើនគ្រាប់ ដោយអនាធិបតេតយ្យតាមផ្លូវសាធារណៈនៅចំណុចតាមបណ្ដោយផ្លូវលេខ២៤២ ភូមិទី៤ សង្កាត់ចតុមុខ ខណ្ឌដូនពេញ រាជធានីភ្នំពេញ កាលពីថ្ងៃទី៧ ខែកក្កដា ឆ្នាំ២០១៧ វេលាម៉ោង១០៖៣០នាទីយប់។
បែបណាក្ដី ករណីនេះត្រូវគេមើលឃើញថា ធ្វើឡើងបន្ទាប់ពីសមត្ថកិច្ចកំណត់បានមុខសញ្ញាល្មើស ហើយនៅរង់ចាំតែដីការបស់តុលាការ ដើម្បីចាត់ការតាមច្បាប់តែប៉ុណ្ណោះ។
អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នាយឧត្តមសេនីយ៍ ជួន សុវណ្ណ បានប្រាប់អង្គភាពសារព័ត៌មាន CAM POST នៅរសៀលថ្ងៃទី១១ ខែកក្កដានេះថា “កំពុងតែខិតខំ យើងមានសាវតាជាតិគ្រប់គ្រាន់ហើយ ប៉ុន្តែការស្រាវជ្រាវរកមនុស្សមិនទាន់ឃើញ។ ដើម្បីឲ្យត្រឹមត្រូវតាមនីតិវិធីយើងបានកសាងសំណុំរឿងបញ្ជូនទៅស្ថាប័នតុលាការហើយ ដើម្បីស្នើសុំដីកាបញ្ជាឲ្យចូលខ្លួន ព្រោះពេលណាផុតបទល្មើសជាក់ស្តែង យើងមិនអាចស្វែងរកចាប់ខ្លួនទេ បើសិនគ្មានដីកា”។
ប្រធានការិយាល័យព្រហ្មទណ្ឌកម្រិតស្រាលរាជធានីភ្នំពេញ លោក ប៊ុន សត្យា បានប្រាប់ CAM POST ដែរថា ពេលនេះសមត្ថកិច្ចកំពុងតាមចាប់ជនបង្កដោយពីមុនជនសង្ស័យធ្លាប់ជាមន្ត្រីនគរបាលព្រហ្មទណ្ឌរាជធានីភ្នំពេញ ហើយឥឡូវឮថា ទៅធ្វើជាមន្ត្រីយោធា។
លោក ប៊ុន សត្យា បានបញ្ជាក់ថា ជនសង្ស័យជាម្ចាស់រថយន្ដដែលបាញ់ប្រហារជិត១០គ្រាប់ ឈ្មោះ ទូច បូភាព មានទីលំនៅក្នុងសង្កាត់វាលវង់ ខណ្ឌ៧មករានោះ ពីមុនជាអតីតមន្ដ្រីនគរបាលព្រហ្មទណ្ឌកម្រិតស្រាល ផ្នែកមជ្ឈឹម២ បន្ទាប់មកជននេះបានលាឈប់ពីក្របខ័ណ្ឌនគរបាលជាតិ ទៅបម្រើការងារជាមន្ដ្រីយោធាវិញម្ដង ប៉ុន្ដែមិនដឹងថា បម្រើនៅអង្គភាពណាមួយ។
គួររំឭកថា បុរសម្នាក់ បានបើករថយន្តមួយគ្រឿងម៉ាក Lexus RX330 តាមបណ្ដោយផ្លូវលេខ២៤២ ហើយដកកាំភ្លើងបាញ់ជិត១០គ្រាប់ នៅក្រោយក្រុមហ៊ុន ស៊ែលកាត ទល់មុខទីស្នាក់ការសហភាពសហព័ន្ធអ្នកសារព័ត៌មានកម្ពុជា (សសសក) បង្កការភ្ញាក់ផ្អើលកាលពីម៉ោងជាង១០យប់ ថ្ងៃទី៧ ខែកក្កដា ឆ្នាំ២០១៧ ស្ថិតក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ៕
ដោយ ហុក វិបុល
