ក្រុមការងារ និងគណបក្ស ខេត្តក្រចេះ ប្រជុំផ្សព្វផ្សាយសេចក្តីសម្រេចសន្និបាត គណៈកម្មាធិការកណ្តាលវិសាមញ្ញ របស់គណបក្សប្រជាជនកម្ពុជា
(ក្រចេះ)៖ លោក ព្រុំ សុខា រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារខេត្តក្រចេះ រួមជាមួយសហការី បានចូលរួមក្នុងកិច្ចប្រជុំផ្សព្វផ្សាយសេចក្តីសម្រេចសន្និបាតគណៈកម្មាធិការកណ្តាលវិសាមញ្ញរបស់គណ បក្សប្រជាជនកម្ពុជា ដែលបានប្រព្រឹត្តទៅកាលពីថ្ងៃទី១៦-១៧ ខែកក្កដា ឆ្នាំ២០២២ កន្លងមក ។
ពិធីនេះបានរៀបចំឡើងកាលពីព្រឹកថ្ងៃទី២៣ ខែកក្កដា ឆ្នាំ២០២២ នៅសាលមហោស្រពខេត្តក្រចេះ ដោយមានការចូលរួមពីសំណាក់លោក លោកស្រី ជាសមាជិករដ្ឋសភា លោកប្រធានក្រុមប្រឹក្សាខេត្ត អភិបាលខេត្ត លោក លោកស្រី ក្រុមការងារថ្នាក់ជាតិ ថ្នាក់ខេត្តចុះមូលដ្ឋាន ស្រុក ឃុំ-សង្កាត់ លោក លោកស្រី ជាថ្នាក់ដឹកនាំគណបក្សស្រុក មេឃុំ-ចៅសង្កាត់ និង មេភូមិ សរុបអ្នកចូលរួមប្រមាណ ៤៥០នាក់។
ជាកិច្ចចាប់ផ្តើម លោក វ៉ា ថន អភិបាលខេត្ត និងជាប្រធានគណបក្សខេត្តក្រចេះ បានធ្វើរបាយការណ៍សង្ខេបពីស្ថានភាពទូទៅ និង លទ្ធផលដ៏ត្រចះត្រចង់នៃការបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីថ្ងៃទី៥ ខែមិថុនា ឆ្នាំ២០២២ កន្លងមក ដែលគណបក្សយើងទទួលបានតួនាទីជាមេឃុំ និងចៅសង្កាត់ទាំងអស់ ទាំង៤៨ ឃុំ សង្កាត់ ក្នុងខេត្តក្រចេះ។
បន្ទាប់ពី លោក ធុន គ្រី ប្រធានគណៈប្រចាំការគណបក្សខេត្តក្រចេះ បានអានសេចក្តីជូនដំណឹងស្តីពីលទ្ធផលសន្និបាតគណៈកម្មាធិការកណ្តាលវិសាមញ្ញរបស់គណបក្សប្រជាជនកម្ពុជារួចមក លោក ព្រុំ សុខា រដ្ឋមន្ត្រីក្រសួង មុខងារសាធារណៈ និងជាប្រធានក្រុមការងារខេត្តក្រចេះ បានថ្លែងមតិបូកសរុបកិច្ចប្រជុំការងារ ដោយបានធ្វើការកោតសរសើរ និងអរគុណដ៏ស្មោះស្ម័គ្រសាជាថ្មីម្តងទៀតជូនចំពោះកម្លាំងសរុបរបស់ក្រុមការងារ និងគណបក្សខេត្តក្រចេះ ដែលបានចូលរួមចំណែកយ៉ាងសក្តិសមជាមួយជោគជ័យដ៏ត្រចះត្រចង់នៅទូទាំងប្រទេស ក្នុងការបោះឆ្នោតឃុំសង្កាត់អាណត្តិទី៥ កន្លងមក។
ទន្ទឹមនោះ លោករដ្ឋមន្រ្តីប្រធានក្រុមការងារខេត្តក្រចេះ ក៏បានធ្វើការគូសបញ្ជាក់សង្កត់ធ្ងន់ពីយុទ្ធសាស្រ្តដឹកនាំរបស់គណបក្សប្រជាជនកម្ពុជាក្រោមមគ្គុទេសក៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ដែលកន្លងមក សម្រេចបានសមិទ្ធផលធំធេងជាបន្តបន្ទាប់ក្នុងបុព្វហេតុសុខសន្តិភាព វឌ្ឍនភាព និងវិបុលភាពរបស់មាតុភូមិ និងប្រជាជនកម្ពុជា។
សក្ខីកម្មនៃស្នាដៃមហិមាជាប្រវត្តិសាស្រ្តនេះ បានបង្ហាញច្បាស់តាមរយៈជំនឿរបស់ប្រជាជនដែលបានបោះឆ្នោតគាំទ្រគណបក្សប្រជាជនកម្ពុជា ឱ្យដណ្ដើមបានជ័យជំនះជារៀងរហូតមក។ជោគជ័យនេះក៏ជាសក្ខីភាពយ៉ាងប្រត្យ័ក្ស សបញ្ជាក់ពីឆន្ទៈមោះមុតរបស់ប្រជាជនកម្ពុជា ដែលស្រឡាញ់សុខសន្តិភាព វឌ្ឍនភាព និងវិបុលភាពជារៀងដរាប សម្រាប់អនាគតរុងរឿងរបស់កូនចៅគ្រប់ជំនាន់។
អាស្រ័យហេតុនេះ យើងត្រូវរួមគ្នាពុះពារជំរុញអនុវត្តសម្រេចភារកិច្ចនយោបាយតាមមុខសញ្ញានៅគ្រប់ផ្នែក គ្រប់លំដាប់ថ្នាក់ និងការទទួលខុសត្រូវរៀងៗខ្លួន ដើម្បីប្រែក្លាយការបេ្តជ្ញាចិត្តជាយុទ្ធសាស្រ្ត នៃសន្និបាតគណកម្មា ធិការកណ្តាលវិសាមញ្ញ របស់គណបក្សប្រជាជនកម្ពុជាទៅជាចលនាសកម្មភាពជាក់ស្តែងសំដៅរក្សា និងពង្រីកប្រៀបឈ្នះរបស់គណបក្ស ឈានឆ្ពោះទៅដណ្តើមជ័យជំនះសម្រាប់ការបោះឆ្នោតជ្រើសតាំងតំណាងរាស្រ្តនៅឆ្នាំ២០២៣ ទៀត៕
