ខេត្តប៉ៃលិន៖នៅថ្ងៃទី៦ ខែកក្កដា ឆ្នាំ២០១៧ នេះ មេឃុំចៅសង្កាត់ និងសមាជិកក្រុមប្រឹក្សាឃុំ-សង្កាត់ដែលទើបជាប់ឆ្នោតថ្មីកាលពីថ្ងៃទី៤ ខែមិថុនា ត្រូវបានអាជ្ញាធរខេត្តប៉ៃលិន ចុះធ្វើពិធីប្រកាសសុពលភាពចាប់ផ្ដើមចូលកាន់តំណែងហើយ ក្រោយពីការប្រកាសលទ្ធផលផ្លូវការរយៈពេល ១៤ថ្ងៃ ដោយយោងតាមច្បាប់របស់ គ.ជ.ប ។
ចំពោះការប្រកាសសុពលភាពនេះ គឺជាការផ្ទេរតំណែងពីមេឃុំចៅសង្កាត់អាណត្តិចាស់ ទៅមេឃុំចៅសង្កាត់ថ្មីនៅទូទាំងខេត្តប៉ៃលិន ដែលគេសង្កេតឃើញថា មេឃុំ ចៅសង្កាត់អាណត្តិថ្មី បានប្ដេជ្ញាចិត្ត ដោយធ្វើការជូនប្រជាពលរដ្ឋឲ្យបានល្អ និងគោរពច្បាប់ក្នុងអាណត្តិការងាររបស់ខ្លួន ៥ឆ្នាំទៅមុខទៀត ។
ចៅសង្កាត់ថ្មី សំរាប់សង្កាត់បរយ៉ាខា គឺលោក លឹម សំបូរ មកពីគណបក្សប្រជាជនកម្ពុជា បានប្រកាសប្ដេជ្ញាថា លោកនឹងគោរពរដ្ឋធម្មនុញ្ញ ច្បាប់នានា ព្រមទាំងអនុក្រឹត្យវិមជ្ឈការ អំណាចតួនាទីភារកិច្ច ទៅឃុំ-សង្កាត់ ព្រមទាំងពង្រឹងសាមគ្គីផ្ទៃក្នុងឲ្យបានរឹងមាំ ដោយអនុវត្តន៍តាមការសន្យា ជាមួយប្រជាពលរដ្ឋក្នុងការស្ដារហេដ្ឋារចនាសម្ព័ន្ធ អភិវឌ្ឍសង្កាត់ប្រកបដោយបរិស្ថានល្អ និងរស់នៅដោយផាសុកភាពល្អប្រសើរ ។ជាមួយគ្នាចូលរួមអនុវត្តន៍ និងសហការ ពង្រឹងការងារសន្តិសុខ និងសណ្ដាប់ធ្នាប់សង្គមស្ដីពីភូមិឃុំមានសុវត្ថិភាព ផងដែរ ។
ក្នុងពិធីប្រកាសចូលកាន់ដំណែងនេះដែរ គេសង្កេតឃើញ មេឃុំចៅសង្កាត់អាណត្តិចាស់ បានរាយការណ៍ ពីសមិទ្ធផលរបស់ខ្លួន ដែលសម្រេចបានក្នុងអាណត្តិចាស់ ជូនចៅសង្កាត់ថ្មី ។
បន្ទាប់ពីរបាយការណ៍ស្ដីពីភូមិសាស្ត្រដែនដីឃុំ-សង្កាត់ ស្ថិតិប្រជាពលរដ្ឋ ក្នុងនោះក៏មានរបាយការណ៍អំពីថវិកាឃុំ ដែលចំណាយ និងនៅសល់ ព្រមទាំងបំណុលផងដែរ ។
សូមបញ្ជាក់ផងដែរថា នៅខេត្តប៉ៃលិន មានក្រុងមួយ ស្រុកមួយ និងមាន០៨ឃុំ សង្កាត់ រួមមាន ៖ សង្កាត់ប៉ៃលិន គណបក្សប្រជាជនទទួលបានចៅសង្កាត់ ចៅសង្កាត់រងទី១ និងសមាជិកចំនួន៣រូប ឯគណបក្សសង្គ្រោះជាតិទទួលបានចៅសង្កាតរងទី២ និងសមាជិក៣រូប ។សង្កាត់អូរតាវ៉ៅ ចៅសង្កាត់ និងចៅសង្កាត់រងទី១បានទៅលើគណបក្សប្រជាជន និងសមាជិក២រូប ចំណែកគណបក្សសង្គ្រោះជាតិបានចៅសង្កាត់រងទី២ និងសមាជិក៣រូប។ ចំពោះសង្កាត់ទូលល្វា ចៅសង្កាត់ និងចៅសង្កាត់រងទី១ បានទៅលើគណបក្សប្រជាជន រួមជាមួយសមាជិក១រូប ចំណែកគណបក្សសង្គ្រោះជាតិបានចៅសង្កាត់រងទី២ រួមនិងសមាជិក១រូប ។ សង្កាត់បរយ៉ាខា ចៅសង្កាត់ និងចៅសង្កាត់រងទី១ បានទៅលើគណបក្សប្រជាជន រួមជាមួយសមាជិក១រូប ចំណែកគណបក្សសង្គ្រោះជាតិបានចៅសង្កាត់រងទី២ រួមនិងសមាជិក១រូប ។
ដោយឡែកស្រុកសាលាក្រៅ មាន៤ឃុំរួមមាន៖ ឃុំសាលាក្រៅ មេឃុំ និងជំទប់រងទី១ បានទៅលើគណបក្សប្រជាជន រួមជាមួយសមាជិក១រូប ចំណែកគណបក្សសង្គ្រោះជាតិបានជំទប់រងទី២ រួមនិងសមាជិក១រូប ។ ឃុំអូរអណ្តូង មេឃុំ និងជំទប់រងទី១ បានទៅលើគណបក្សប្រជាជន រួមជាមួយសមាជិក១រូប ចំណែកគណបក្សសង្គ្រោះជាតិបានជំទប់រងទី២ រួមនិងសមាជិក១រូប ។ ឃុំស្ទឹងត្រង់ មេឃុំ និងជំទប់ទី១ បានទៅលើគណបក្សប្រជាជន រួមនិងសមាជិក២រូប ចំណែកគណបក្សសង្គ្រោះជាតិទទួលជំទប់ទី២ និងសមាជិក២រូប ។ ដោយឡែកឃុំដែលគណបក្សសង្គ្រោះជាតិទទូលបានមេឃុំមួយនៅខេត្តប៉ៃលិននោះ គឺឃុំស្ទឹងកាច់ ជាឃុំដែលនៅជាប់ព្រំដែនថៃ មានច្រកទ្វាអន្តរជាតិមួយ និងជាឃុំដែលមានចំណូលសេដ្ឋកិច្ចខ្ពស់ មេឃុំ និងជំទប់ទី១ រួមនិងសមាជិក៣រូប បានទៅលើគណបក្សសង្គ្រោះជាតិ ចំណែកគណបក្សប្រជាជន ទទួលបានជំទប់ទី២ និងសមាជិក៣រូបផងដែរ ៕
សេង សុវណ្ណារិទ្ធ
