កែប ៖ អតីតសង្ឃម្នាក់ និងជនក្លែងជាសង្ឃមួយអង្គ ដែលតែងតែដើរនិមន្តបិណ្ឌបាទយកលុយតាមផ្ទះអ្នកស្រុកដើម្បីទិញថ្នាំញៀនមកប្រើប្រាស់ ត្រូវបានសមត្ថកិច្ចនគរបាលក្រុងកែប ឃាត់ខ្លួន កាលពីរសៀល ថ្ងៃទី២៨ ខែមិថុនា ឆ្នាំ២០១៧ លើកំណាត់ផ្លូវជាតិលេខ33A ស្ថិតក្នុងភូមិដំណាក់ចង្អើរ សង្កាត់ព្រៃធំ ក្រុង-ខេត្តកែប។
នគរបាលគ្រឿងញៀនខេត្តកែប បានឲ្យដឹងថា៖ ព្រះសង្ឃក្លែងក្លាយមួយអង្គរួមនឹងបក្សពួកជាអតីតសង្ឃ ដែលជាជនសង្ស័យនោះ រួមមាន៖ ១-ឈ្មោះ គិន ភក្តី អាយុ២៦ឆ្នាំជាអតីតសង្ឃដែលបានផ្សឹករួចហើយ មានទីលំនៅក្នុងឃុំក្រាំងស្នាយ ស្រុកឈូក ខេត្តកំពត ទី ២-ឈ្មោះ ម៉ី ងួន អាយុ២៦ឆ្នាំ ជាព្រះសង្ឃក្លែងក្លាយមានទីលំនៅក្នុងភូមិ២ សង្កាត់កំពង់ស្នាយ ក្រុងសេរីសោភ័ណ្ឌ ខេត្តបន្ទាយមានជ័យ។
សមត្ថកិច្ចបានបញ្ជាក់ថា ជនសង្ស័យទាំង២នាក់នេះ ត្រូវកម្លាំងសមត្ថកិច្ច ធ្វើការឃាត់ខ្លួន ខណ: ពេលបង្កគ្រោះថ្នាក់ចរាចរណ៍ កាលពីរសៀល ថ្ងៃទី២៨ ខែមិថុនា ឆ្នាំ២០១៧ លើកំណាត់ផ្លូវជាតិ33A ចំណុចមុខសាលាខេត្តកែប ស្ថិតក្នុងភូមិកែប សង្កាត់កែប ក្រុងកែប ដោយពួកគេជិះរថយន្ត Camry ពណ៌ទឹកប្រាក់ ពាក់ស្លាកលេខ បន្ទាយមានជ័យ2A-5141ហើយក៏បានប៉ះទង្គិចជាមួយ អ្នកជិះម៉ូតូC125 បណ្តាលឲ្យម្ចាស់ម៉ូតូរងរបួសស្រាលម្នាក់ ហើយម្ចាស់រថយន្តបានព្យាយាមបើកគេច ទើបកម្លាំងសមត្ថកិច្ចក្រុងកែប ស្នាក់ចាប់បាននៅផ្សារដំណាក់ចង្អើរ ដែលមានចំងាយពីកន្លែងកើតហេតុ ប្រមាណជាង១០គីឡូម៉ែត្រ ។
ក្រោយកម្លាំងជំនាញស្ទាក់ចាប់បានរថយន្ដ ក៏ឃាត់បានមនុស្ស២នាក់ ថែមទាំងប្រទះឃើញមានស្បង់ជីវរនៅក្នុងរថយន្តផង ទើបសមត្ថកិច្ចនាំមកសាកសួរក៏បែកធ្លាយពីករណីព្រះសង្ឃក្លែងក្លាយខាងលើតែម្តង។
បើតាមចំលើយសារភាព របស់ឈ្មោះ ម៉ី ងួន បានឆ្លើយថា រូបគេបន្លំខ្លួនធ្វើជាសង្ឃដើរបិណ្ឌបាត្រយកលុយ ទិញគ្រឿងញៀនជក់តាំងពីដើមខែមិថុនា ឆ្នាំ២០១៧ ដោយបានធ្វើសកម្មភាព នៅតាមបណ្តាខេត្តមួយចំនួន ដូចជា៖ ខេត្តបន្តាយមានជ័យ, បាត់ដំបង, សៀមរាប, កំពង់ធំ, កំពង់ឆ្នាំង, ភ្នំពេញ, កំពង់ស្ពឺ, ព្រះសីហនុ, កំពត, និងកែប ហើយក្នុងរយៈពេល១៥ថ្ងៃនេះគេបិណ្ឌបាតបានប្រាក់ចំនួន ៥,០៩០,០០០រៀល។ ជនសង្ស័យបានសារភាពទៀតថា ពួកគេដើរនិមន្តបិណ្ឌបាតនៅខេត្តកែប រយៈពេលមួយព្រឹក បានប្រាក់ ២៦០,០០០រៀល ក៏ត្រូវសមត្ថកិច្ចឃាត់ ខ្លួនតែម្ដង ។ គេបានឲ្យដឹងទៀតថា កន្លងមកបក្ខពួកខ្លួនមានគ្នា សរុបចំនួន០៤នាក់ ពេលនេះមកខេត្តកែប២នាក់ និងចុះធ្វើសកម្មភាពនៅទីរួមខេត្តកំពត២នាក់ទៀត។
បន្ទាប់ពីទទួលបានចម្លើយសារភាព កម្លាំងសមត្ថកិច្ច បានស្នើសុំមន្ទីរធម្មការ និងព្រះអនុគុណខេត្តកែប ធ្វើការផ្សឹកតាមបែបបទព្រះពុទ្ធសាសនា រួចប្រគល់ឲ្យខាងសមត្ថកិច្ចជំនាញ ពិនិត្យឃើញថា ពួកគេពិតជាមានសារធាតុញៀនក្នុងខ្លួន ទើបកសាងសំណុំរឿងដើម្បីបញ្ជូនខ្លួនទៅសាលាដំបូងខេត្តកំពត ចាត់ការតាមនីតិវិធីច្បាប់ ៕
ណារិទ្ធ
