កំពត ៖ នៅព្រឹកថ្ងៃទី២៨ខែមិថុនា ឆ្នាំ២០១៧ លោកចាន់ ចេស្តា ប្រធានគណៈកម្មាធិការគណបក្សប្រជាជនកម្ពុជាខេត្តកំពត បានដឹកនាំក្រុមការងារបក្ស និងសមាជិកបក្សគ្រប់មូលដ្ឋាន ប្រារព្វខួបលើកទី៦៦ ថ្ងៃបង្កើតគណបក្សប្រជាជនកម្ពុជា(២៨/០៦/១៩៥១-២៨/០៦/២០១៧)។ពិធីនេះបានប្រារព្វឡើងនៅបរិវេណសួនច្បារស្រះឈូក ស្ថិតទល់មុខស្នងការដ្ឋាននគរបាលខេត្តកំពត។
លោក ចាន់ ចេស្តា ប្រធានគណៈកម្មាធិការគណបក្សខេត្ត បានអានសន្ទរកថា របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលមានខ្លឹមសារថា នេះជាខួបលើកទី៦៦នៃថ្ងៃបង្កើតគណបក្សប្រជាជនកម្ពុជា ដែលមានឈ្មោះដើមថា បក្សប្រជាជនបដិវត្តខ្មែរ ដោយការបង្កើតនេះដើម្បីដឹកនាំតស៊ូដណ្តើមឯករាជ្យពីពួកអាណានិគមនិយម ជូនជាតិមាតុភូមិនិងប្រជាជន។ចាប់តាំងពីថ្ងៃចាប់បដិសន្ធិមកដល់ពេលនេះ គឺមានរយៈពេល៦៦ឆ្នាំហើយដែលគណបក្សប្រជាជនកម្ពុជាបានប្រកាន់ខ្ជាប់ឥតងាករេ នូវគោលជំហរបស់ខ្លួន ដែលជាគណបក្សប្រជាជន អាស្រ័យលើប្រជាជននិងដើម្បីប្រជាជន ហើយបានសម្រេចសមិទ្ធិផលធំៗជាច្រើនជូនជាតិមាតុភូមិ។ប្រការនេះហើយដែលធ្វើឲ្យប្រជាជនមានការគាំទ្រ ផ្តល់ទំនុកចិត្ត និងផ្តល់តួនាទីដឹកនាំប្រទេសដល់គណបក្សប្រជាជនកម្ពុជា ក្នុងរយៈពេលជាង៣៨ឆ្នាំមកនេះ។
ការប្រារព្វខួបអនុស្សាវរីយ៍នេះឡើង ក្នុងស្មារតីគោរពដឹងគុណ ចំពោះកម្មាភិបាល យុទ្ធជន យុទ្ធនារីនិងប្រជាជនដ៏ច្រើនឥតគណនា ដែលបានតស៊ូ ពុះពារធ្វើពលីកម្មគ្រប់បែបយ៉ាង ប្រកបដោយវីរភាពដ៏ឧត្តុង្គឧត្តម គ្រប់ដំណាក់កាល ដើម្បីឯករាជ្យ សន្តិភាព សេរីភាព អធិបតេយ្យ បូរណភាពដែនដីនិងវឌ្ឍនភាពនៃមាតុភូមិកម្ពុជា។ខួបអនុស្សាវរីយ៍នេះ ក៏បានប្រព្រឹត្តឡើងក្នុងសភាពការណ៍ដែលព្រះរាជាណាចក្រកម្ពុជាទទួលបានសន្តិភាពពេញលេញ មានសន្តិភាពខាងនយោបាយរឹងមាំ មានការអភិវឌ្ឍន៍ខ្លាំងក្លាលើគ្រប់វិស័យ ស្របពេលដែលប្រជាជនកម្ពុជា កំពុងអបអរសាទរចំពោះជោគជ័យនៃដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់អាណតិ្តទី៤ កាលពីថ្ងៃទី៤ខែមិថុនា ឆ្នាំ២០១៧កន្លងមកនោះ។/ ណារិទ្ធ
