រាជធានី ៖ ពិធីប្រកាសចូលកាន់តំណែងជាអភិបាល និងអភិបាលរងរាជធានីភ្នំពេញ កំពុងប្រព្រឹត្តិទៅក្រោមអធិបតីភាព សម្តេចក្រឡាហោ ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ និងមានការចូលរួមពីមន្ដ្រីរាជការ កងកម្លាំងប្រដាប់អាវុធជាច្រើននាក់ទៀតផងដែរនៅរសៀលថ្ងៃទី២៨ ខែមិថុនា ឆ្នាំ២០១៧នេះ ។
ឯកឧត្តម ឃួង ស្រេង ត្រូវបានប្រកាសឲ្យចូលកាន់តំណែង ជាអភិបាលរាជធានីភ្នំពេញ ជំនួសលោក ប៉ា សុជាតិវង្ស ដែល នឹងត្រូវចូលនិវត្តន៍។ ក្រៅពីនេះ ពិធីរៀបចំឡើងនៅថ្ងៃនេះ លោក កើត ឆែ និងលោក នួន ផារ័ត្ន ក៏ត្រូវបានតែងតាំងជា អភិបាលរង រាជធានីភ្នំពេញផងដែរ។
កាលពីថ្ងៃទី១៧ ខែមិថុនា ឆ្នាំ២០១៧ កន្លងទៅ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជណាចក្រកម្ពុជា បានចេញព្រះរាជក្រឹត្យត្រាស់បង្គាប់ តែងតាំង ឯកឧត្តម ឃួង ស្រេង ឋានន្តរស័ក្តិឧត្តមមន្ត្រី ថ្នាក់លេខ១ ជាអភិបាលរាជធានីភ្នំពេញ ជំនួសលោក ប៉ា សុជាតិវង្ស។
យោងតាមព្រះរាជក្រឹត្យរបស់ព្រះអង្គ បានបញ្ជាក់ឱ្យដឹងថា ការតែងតាំងលោក ឃួង ស្រេង ឋានន្ដរស័ក្ដិឧត្តមមន្ដ្រីថ្នាក់ លេខ១ ជាអភិបាល នៃគណៈអភិបាលរាជធានីភ្នំពេញនេះ ធ្វើឡើងតាមសំណើររបស់ សម្តេចតេជោ ហ៊ុន សែន នាយករដ្ឋមន្ដ្រីនៃព្រះរាជណាចក្រកម្ពុជា៕
ឯកសារ លោក ហុក វិបុល
