កែប ៖ ជនសង្ស័យម្នាក់ត្រូវសមត្ថកិច្ចនៃអធិការដ្ឋាននគរបាលស្រុកដំណាក់ចង្អើរ ឃាត់ខ្លួន រួមជាមួយថ្នាំញៀនចំនួន៩កញ្ចប់ ដោយការបង្ល្រាបនេះបន្ទាប់ពីក្រុមសមត្ថកិច្ចបានស្រាវជ្រាវតាមជំនាញរូចមក។
ជនសង្ស័យដែលត្រូវឃាត់ខ្លួនឈ្មោះ សួន តេង ភេទប្រុស អាយុ២៩ឆ្នាំ នៅលីវ មុខរបរមិនពិតប្រាកដ រស់នៅក្នុងភូមិរនេស ឃុំពងទឹក ស្រុកដំណាក់ចង្អើរ ខេត្តកែប ត្រូវបានសមត្ថកិច្ចសហការឃាត់ខ្លួននៅរសៀលថ្ងៃទី២២ខែមិថុនា ឆ្នាំ២០១៧ត្រង់ចំណុចភូមិ ឃុំខាងលើ។
ទាក់ទិននឹងករណីនេះដែរ សមត្ថកិច្ចបានបញ្ជាក់ថាការឈានទៅបង្ក្រាបគ្រឿងញៀនទទួលបានជោគជ័យ គឺដោយសារមានការពិនិត្យស្រាវជ្រាវ តាមជំនាញបានច្បាស់លាស់ និងដោយមានការសម្របសម្រួលពីលោកខាន់ សុផល ព្រះរាជអាជ្ញារងអមសាលាដំបូងខេត្តកំពត និងលោកឧត្តមសេនីយ៍ទោ អ៊ីងសំអុល ស្នងការនគរបាលខេត្ត ទើបដាក់បញ្ជាឲ្យកំលាំងសមត្ថកិច្ចស្រុកដំណាក់ចង្អើរ សហការជាមួយ ការិយាល័យប្រឆាំងគ្រឿងញៀន ចុះឆែកឆេរ ផ្ទះជនសង្ស័យខាងលើ ក៏ប្រទះឃើញមានលាក់ទុកគ្រឿងញៀនប្រភេទម៉ាទឹកកកចំនួន៩កញ្ចប់ក្នុងនោះមាន(ធំ២កញ្ចប់) ព្រមទាំងសម្ភារៈសម្រាប់វេចខ្ចប់និងឧបករណ៍ប្រើប្រាស់មួយចំនួនផងដែរ។
យោងតាមចំលើយ ជនសង្ស័យបាននិយាយថា គេបានប្រើប្រាស់គ្រឿងញៀនតាំងពីឆ្នាំ២០១១ ដល់សព្វថ្ងៃ ហើយក៏ធ្លាប់ចូលមណ្ឌលកែប្រែឱកាសខ្ញុំមួយលើក កាលពីថ្ងៃទី២៦.កុម្ភៈ ឆ្នាំ២០១៥ បានរយះពេល៦ខែ តែក្រោយចេញពីមណ្ឌលបានមួយរយៈ ក៍បានប្រើប្រាស់គ្រឿងញៀនឡើងវិញ ហើយក៏ចាប់ផ្តើមលក់ចែកចាយថែមទៀតផង ដោយគេបាននាំយកមកពីភ្នំពេញ មកវេចខ្ចប់ដោយខ្លួនឯង ដើម្បីចែកចាយបន្តនៅមូលដ្ឋានខាងលើ។
ដោយផ្អែកលើចម្លើយសារភាព ជនសង្ស័យរួមនិងវត្ថុតាងពាក់ព័ន្ធ សមត្ថកិច្ចបាន និងកំពុងរៀបចំសំណុំរឿង ដើម្បីបញ្ជូនទៅសាលាដំបូងខេត្តកំពត ចាត់ការបន្តតាមនីតិវិធីនៅព្រឹកថ្ងៃទី២៣ខែមិថុនា ឆ្នាំ២០១៧នេះហើយ។/
ណារិទ្ធ
