ខេត្តប៉ៃលិន ៖ ជនសង្ស័យជួញដូរគ្រឿងញៀន ចំនួន៥នាក់ ត្រូវបាននគរបាលឆ្មក់ចាប់ឃាត់ខ្លួន ខណៈកំពុងចែកចាយយ៉ាងសកម្មនៅក្នុងភូមិ លុះតាមស៊ើបអង្កេតអស់រយៈ ពេលជាយូរ ទើបដឹងច្បាស់ក៏ចាប់ឃាត់ខ្លួនតែម្តង ។
ហេតុការណ៍នេះ បានកើតឡើងកាលពីវេលាម៉ោង៨ និង៣០នាទីយប់ ថ្ងៃទី១៥ ខែមិថុនា ឆ្នាំ២០១៧ ស្ថិតនៅក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ដោយឃាត់ខ្លួនបានជនសង្ស័យចំនួន៥នាក់ និងវត្ថុតាងគ្រឿងញៀនប្រភេទ ICE ចំនួន០២កញ្ចប់តូច រួមទាំ ងរថយន្ត១គ្រឿង ពាក់ស្លាកលេខខេមរភូមិន្ទ រំសេវចំនួន០១កំប៉ុងផងដែរ ។
ប្រភពព័ត៌មានពីនគរបាលបានឱ្យដឹងថា ជនសង្ស័យទាំងនោះ មានឈ្មោះដូចខាងក្រោម ទី១- ឈ្មោះ ហ៊ួ គឹមសាន្ត ភេទប្រុស អាយុ៣៦ ឆ្នាំ ទី២- ឈ្មោះ អេន ប្រុស ភេទប្រុស អាយុ២៨ឆ្នាំ ។
ប្រភពបន្តទៀតថា លុះឈានដល់វេលាម៉ោង ៨និង៣០នាទី ថ្ងៃទី១៦ ខែមិថុនា ឆ្នាំ២០១៧ បន្ទាប់ពីចុះបង្ក្រាបករណីជួញដូរគ្រឿងញៀនបានចំនួន២នាក់រួចមក ក៏បន្តចាប់អ្នកប្រើប្រាស់គ្រឿងញៀនចំនួន៣នាក់បន្ថែមទៀត នៅចំណុចភូមិសួនអំពៅកើត សង្កាត់ប៉ៃលិន ក្រុងប៉ៃលិន ។
ប្រភពបញ្ជាក់ទៀតថា ជនសង្ស័យបានសារភាពថា ពួកគេពិតជារកស៊ីជួញដូរគ្រឿង ញៀន និងប្រើប្រាស់គ្រឿងញៀន អស់រយៈពេលជាយូរមកហើយ ដោយទិញពីឈ្មួញនៅ ក្នុងក្រុងប៉ៃលិន ហើយលក់ចែកចាយបន្តឱ្យអ្នកប្រើប្រាស់ដែលមកពីក្នុងភូមិ និងមកពីភូមិ នានាក្នុងខេត្តប៉ៃលិនផងដែរ ។
ពាក់ព័ន្ធទៅនឹងបញ្ហានេះ គ្រឿងញៀនកំពុងតែរីកដុះដាល់កាន់តែខ្លាំងឡើងៗនៅក្នុងខេត្តប៉ៃលិន ហើយកំពុងតែពង្វក់ស្មារតីយុវជនឱ្យប្រើប្រាស់រហូតដល់ក្លាយទៅជាមនុស្សឆ្កួត ហើយក៏បង្កវឹកវរដល់សង្គមផងដែរ ៕
ដោយ ៖ នីយ៉ា
