កែប ៖ លោកឧត្តមសេនីយ៍ទោ អ៊ីង សំអុល ស្នងការនគរបាលខេត្តកែប រួមនឹងសហការី បានចុះសួរសុខទុក្ខ សំណេះសំណាលជាមួយប្រជាពលរដ្ឋក្នុងភូមិអូរដូង ឃុំពងទឹក ស្រុកដំណាក់ចង្អើរ ខេត្តកែប ចំនួន១៥០នាក់ដើម្បីផ្សព្វផ្សាយសភាពការណ៍នៃលទ្ធផលការបោះឆ្នោតជ្រើសរើសក្រុមប្រឹក្សាឃុំ សង្កាត់និងពង្រឹងវិធានការសន្តិសុខក្នុងមូលដ្ឋានខាងលើ។
ថ្លែងសំណេះសំណាលជាមួយប្រជាពលរដ្ឋ នៅព្រឹកថ្ងៃទី១៧ខែមិថុនា ឆ្នាំ២០១៧នេះ លោកស្នងការខេត្ត ក៏បានសំដែងនូវអំណរសាទរនឹងការដឹងគុណដ៏ជ្រៀលជ្រៅចំពោះប្រជាពលរដ្ឋទូទាំងតំបន់ ដែលបានបំពេញកាតព្វកិច្ខរបស់ខ្លួនចូលរួមការបោះឆ្នោតក្នុងពេលកន្លងមកថ្មីៗនេះ និងសូមចូលរួមអបអរសាទរដល់គណបក្សប្រជាជនកម្ពុជា ដែលទទួលបានការគាំទ្រពីសំណាក់ប្រជាពលរដ្ឋ ក្នុងការជ្រើសរើសឲ្យធ្វើជា មេឃុំ ចៅសង្កាត់ទូទាំងខេត្តបន្តទៀត។ទន្ទឹមនោះលោកស្នងការ ក៏បានដាក់ចេញនូវវិធានការនិងសំណូមពរសំខាន់ៗមួយចំនួនរួមមាន៖បន្តកិច្ចសហការពង្រឹងសន្តិសុខ សណ្តាប់ធ្នាប់សង្គមក្នុងមូលដ្ឋានឲ្យមានសុខ សុវត្ថិភាពល្អប្រសើរ ។ ត្រូវខិតខំអភិវឌ្ឍន៍មូលដ្ឋានដើម្បីឲ្យប្រជាពលរដ្ឋមានជីវភាពកាន់តែប្រសើរឡើង ស្របតាមទិសដៅរបស់រាជរដ្ឋាភិបាល ដែលកំពុងបង្កលក្ខណៈគ្រប់បែបយ៉ាងតាមបណ្តាមូលដ្ឋានទូទាំងខេត្ត។ត្រូវបង្កាទប់ស្កាត់និងជៀសវាងលើករណីគ្រោះថ្នាក់ចរាចរណ៍ដើម្បីជីវិតរស់នៅប្រកបដោយសុខដុមរមនានិងត្រូវចូលរួមបង្ការទប់ស្កាត់ការចរាចរណ៍ ជួញដូរគ្រឿងញៀនខុសច្បាប់ ហើយត្រូវអប់រំកូនចៅ ប្តីប្រពន្ធ ក្នុងគ្រួសារកុំឲ្យប្រើប្រាស់នូវសារធាតុញៀនទាំងនេះ បើមានករណីសង្ស័យត្រូវបញ្ជូនពួកគេមកប៉ុស្តិរដ្ឋបាលដើម្បីពិនិត្យវិនិច្ឆ័យ។ជម្រុញកូនចៅឬក្រុមគ្រួសារឲ្យទៅមណ្ឌលកែប្រែគ្រឿងញៀនមិនត្រូវទុកពួកគេឲ្យនៅរងគ្រោះដោយសារគ្រឿងញៀននេះទេ។
ក្រោយពីបញ្ចប់សំណេះសំណាល លោកស្នងការ ក៏បានភ្ជាប់មកជាមួយនូវនំចំណីក្មេងៗ ព្រមទាំងផ្តល់ថវិកាមួយចំនួនដល់ប្រជាពលរដ្ឋ សម្រាប់ជាមធ្យោបាយផងដែរ ៕
ណារិទ្ធ
