កំពត ៖ សពបុរសវ័យកណ្តាលម្នាក់ត្រូវគេប្រទះឃើញដេកស្លាប់ផ្កាប់មុខលើផ្លូវដែកកាលពីព្រឹកថ្ងៃច័ន្ទម្សិលមិញ ស្ថិតចំណុចផ្លូវរថភ្លើងក្បែរផ្លូវបំបែកច្រកចូលវត្តអណ្តូងព្រេង ក្នុងភូមិអូរតូច សង្កាត់អណ្តូងខ្មែរ ក្រុង-ខេត្តកំពត។សាកសពបុរសរងគ្រោះមានស្នាមរបួសដាច់ដៃឆ្វេងម្ខាងសង្ស័យត្រូវរថភ្លើងបុកបណ្តាលឲ្យស្លាប់តាំងពីពេលយប់មកម្លេះ។
បើតាមប្រជាពលរដ្ឋបានឲ្យដឹងថា ជនរងគ្រោះអាចស្លាប់ក្នុងចន្លោះម៉ោង៣ទៀបភឺ្ល ថ្ងៃទី១២ខែមិថុនា ឆ្នាំ២០១៧ ដោយសង្ស័យស្រវឹងស្រារហូតភ្លេចភ្លាំងស្មារតី ហើយទៅអង្គុយបត់ជើងលើផ្លូវដែក ចៃដន្យរថភ្លើងបើកមកមើលមិនឃើញទើបបុកស្លាប់បែបនេះតែម្តងទៅ។គេអះអាងបែបនេះព្រោះកាលពីយប់នោះមានរថភ្លើងបើកមកពីភ្នំពេញទៅកាន់ខេត្តព្រះសីហនុ លុះព្រឹកឡើងទើបមានគេប្រទះឃើញសព ហើយបង្កភាពភ្ញាក់ផ្អើលតែម្តង។
ចំពោះករណីខាងលើនេះត្រូវបានសមត្ថកិច្ចមូលដ្ឋានប្រាប់ឲ្យដឹងថា ជនរងគ្រោះមានឈ្មោះ កន សារឿន ភេទប្រុស អាយុ៤៧ឆ្នាំ ជាបុរសពោះម៉ាយ មានទីលំនៅក្បែរ ទីតាំងកើតហេតុខាងលើ ហើយការស្លាប់នេះសង្ស័យត្រូវរទេះភ្លើងបើកកិនកាលពីយប់មិញនេះ ព្រោះនៅក្បែរកន្លែងកើតហេតុមានលាមក ហើយបុរសរងគ្រោះពេលស្លាប់ក៏មិនទាន់បានលើកខោនៅឡើយផង។
ពាក់ព័ន្ធនឹងករណីដែលមានសោកនាដកម្មនៅលើផ្លូវដែកនេះ ពិតជារឿងមួយដែលបានកើតឡើងដោយចៃដន្យ ប៉ុន្តែកន្លងមកបែរជាធ្លាប់លេចឮមានករណីនេះកើតឡើងបន្តបន្ទាប់ផងដែរ។ដូច្នេះប្រជាពលរដ្ឋដែលមានលំនៅដ្ឋានក្បែរផ្លូវរថភ្លើងសូមបង្កាភាពប្រុងប្រយ័ត្នបំផុត ជៀសវាងកុំប្រថុុយប្រថានឬទៅអង្គុយលម្ហែនៅលើផ្លូវដែកនេះឲ្យសោះ ព្រោះរថភ្លើងគ្មានគន្លងផ្លូវណាអាចគេចពីយើងបានឡើយ។
បច្ចុប្បន្ន សពបុរសរងគ្រោះត្រូវបានសាច់ញាតិកំពុងចាត់ចែងធ្វើបុណ្យតាមប្រពៃណី៕ ណារិទ្ធ
