កំពត ៖ ស្ត្រីចំណាស់ម្នាក់បានស្លាប់ភ្លាមៗខណៈពេលដើរឆ្លងផ្លូវ ក៏ត្រូវម៉ូតូខ្នាតយក្សបោះពួយទៅបុកពីក្រោយយ៉ាងពេញទំហឹង កាលពីយប់ថ្ងៃទី១១ខែមិថុនា ឆ្នាំ២០១៧ វេលាម៉ោង២០និង១៥នាទីយប់ ស្ថិតលើកំណាត់ផ្លូវជាតិលេខ៣៣ត្រង់ចំណុចភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
តាមការអះអាងពីសាក្សីនៅកន្លែងកើតហេតុនិយាយថា មុនពេលជួបគ្រោះថ្នាក់ គេឃើញស្ត្រីរងគ្រោះដើរឆ្លងផ្លូវពីឆ្វេងមកស្តាំ ហើយធ្វើដំណើរតាមចិញ្ចើមផ្លូវពីកើតទៅលិច ចៃដន្យស្រាប់តែមានម៉ូតូខ្នាតធំមួយគ្រឿងបោះពួយក្នុងល្បឿនដូចព្យុះសង្ឃរាក្នុងទិសដៅស្របគ្នាពីកើតទៅលិច ក៏ជ្រុលទៅបុកស្ត្រីរងគ្រោះពីក្រោយយ៉ាពេញទំហឹង បណ្តាលឲ្យស្ត្រីរងគ្រោះបើុង ខ្ទាតជាច្រើនម៉ែត្រ ហើយស្ត្រីរងគ្រោះបានដាច់ខ្យល់ស្លាប់ភ្លាមៗនៅកន្លែងកើតហេតុក្នុងស្ថានភាពបាក់ដៃ បាក់ជើងយ៉ាងតំណំផងដែរ។សាក្សីដដែលបានបញ្ជាក់ថា ក្នុងហេតុការណ៍នេះអ្នកជិះម៉ូតូបង្កហេតុក៏រងរបួសដែរ ទើបប្រជាពលរដ្ឋរាយការណ៍ទៅសមត្ថកិច្ចក្នុងតំបន់មកអន្តរាគមន៍ដើម្បីបញ្ជូនអ្នករងរបួសទៅមន្ទីរពេទ្យ។
ដោយស្រង់សំដីពីប៉ូលិសចរាចរណ៍ដែលកំពុងវាស់វែងបានឲ្យដឹងថា ស្ត្រីរងគ្រោះដែលម៉ូតូបុកស្លាប់ខាងលើគឺជាស្ត្រីម៉េម៉ាយទីទ័លក្រ ឈ្មោះ ផូង ចេង ភេទស្រី អាយុ៥៥ឆ្នាំ មុខរបរកសិករ មានទីលំនៅភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។ដោយឡែកម៉ូតូបង្កហេតុជាប្រភេទម៉ូតូធំ ម៉ាកDuke ពាក់ស្លាកលេខ ភ្នំពេញ 1GJ-4462 បើកបរដោយឈ្មោះ សុខ ណូ ភេទប្រុស អាយុ២៤ឆ្នាំ មានទីលំនៅភូមិអូរថ្ម ឃុំពងទឹក ស្រុកដំណាក់ចង្អើរ ខេត្តកែប។
សពស្ត្រីរងគ្រោះត្រូវបានសាច់ញាតិដឹកទៅកាន់លំនៅដ្ឋានដើម្បីរៀបចំធ្វើបុណ្យតាមប្រពៃណី។ចំណែកអ្នកជិះម៉ូតូបង្កហេតុ ត្រូវបានគេដឹកទៅសង្គ្រោះនៅឯមន្ទីរពេទ្យបង្អែកស្រុកកំពង់ត្រាច។ចំពោះម៉ូតូដែលបង្កគ្រោះថ្នាក់នេះ សមត្ថកិច្ចក៏បាននាំយកទៅរក្សាទុកនៅក្នុងអធិការដ្ឋាននគរបាលស្រុក រង់ចាំភាគីទាំងសងខាងចូលខ្លួនមកដោះស្រាយគ្នាទៅតាមច្បាប់ចរាចរណ៍ផ្លូវគោក ៕
ណារិទ្ធ
