តំណាងអគ្គបណ្ឌិតសភាចារ្យអូន ព័ន្ធមុនីរ័ត្ន អំណរគុណពលរដ្ឋនៅឃុំធំ ស្រុកកៀនស្វាយ ដែលបានបោះឆ្នោតជូនគណបក្សប្រជាជនកម្ពុជា

(កណ្ដាល)៖ លោក កែវ សុខឃាង ប្រធានក្រុមការងារចុះជួយឃុំភូមិធំ ស្រុកកៀនស្វាយ តំណាងលោកអគ្គបណ្ឌិតសភាចារ្យ អូន ព័ន្ធមុនីរ័ត្ន សមាជិកអចិន្ត្រៃយ៍គណៈកម្មាធិការខេត្តកណ្តាលគណបក្សប្រជាជនកម្ពុជា និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តកណ្ដាល បានថ្លែងអំណរគុណប្រជាពលរដ្ឋនៅឃុំភូមិធំ ដែលបានបោះឆ្នោតគាំទ្រគណបក្សប្រជាជនកម្ពុជា ឈ្នះភ្លូកទឹក ភ្លូកដី ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ដែលទទួលបាន៨ អាសនៈលើ៩ អាសនៈ។

ដើម្បីជាការដឹងគុណ និងថ្លែងអំណរគុណដល់សមាជិក សមាជិកា ព្រមទាំងប្រជាពលរដ្ឋដែលបានបោះឆ្នោតជូនគណបក្សប្រជាជនកម្ពុជា លោក កែវ សុឃាង នៅថ្ងៃចុងសប្ដាហ៍នេះ បានដឹកនាំគណៈប្រតិភូអញ្ជើញចុះសួរសុខទុក្ខថ្លែងអំណរគុណដល់ប្រជាពលរដ្ឋនៅភូមិចំនួន៥ភូមិ នៅឃុំភូមិធំ ដែលបានសំណេះសំណាល និងឧបត្ថម្ភកញ្ចប់អាហារ និងភេសជ្ជៈសម្រាប់ជប់លៀងផងដែរ។

ស្ថិតនៅក្នុងឱកាសនៃជំនួបប្រជាពលរដ្ឋទាំង៥ភូមិនេះ លោក កែវ សុខឃាង បានលើកឡើងអំពីគុណបំណាច់ដ៏ធំធេងរបស់សម្ដេចតេជោហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា ដែលលោកបានខិតខំតស៊ូដឹកនាំប្រទេសជាតិពីផេះផង់ ឱ្យទទួលបាននូវការរីកចម្រើន សុខសន្តិភាពមានការអភិវឌ្ឍ មានសេដ្ឋកិច្ចរីកលូតលាស់ប្រជាពលរដ្ឋមានជីវភាពកាន់តែធូរធារឡើង ហើយនឹងបន្តអភិវឌ្ឍឱ្យកាន់តែរីកចម្រើនឡើងពីមួយថ្ងៃទៅមួយថ្ងៃ។

ជាមួយគ្នានេះដែរ លោកកែវ សុខឃាង ក៏បានលើកឡើងអំពីយុទ្ធសាស្ត្រចាក់ស្រោចវ៉ាក់សាំងបង្ការជំងឺកូវីដ១៩ ជូនដល់ប្រជាពលរដ្ឋមិនប្រកាន់និន្នាការនយោបាយអ្វីទាំងអស់ទូទាំងប្រទេស ដោយប្រជាពលរដ្ឋទទួលបានវ៉ាក់សាំងដែលគិតថ្លៃដោយសម្រេចបានជាង៩០% ទូទាំងប្រទេស ដែលនេះជាស្នាដៃដ៏អស្ចារ្យរបស់សម្ដេច ដែលបង្កើតភាពស៊ាំ នៅក្នុងសហគមន៍ធ្វើឱ្យកម្ពុជា រួចផុតពីគ្រោះទុកភ័យកូវីដ១៩ និងបានបើកឱ្យដំណើរការសេដ្ឋកិច្ចឡើងវិញ មានដំណើរការសេដ្ឋកិច្ចរីកចម្រើនឡើងដោយប្រជាពលរដ្ឋមានចំណូលកាន់តែច្រើនឡើងៗពីមួយថ្ងៃទៅមួយថ្ងៃ៕