លោកស្រីបណ្ឌិត ម៉ែន សំអន អបអរសាទរ ថ្ងៃបញ្ចប់នៃពិធីបិទយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ នៅតាមក្រុងស្រុកទាំង៨ ក្នុងខេត្តស្វាយរៀង ដែលមានសមាជិកចូលរួម ៣៣២២០នាក់

(ស្វាយរៀង)៖ លោកស្រីកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បានអញ្ជើញបិទយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ នៅស្នាក់ការគណបក្សឃុំស្វាយជ្រំ ខេត្តស្វាយរៀង នាព្រឹកថ្ងៃទី៣ ខែមិថុនា ឆ្នាំ២០២២។

ថ្ងៃបញ្ចប់នៃពិធីបិទយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិ ទី៥ ឆ្នាំ២០២២ នៅតាមបណ្តាក្រុង/ស្រុកទាំង៨ ក្នុងខេត្តស្វាយរៀង ដែលមានសមាជិកចូលរួម ៣៣,២២០នាក់ រថយន្ត ១,៨៣០គ្រឿង ម៉ូតូ១២,៨៤៧គ្រឿង មេក្រូ៣២០គ្រឿង ដោយចូលរួមពីលោក សៅ សុខា ទទួលដឹកនាំស្រុករមាសហែក, លោក ម៉ែន វិបុល ដឹកនាំក្នុងក្រុងស្វាយរៀង, លោក មឹង សំផន ដឹកនាំស្រុកចន្ទ្រា, លោក លោក លី ធុជ ដឹកនាំក្រុងបាវិត, លោកស្រី ភឿង សក្ខណា, លោក ម៉ក់ សារុន ដឹកនាំស្រុកស្វាយទាប, លោក ខ្វាន់ ស៊ាម ដឹកនាំនៅស្រុករំដួល និងលោក កឹង ឃន ដឹកនាំនៅស្រុកកំពង់រោទិ៍។

សម្រាប់យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ រយៈពេល១៤ថ្ងៃ ដែលបានចាប់ផ្តើមកាលពីថ្ងៃទី២១ ខែឧសភា ឆ្នាំ ២០២២ ត្រូវបិទបញ្ចប់នៅថ្ងៃទី០៣ ខែមិថុនា ឆ្នាំ២០២២នេះ ដោយជាទូទៅយុទ្ធនាការក្នុងរយៈពេលប៉ុន្មានថ្ងៃកន្លងទៅនេះបាន ប្រព្រឹត្តិទៅក្រោមបរិយាកាសល្អប្រសើរ គ្មានអំពើហិង្សាកើតឡើងឡើយ។

ក្នុងពិធីនេះផងដែរ លោកស្រីបណ្ឌិត បានផ្ដាំផ្ញើសួរសុខទុក្ខពីសំណាក់ថ្នាក់ដឹកនាំរបស់គណបក្សប្រជាជនកម្ពុជា ព្រមទាំងបានថ្លែងកោតសរសើរ ជូនចំពោះសកម្មជន អ្នកគាំទ្រ គណបក្សប្រជានកម្ពុជាទាំងអស់ ប្រជាពលរដ្ឋ កងកម្លាំងប្រដាប់អាវុធគ្រប់ប្រភេទ និងមន្ត្រី គ.ជ.ប ដែលបានសហការរួមគ្នាគោរពច្បាប់បោះឆ្នោត និងនីតិវិធីបោះឆ្នោតយ៉ាងពេញលេញប្រកបដោយកិត្តិយស និងសេចក្តីថ្លៃថ្នូរ ធានាបាននូវសន្តិសុខសណ្តាប់ធ្នាប់ ធ្វើឲ្យដំណើរការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២០ ប្រព្រឹត្តបានយ៉ាងរលូន នៅក្នុងខេត្តស្វាយរៀង។

លោកស្រីក៏បានអំពាវនាវឲ្យប្រជាពលរដ្ឋទាំងអស់គ្នា សូមអញ្ជើញទៅបោះឆ្នោតជូនគណបក្សប្រជាជនកម្ពុជា ដែលមានរូបទេវតាបាចផ្កា ជាសញ្ញាសំគាល់លើសន្លឹកឆ្នោតនៅតាមការិយាល័យបោះឆ្នោត ក្នុងមណ្ឌលបោះឆ្នោតនៅឃុំ សង្កាត់ ដោយយកភ្ជាប់ជាមួយខ្លួននូវអត្តសញ្ញាណប័ណ្ណសញ្ជាតិខ្មែរ ឬលិខិតបញ្ជាក់អត្ត សញ្ញាណ (ឯ.អ) ឱ្យបានគ្រប់ៗគ្នាកុំបីខាន។

សូមបញ្ជាក់ថា នៅខេត្តស្វាយរៀងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ មានចំនួន៩ គណបក្ស រួមមាន៖

*ទី១៖ គណបក្សប្រជាជនកម្ពុជា
*ទី២៖ គណបក្សភ្លើងទៀន
*ទី៣៖ គណបក្សហ៊្វុនស៊ិនប៉ិច
*ទី៤៖ គណបក្សខ្មែររួបរួមជាតិ
*ទី៥៖ គណបក្សសំបុកឃ្មុំសង្គមប្រជាធិបតេយ្យ
*ទី៦៖ គណបក្សប្រជាធិបតេយ្យមូលដ្ឋាន
*ទី៧៖ គណបក្សយុវជនកម្ពុជា
*ទី៨៖ គណបក្សកម្ពុជានិយម
*ទី៩៖ គណបក្សសញ្ជាតិកម្ពុជា។

ក្នុងនោះគណបក្សដែលបានឈរឈ្មោះជាបេក្ខជនក្រុមប្រឹក្សាឃុំសង្កាត់ មានបេក្ខជនឈរឈ្មោះច្រើនជាងគេក្នុងឃុំសង្កាត់ទាំង៨០ ឃុំ/សង្កាត់គឺ គណបក្សប្រជាជនកម្ពុជាបានឈរឈ្មោះបេក្ខជន ៨០ឃុំសង្កាត់, គណបក្សភ្លើងទៀនមានបេក្ខជនឈឈ្មោះ ៧៩ឃុំ/សង្កាត់៕