អភិបាលខេត្តកំពង់ស្ពឺ ប្រកាសផ្តល់រង្វាន់ម៉ូតូដល់សិស្សនិទ្ទេស A រាល់ការប្រឡងបាក់ឌុបនៅក្នុងខេត្ត

(កំពង់ស្ពឺ)៖ អភិបាលខេត្តកំពង់ស្ពឺ លោក វ៉ី សំណាង បានថ្លែងថា លោកបានត្រៀមម៉ូតូសម្រាប់ផ្តល់ឱ្យកូនក្មួយរូបណា ដែលបានប្រលងជាប់និទ្ទេសA នៅគ្រប់សម័យកាលក្នុងក្របខណ្ឌខេត្តកំពង់ស្ពឺ ដើម្បីជាការលើកទឹកចិត្តកូនក្មួយដែលបានខិតខំរៀនសូត្រ។ លោកថា លោកមិនខ្លាចនឹងផ្តល់ឱ្យនោះទេ ទោះបីកូនក្មួយប្រលងជាប់និទ្ទេសA ច្រើនប៉ុណ្ណាក៏ដោយ ប៉ុន្តែអ្វីដែលធ្វើឱ្យលោកខ្លាច គឺកូនក្មួយមិនខិតខំរៀនសូត្រហើយប្រលងយកនិទ្ទេសA មិនបាន។

ថ្លែងនៅថ្ងៃទី១ ខែមិថុនា ឆ្នាំ២០២២ ក្នុងពិធីប្រារព្ធទិវាកុមារអន្តរជាតិខួបលើកទី៧៣ នាសាលប្រជុំបណ្ណាល័យ អភិបាលខេត្តកំពង់ស្ពឺ បានលើកឡើងថា ការប្រឡងជាប់និទ្ទេសA បានច្រើន វាបានផ្ដល់នូវមហាកិត្តិយសសម្រាប់ខ្លួនឯង សម្រាប់សង្គមគ្រួសារ និងនាំកិត្តិយសសម្រាប់ខេត្តកំពង់ស្ពឺទាំងមូល ព្រមទាំងបានចូលរួមអភិវឌ្ឍន៍ផ្នែកសិក្សាអប់រំដល់មនុស្សជំនាន់ថ្មីបន្តទៀតផងដែរ។

លោកបន្តថា ទន្ទឹមនឹងការខិតខំប្រឹងប្រែងរៀនសូត្រនេះដែរ វាក៏បានបង្ហាញពីឈាមជ័រអ្នកខេត្តកំពង់ស្ពឺ ដែលជាខេត្តអ្នកប្រាជ្ញ និងអ្នកឧស្សាហ៍ព្យាយាម។ មិនតែប៉ុណ្ណោះ ក៏បានបង្ហាញឱ្យខេត្តដទៃឃើញថា កំពង់ស្ពឺមិនមែនជាប៊ុមប៊ឺរលាក់កងជើង ដែលគេគ្រប់គ្នាតែងតែហៅនោះទេ ហើយក៏មិនមែនជាខេត្តមានប្រជាពលរដ្ឋខ្ជិលច្រអូសនោះដែរ។

ជាមួយនោះ លោក វ៉ី សំណាង បានធ្វើការក្រើនរំលឹកដល់អាណាព្យាបាលទាំងអស់ ចូលរួមជំរុញកូនៗបានចូលសិក្សាឱ្យបានគ្រប់ៗគ្នា ដើម្បីក្លាយជាសសរទ្រូងដ៏រឹងមាំសម្រាប់ទ្រទ្រង់ប្រទេសជាតិ និងធ្វើជាទំពាំងស្នងឬស្សីសម្រាប់ដឹកនាំប្រទេសជាតិតពីថ្នាក់ដឹកនាំ៕