ខេត្តបន្ទាយមានជ័យ ប្រគល់វិញ្ញាបនបត្រសម្គាល់ម្ចាស់អចលនវត្ថុលើការចុះបញ្ជីដីធ្លីមានលក្ខណៈជាប្រព័ន្ធ ក្នុងភូមិ១និងភូមិចក ដែលមាន ៣,២៥៤ក្បាលដី

(បន្ទាយមានជ័យ)៖ លោក អាង ណារិទ្ធ ប្រធានមន្ទីររៀបចំដែនដី នគររូបនីយកម្ម សំណង់ និងសូរិយោដី ខេត្តបន្ទាយមានជ័យ បានថ្លែងនៅព្រឹក ថ្ងៃទី២៣ ខែឧសភា ឆ្នាំ២០២២នេះថា ប្រជាពលរដ្ឋរស់នៅក្នុងភូមិ ១ និងភូមិចក ជាម្ចាស់សម្គាល់អចលនវត្ថុ ឬ ប័ណ្ណកម្មសិទ្ធិ លើកាចុះបញ្ជីដីធ្លីមានលក្ខណៈជាប្រព័ន្ធ ដែលមានក្បាលដី ចំនួន ៣,២៥៤ក្បាលដី ត្រូវរូតរះមកទទួលយកវិញ្ញាបនបត្រសម្គាល់ម្ចាស់អចលនវត្ថុ ឬប័ណ្ណកម្មសិទ្ធិនេះ នៅក្នុងវត្តស្វាយចាស់ ស្ថិតក្នុងភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ពីលោក អ៊ុ រាត្រី អភិបាលខេត្តបន្ទាយមានជ័យ ចាប់ពីថ្ងៃទី២៣ ខែឧសភា ដល់ថ្ងៃទី២៧ ខែឧសភា ឆ្នាំ ២០២២។

លោកបន្តថា ប្រសិនប្រជាពលរដ្ឋណា ពុំទាន់មានពេលវេលាមកទទួលយក ផុតកំណត់ សូមធ្វើការទំនាក់នំនង មកមន្ទីរដែនដី នគររូបនីយកម្ម សំណង់ និងសូរិយោដី ខេត្តបន្ទាយមានជ័យ ស្ថិតក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ដើម្បីមកយកប័ណ្ណកម្មសិទ្ធិនេះ។

លោក អាង ណារិទ្ធ បានបញ្ជាក់ឲ្យដឹងបន្តទៀតថា ពិធីប្រគល់វិញ្ញាបនបត្រសម្គាល់ម្ចាស់អចលនវត្ថុ ឬប័ណ្ណកម្មសិទ្ធិ លើការចុះបញ្ជីដីធ្លីមានលក្ខណៈជាប្រព័ន្ធ ក្នុងភូមិ១និងភូមិចក មាន៥ដំណាក់កាលនិង ៥យ៉ាង ទើបអាចចេញប្លង់រឹងឲ្យបាន រួមមាន៖

១៖ ត្រៀមរៀបចំគឺជាការកំណត់ធ្វើការវិនិច្ឆ័យការបង្កើតគណៈកម្មាធិការរដ្ឋបាល ជូនដំណឹងកិច្ចប្រជុំនឹងដំណើរការផ្សព្វផ្សាយពីការចុះបញ្ជីដីធ្លីមានលក្ខណៈប្រព័ន្ធ
២៖ ប្រតិបត្តិការបច្ចេកទេសចុះវាស់វែង និងធ្វើការវិនិច្ឆ័យ ដើម្បីកសាងប្លង់សុរិយោដី និងបញ្ជីឈ្មោះម្ចាស់ដី។
៣៖ បិទផ្សាយជាសាធារណៈនូវឯកសារនៃការវិនិច្ឆ័យប្លង់សុរិយោដី និងបញ្ជីឈ្មោះម្ចាស់ដី ដែលមានរយៈពេល១៥ ថ្ងៃ ដើម្បីទុកលទ្ធភាពឲ្យម្ចាស់ដី និងអ្នកដែលពាក់ព័ន្ធធ្វើការផ្ទៀងផ្ទាត់ ឈ្មោះនិង ស្ថានភាពគ្រួសារ និងក្បាលដីរបស់ខ្លួន ព្រមទាំងធ្វើការតវ៉ាក្នុងករណីមានដំណីរការ
ខុសឆ្គង។ ផុតរយៈពេលកំណត់នៃការបោះផ្សាយ ប្រជាពលរដ្ឋមិនអាចជំទាស់បន្តបានទៀតឡើយ។ សូមបញ្ជាក់ផងដែរថា ពេលកំពុងប្រារព្ធធ្វើពិធីបិទផ្សាយនូវឯកសារនៃការវិនិច្ឆ័យមានរយៈពេល ១៥ថ្ងៃនេះ ទុកឲ្យបងប្អូនពិនិត្យនិងតែតម្រូវ។
៤៖ សម្រេចលើឯកសារវិនិច្ឆ័យបាយរការណ៍ ពីលទ្ធផលនៃការបិទផ្សារជាសាធារណៈនូវឯកសារនៃការវិនិច្ឆ័យរបស់គណៈកម្មាធិការរដ្ឋបាល ជូនអភិបាលខេត្ត ដើម្បីពិនិត្យនិងសម្រេចលើការផ្ដល់សិទ្ធិចំពោះក្បាលដីណាដែលមិនទាន់មានទំនាស់
៥៖ ចុះបញ្ជីចេញប័ណ្ណ និងចែកប័ណ្ណជូនម្ចាស់ដីបានហើយ។

លោក អាង ណារិទ្ធ បានបញ្ជាក់ឲ្យដឹងបន្តទៀតថា ប្រជាពលរដ្ឋរស់នៅភូមិ១ និងភូមិចកមានក្បាលដីសរុបមានចំនួន ៣,២៥៤ក្បាលដី ក្នុងនោះភូមិ១ក្បាដី ១,៨១០ក្បាលដី និងភូមិចកមានក្បាលដី ១,៤៤៤ក្បាលដី។ ក្នុងនោះមានដីលំនៅដ្ឋាន ដីកសិកម្ម ដីអាងទឹក ដីវត្ត ដីទំនាស់ និងដីគ្មានទិន្នន័យ។

លោក អ៊ុ រាត្រី បានថ្លែងថា ប័ណ្ណកម្មសិទ្ធិនេះវាមានប្រយោជន៍ណាស់សំរាប់ម្ចាស់ដីធានានូវសិទ្ធិស្របច្បាប់ជាម្ចាស់កាន់ដីធ្លី និងអាចស្នើសុំលិខិតអនុញ្ញាតសាងសង់ធ្វើការអភិវឌ្ឍដី និងបើកអាជីវកម្មបាន។ ប័ណ្ណកម្មសិទ្ធិនេះ អាចយកទៅប្រើប្រាស់ជារបស់បញ្ចាំនៅធនាគារខ្ចីប្រាក់ ដើម្បីពង្រីកមុខរបរ ឬអាជីវកម្មបន្ថែមទៀតបានមានប័ណ្ណកម្មសិទ្ធិនេះក៏អាចកាត់បន្ថយជម្លោះដីធ្លីបានដែរ ព្រោះប័ណ្ណកម្មសិទ្ធិនេះជាឯកសារសំអាងនៅពេលមានជម្លោះដីធ្លី ប័ណ្ណកម្មសិទ្ធិនេះ វាងាយស្រួលចំពោះការផ្ទេរអចលនវត្ថុ ដើម្បីធានានូវសិទ្ធិស្របច្បាប់រាល់ការផ្លាស់ប្ដូរ និងផ្ទេរសិទ្ធិត្រូវធ្វើការចុះបញ្ជីបន្តនៅការិយាល័យរៀបចំដែនដីនគររូបនីយកម្មនិងសំណង់និងភូមិបាល ស្រុក ក្រុងជាដើម៕