បទល្មើសដឹកជញ្ជួនធ្យូងឆ្លងដែនចេញទៅលក់នៅប្រទេសវៀតណាមតាមច្រក អូតាលាវ នៅក្នុងទឹកដីភូមិស្រែចារ.ឃុំស្រែចារ ស្រុកស្នួល ខេត្តក្រចេះ កំពុងកើតមានឡើងយ៉ាងពេញបន្ទុក:
ខេត្តក្រចេះ : សកម្មភាពដឹកជញ្ជូនធ្យូងខុសច្បាប់កំពុងបានសំរុកដឹកចេញទាំងយប់ទាំងថ្ងៃចេញយកទៅលក់នៅប្រទេសវៀតណាមតាមច្រកការពារព្រំដែន អូតាលាវ យ៉ាងអនាធិបតេយ្យ ខណៈមន្រ្តីជំនាញពាក់ព័ន្ធប្រចាំការនៅច្រក ខាងលើនេះបានអះអាងថា ខ្លួនមិនបានដឹង និងមិនដែលឃើញនោះទេ។ តែតាមប្រភពច្បាស់ការពីមហាជនដែលរស់នៅតាមដងផ្លូវចូលច្រកអូតាលាវបានបញ្ជាក់ប្រាប់ ភ្នាក់ងារយកព័ត៌មានយើងខ្ញុំដឹងថា ការដឹកជញ្ជូននេះមានរៀងរាល់យប់ថ្ងៃ ហើយពិតជាមានការឃុបឃិតគ្នាជាប្រព័ន្ធ ទើបក្រុមឈ្មួញអាចដឹកធ្យូងចេញ ទៅលក់នៅប្រទេសវៀតណាមបានដោយរលូនបែបនេះ ។
ប្រភពព័ត៌មានពីប្រជាពលរដ្ឋបានឲ្យដឹងថា សកម្មភាពនេះគឺបានកើតមានជិត ១ ខែមកហើយដោយក្រុមឈ្មួញទាំងនោះបានប្រើប្រាស់ រថយន្ត កូរ៉េ រថយន្តសាំយ៉ុងកែឆ្នៃ ដឹកធ្យូងមិនក្រោមពី ១៥គ្រឿងទៅ ២០គ្រឿងនោះទេ ដឹកជញ្ជូនទាំងយប់ទាំងថ្ងៃ ហើយមិនដែលឃើញ សមត្ថកិច្ចការពារព្រំដែន នឹងសមត្ថកិច្ចពាក់ព័ន្ធ ឬជំនាញរដ្ឋបាលព្រៃឈើបានចាត់វិធានការច្បាប់ទប់ស្កាត់នឹងបង្ក្រាបបានម្តងណាសោះឡើយ ។ លោក ខៀវ ប៉ូលីន ជាប្រធានប៉ុស្តិ៍ ប្រចាំច្រកការពារព្រំដែន អូតាលាវ និងមន្រ្តីពាក់ព័ន្ធជាច្រើទៀត កំពុងបើកដៃឳ្យក្រុមឈ្មួញដឹកធ្យូងចេញទៅលក់នៅប្រទេសវៀតណាមយ៉ាងសកម្មសព្វថ្ងៃនេះ ។ ការមិនបង្ក្រាបនេះ ត្រូវបានក្រុមអ្នកដឹកធ្យូងទាំងនោះអះអាងថា បានបង់លុយឲ្យសមត្ថកិច្ចប្រចាំការនៅច្រកខាងលើនេះ គ្រប់កន្លែងនិងស្ថាប័ណទាំងអស់ហើយ បូកទាំងជំនាញ រដ្ឋបាលព្រៃឈើថែមទៀតផង ។
