គណបក្សប្រជាជនកម្ពុជា ធ្វេីដំណេីរឆ្ពោះទៅមុខឥតងាករេ បន្តបង្កេីនពង្រីកសមិទ្ធផលនានាគ្រប់ទីកន្លែង
ខេត្តបន្ទាយមានជ័យ៖ ឯកឧត្តម បោន ប៊ិន អនុប្រធានក្រុមការងារចុះមូលដា្ឋនស្រុកមង្គលបូរី ប្រធានក្រុមការងារចុះមូលដា្ឋនឃុំចំណោម បានអញ្ជេីញចូលរួមដង្ហែរក្បួនបេីកយុទ្ធនាការឃោសនាបោះឆ្នោតជ្រេីសរេីស ក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ដោយមានការចូលរួមពីលោកប្រធាន-អនុប្រធាន និងសមាជិក-សមាជិកាក្រុមការងារចុះមូលដា្ឋន ភូមិទាំង១៨ ក្នុងឃុំចំណោម ស្រុកមង្គលបូរី ប្រមាណជាង៦៥៣នាក់ដែលធ្វេីឡេីងនៅព្រឹកថ្ងៃទី២១ ខែឧសភា ឆ្នាំ២០២២នេះ។
ថ្លែងក្នុងពិធីបេីកយុទ្ធនាការឃោសនាបោះឆ្នោតជ្រេីសរេីស ក្រុមប្រឹក្សាឃុំ-សង្កាត់ អាណត្តិទី៥នេះ ឯកឧត្តម បោន ប៊ិន បានមានប្រសាសន៍ថា សន្តិភាព ស្ថិរភាព និងរាល់សមិទ្ធផលដែលយើងសម្រេចបាននាពេលបច្ចុប្បន្ននេះ គឺបានមកពីការយកអាយុជីវិតធ្វើជាដើមទុន របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ព្រមទាំងបានធ្វើពលីកម្មដ៏ធំធេង និងមានការចូលរួមមិនអាចកាត់ថ្លៃបានរបស់បងប្អូនយុទ្ធជន យុទ្ធនារី ជនរួមជាតិយើងរាប់លាននាក់ដើម្បីជាតិ មាតុភូមិ ។
ឯកឧត្តមបានបញ្ជាក់ទៀតថា ជោគជ័យនៃការអនុវត្តនយោបាយឈ្នះឈ្នះរបស់ សម្ដេចអគ្គមហាសេនាបតី តេជោ ហ៊ុន សែន ប្រធានគណបក្សប្រជាជនកម្ពុជា បានធ្វើឱ្យពួកប្រល័យពូជសាសន៍ ប៉ុល ពត ត្រូវបានដួលរលំទាំងស្រុង ទាំងអង្គការចាត់តាំងនយោបាយ ទាំងអង្គការចាត់តាំងយោធា ធ្វើឲ្យប្រទេសជាតិទាំងមូលទទួលបាននូវសន្តិភាពពេញលេញ មានឯកភាពជាតិទាំងស្រុងចាប់តាំងពីចុងឆ្នាំ១៩៩៨មក ។
ឯកឧត្តម បោន ប៊ិន បានអំពាវនាវដល់ពលរដ្ឋទាំងអស់បន្តខិតខំការពារថែរក្សាសន្តិភាព និងសមិទ្ធផលដ៏ថ្លៃថ្លាដែលបានមកដោយលំបាក ក្រោមការដឹកនាំរបស់គណបក្សប្រជាជនកម្ពុជា ឱ្យបានគង់វង្សជារៀងរហូត ដោយមិនអនុញ្ញាតឱ្យមជ្ឈដ្ឋានណាមួយមកបំផ្លាញទៅវិញបានឡើយ ។
ឯកឧត្តម បានបន្តអំពាវនាវដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោត សូមទៅចូលរួមបោះឆ្នោតជ្រេីសរេីស ក្រុមប្រឹក្សាឃុំ-សង្កាត់ អាណត្តិទី៥ ឱ្យបានគ្រប់ៗគ្នា ពិសេសបន្តឆ្ពោះទៅចូលរួមបោះឆ្នោតជ្រើសរើសតំណាងរាស្រ្តនៅឆ្នាំ២០២៣នាពេលខាងមុខផងដែរ ។
