កែប ៖ ជាទូទៅគ្រោះថ្នាក់ចរាចរណ៍ពេលកើតឡើងគឺមិនអាចបន្ទោសមកលើភាគីណាមួយឡើយ សំខាន់ពេលធ្វើដំណើរត្រូវចេះ យោគយល់អធ្យាស្រ័យរវាងគ្នានិងគ្នា។យ៉ាងណាមិញគ្រោះថ្នាក់ចរាចរណ៍ដែលតែងតែកើតឡើងរាប់ពាន់ មឺុន ករណីគឺសុទ្ធតែបានផ្តើមដោយសារកក្តាមនុស្សទាំងអស់ ម្លោះហើយបើទោះជាការប្រើប្រាស់យានយន្ត ល្អឬទំនើបបែបណាក៏មិនអាចគេចផុតនឹងគ្រោះថ្នាក់បានដែរ ដរាបណាយើងមានការធ្វេសប្រហែសតែមួយប៉ព្រឹចភ្នែកនោះ។
ចំពោះគ្រោះថ្នាក់ចរាចរណ៍កាលពីរសៀល ថ្ងៃទី១៤ខែឧសភា ឆ្នាំ២០១៧រវាងម៉ូតូរបស់ជនបរទេស ម៉ាកAIRBLADEនិងម៉ូតូម៉ាកHONDA C125នោះក៏ត្រូវបានមជ្ឈដ្ឋានជាច្រើនលើកឡើងថា គឺជាការធ្វេសប្រហែសរបស់អ្នកបើកបរជនជាតិអង្គគ្លេសម្នាក់ដែលបើកក្នុងល្បឿនលើសកំណត់ក្នុងទិសដៅពីកើតទៅលិច ទើបជ្រុលទៅបុកអ្នកដំណើរម៉ូតូនៅខាងមុខបណ្តាលឲ្យរងរបួសធ្ងន់ខ្លួនឯង។
បើយោងតាមប្រភពពីសមត្ថកិច្ចបានឲ្យដឹងថា កាលពីវេលាដូចខាងលើនៅចំណុចខាងកើតផ្សារដំណាក់ចង្អើរប្រហែល៣០០ម៉ែត្រ ស្ថិតក្នុងភូមិដំណាក់ចង្អើរ សង្កាត់ព្រៃធំ ក្រុងកែប មានគ្រោះថ្នាក់ចរាចរណ៍មួយកើតឡើង ដោយសារតែជនជាតិអង្គគ្លេស ឈ្មោះ WILLIAM BUBAGE ភេទប្រុស អាយុ២៣ឆ្នាំ ជាអ្នកទេសចរណ៍ ស្នាក់នៅខេត្តកំពត បានជិះម៉ូតូម៉ាកAIRBLADEទៅបុកម៉ូតូមួយគ្រឿងនៅខាងមុខយ៉ាងកំរោលបួនជ្រុងបណ្តាលឲ្យរបួសធ្ងន់ខ្លួនឯង។ចំណែកភាគីបើកម៉ូតូម៉ាC125ពណ៌ខ្មៅនៅខាងមុខ ឈ្មោះ សុីវ ទូច ភេទប្រុស អាយុ៤៣ឆ្នាំ បានរងរបួសស្រាលនិងមានអ្នករួមដំណើរម្នាក់ទៀតឈ្មោះ សីុវ ពិទូ ភេទប្រុស អាយុ២២ឆ្នាំរបួសស្រាល ដោយគាត់រស់នៅក្នុងភូមិ-ឃុំចំរុង ស្រុកព្រៃនប់ ខេត្តព្រះសីហនុ មានមុខងារជានគរបាល។
ដោយឡែក ម៉ូតូទាំង២គ្រឿងដែលមានស្លាកលេខ ភ្នំពេញ 1IY-2182របស់ជនបរទេសនិង ព្រះសីហនុ 1D-5502ត្រូវបាននគរបាលចរាចរណ៍នាំទៅដោះស្រាយនៅក្នុងអធិការដ្ឋាននគរបាលក្រុងកែប។រីឯជនបរទេសដែលរបួសធ្ងន់ត្រូវបានរថយន្តឯកជនដឹកទៅសង្គ្រោះព្យាបាលនៅឯមន្ទីរពេទ្យបង្អែកខេត្តកំពតភ្លាមៗផងដែរ៕
ណារិទ្ធ
