កែប ៖ ប្រជាពលរដ្ឋក្រីក្រចំនួន២០៩គ្រួសារ ក្នុងនោះមានចាស់ជរាផងដែរ ត្រូវបានទទួលអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈសាខាកាកបាទក្រហមកម្ពុជាខេត្តកែប។
ពិធីផ្តល់អំណោយនេះបានធ្វើឡើងនៅក្នុងបរិវេណវត្តបុទុមសាគរ(វត្តអង្កោល)ស្ថិតក្នុងភូមអង្កោល ឃុំអង្កោល ស្រុកដំណាក់ចង្អើរ ខេត្តកែប នារសៀលថ្ងៃទី១៥ខែឧសភា ឆ្នាំ២០១៧ ក្រោមការចូលរួមពីសំណាក់ លោកកែន សត្ថា អភិបាលខេត្ត និងជាប្រធានគណៈកម្មាធិការកាកបាទក្រហមកម្ពុជាខេត្តកែប ព្រមទាំងអស់លោកជាថ្នាក់ដឹកនាំនៃមន្ទីរ ស្ថាប័នគ្រប់ជំនាញ និងក្រុមការងារកាកបាទក្រហមគ្រប់ជាន់ថ្នាក់ រួមទាំងអាជ្ញាធរក្នុងតំបន់ផងដែរ។
ដែលត្រូវចែកជូនដល់ប្រជាពលរដ្ឋក្រីក្រក្នុងរសៀលនេះគឺមួយគ្រួសារទទួលបានមីខ្លាឃ្មុំក្រហម១កេះធំ អង្ករ១បាវ(២០គក្រ)និងថវិការ១០០០០រៀល។ហើយអំណោយចែកជូនប្រជាពលរដ្ឋក្រីក្រទាំង២០៩គ្រួសារខាងលើបើសរុបជាថវិកាអស់ចំនួន១៦៣០២០០០រៀល។
ក្នុងឱកាសនោះ លោកកែន សត្ថា ប្រធានគណៈកម្មាធិការកាកបាទក្រហមខេត្ត បានឲ្យដឹងថា អំណោយដែលផ្តល់ជូនប្រជាពលរដ្ឋទាំង២០៩គ្រួសារនេះ គឺជាអំណោយដ៏ថ្លៃថ្លា របស់សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលផ្តល់ជូនតាមរយៈសាខាកាកបាទក្រហមខេត្តកែប ។
លោកបានបញ្ជាក់ទៀតថា កាកបាទក្រហមគឺមានតួនាទីដ៏សំខាន់ក្នុងការជួយរំលែកទុក្ខលំបាកដល់ជនរងគ្រោះនិងជនងាយរងគ្រោះគ្រប់ប្រភេទ ដូចជាគ្រោះទឹកជំនន់ គ្រោះរាំងស្ងួត ខ្យល់ព្យុះ-កន្ទ្រាក់ ចាស់ជរា ពិកា ស្ត្រីម៉េម៉ាយគ្មានទីពឹង អ្នកជំងឺអេដស៍ ភ្លើងឆេះផ្ទះក៏ដូចជាគ្រោះធម្មជាតិផ្សេងៗ ។ល។ គឺកាកបាទក្រហមមានភារកិច្ចរ៉ាប់រងទាំងអស់ ។
លោកបានក្រើនរំលឹកថា ដោយសារឆ្នាំនេះមានគ្រោះមហន្តរាយពីធម្មជាតិកើតឡើងញឹកញាប់និងផ្ទួនៗ ដូច្នេះសូមបងប្អូនបង្កើនការប្រុងប្រយ័ត្នឲ្យបានខ្ពស់បំផុត ពិសេសមេឃកំពុងភ្លៀងសូមកុំឲ្យកូនចៅដើរចេញពីផ្ទះ។ហើយក៏សូមដាស់តឿនដល់ប្រជាពលរដ្ឋទាំងអស់ត្រូវជៀសឲ្យឆ្ងាយពីគ្រឿងញៀន។
សូមបញ្ជាក់ថា ការផ្តល់ជូនអំណោយសង្គ្រោះរបស់កាកបាទក្រហមនេះ គឺរាប់តែតួលេខគ្រួសារក្រីក្រជំពូក១និងជំពូក២ចំនួន២០៩គ្រួសារ ដែលស្ថិតក្នុងភូមិអង្កោល ឃុំអង្កោល នៃស្រុកដំណាក់ចង្អើរ តែប៉ុណ្ណោះ ៕
ណារិទ្ធ
