ខេត្តសៀមរាប ៖ ថៅកែសណ្ឋាគារ លំដាប់ផ្កាយ៥ ឈ្មោះ ANGKOR ERA ដែលមានទីតាំង នៅតាមបណ្តោយផ្លូវជាតិលេខ៦ ក្នុងភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប បានពង្រីកបន្ថែមមុខរបរខុសច្បាប់មួយទៀត គឺរកស៊ីជួញដូរឈើប្រណិត យ៉ាងសម្បើមអស្ចារ្យ ដោយគ្មានអាជ្ញាធរមានសមត្ថកិច្ច ណាហ៊ាន រារាំងមុខរបរនេះឡើយ។
ប្រភពបានឲ្យដឹងថា សព្វថ្ងៃឈើប្រណីត រាប់ពាន់ម៉ែត្រគូប មានប្រភេទ ធ្នង់ នាងនួន បេង ពិសេស គ្រញូង កំពុងត្រូវបានរក្សា និងស្តុកទុក នៅផ្នែកខាងក្នុងបរិវេណអូតែល យ៉ាងច្រើនសន្ធឹកសន្ធាប់ ហើយមួយថ្ងៃៗគេឃើញ មានរថយន្តដឹកឈើប្រណិត ប្រភេទសាំយ៉ុង នីសាន់ និងកូរ៉េ មួយតោនកន្លះ ដឹកឈើចូលដូចហែកឋិន។ តាមប្រភពព័ត៌មាន ពីឈ្មួញរកស៊ីប្រចាំខេត្តសៀមរាប បានអោយដឹងថា សព្វថ្ងៃឈើរបស់គេ បានលក់ទៅអោយ ថៅកែសណ្ឋាគារអេរ៉ា មានចំនួនរាប់សិប ម៉ែត្រគូប ហើយជាក់ស្តែង ឈើនៅសល់ជាច្រើន ម៉ែត្រគូបទៀត ដែលនៅជំពាក់ តែគេមិនខ្វល់ទេ។
យើងកត់សំគាល់មើល ពីមួយថ្ងៃទៅមួយថ្ងៃៗ គេឃើញសមត្ថកិច្ចគ្រប់ជាន់ថ្នាក់ មានតាំងពីខាងមេព្រៃ ប៉ូលីសសេដ្ឋកិច្ច ប៉េអឹមខេត្ត ប៉េអឹមផ្ទៃប្រទេស ដែលទាំងអស់នោះ សុទ្ធសឹងជាអ្នកទទួលបន្ទុក ង្ក្រាបបទល្មើសពិសេសមន្ត្រីសាលាខេត្ត ចូលទៅហាត់ប្រាណ ឬស្ទីមនៅក្នុងសណ្ឋាគារអេរ៉ា ហេតុអ្វីបានជាមិនដឹងថា នៅក្នុងសណ្ឋាគារ មានការជួញដូរឈើប្រណីត នេះ ៕
