កំពត ៖ ជនសង្ស័យ២នាក់ដែលជាប់ទាក់ទិននឹងបទល្មើសគ្រឿងញៀន ត្រូវបានកំលាំងការិយាល័យប្រឆាំងគ្រឿងញៀនខេត្តកំពត សហការជាមួយសមត្ថកិច្ចនៃអធិការដ្ឋាននគរបាលស្រុកកំពង់ត្រាចបង្ក្រាបបានកាលពីវេលាម៉ោង១២ថ្ងៃត្រង់ ថ្ងៃទី០២ខែឧសភា ឆ្នាំ២០១៧ខណៈពួកគេគ្រោងនាំយកសារធាតុញៀនចែកចាយក្នុងតំបន់នោះ។
ពាក់ព័ន្ធនឹងករណីខាងលើ លោកវរសេនីយ៍ឯក ទូច ឌន នាយការិយាល័យប្រឆាំងបទល្មើសគ្រឿងញៀននៃស្នងការនគរបាលខេត្តកំពត បានប្រាប់ឲ្យដឹងថា ជនសង្ស័យទាំង២នាក់ត្រូវសមត្ថកិច្ចឃាត់ខ្លួននៅចំណុចភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ។ លោកបានបញ្ជាក់ថា ជនសង្ស័យទាំង២នាក់បន្ទាប់ពីឃាត់ខ្លួនក៏ត្រូវបញ្ជូនមកសាកសួរនៅការិយាល័យប្រឆាំងគ្រឿងញៀន ដើម្បីធ្វើសំណុំបែបបទបញ្ជូនទៅតុលាការ។លោកបានបង្ហើបទៀតថា ជនសង្ស័យដែលឃាត់ខ្លួនរួមមាន៖1.ឈ្មោះ អ៊ូយ សុផល ភេទប្រុស អាយុ៣៣ឆ្នាំ 2.ឈ្មោះ អ៊ុច ដន ភេទប្រុស អាយុ៣២ឆ្នាំ ទាំង២នាក់រស់នៅក្នុង ភូមិ ឃុំ ដែលបានឃាត់ខ្លួនខាងលើ។
ក្រោយពីសាកសួរសមត្ថកិច្ចនៃការិយាល័យប្រឆាំងបទល្មើសគ្រឿងញៀនក៏បានបំពេញបែបបទដើម្បីបញ្ជូនជនសង្ស័យទាំង២នាក់ខាងលើទៅសាលាដំបូងខេត្តកំពតចាត់ការតាមផ្លូវច្បាប់។
គួររំឭកថា រយៈកាលប៉ុន្មានខែនេះគេកត់សម្គាល់ឃើញ ការបង្ក្រាបបទល្មើសគ្រឿងញៀននៅទូទាំងប្រទសពិសេសក្នុងអាណាចក្រខេត្តកំពតពិតជាមានភាពក្តៅគគុកនិងបានទទួលលទ្ធផលយ៉ាងប្រសើរ ដែលធ្វើឲ្យមហាជនមានការកោតសរសើរពីសមត្ថភាពរបស់សមត្ថកិច្ចដែលបានខិតខំបំពេញការតព្វកិច្ចបានល្អប្រសើរក្នុងការទប់ស្កាត់បទល្មើសគ្រប់រូបភាព ដើម្បីធានាការរស់នៅរបស់ប្រជាពលរដ្ឋនៅគ្រប់តំបន់៕
ណារិទ្ធ
