កែប ៖ ក្លឹបទូកក្តោងដំបូងបង្អស់ដែលទទួលស្គាល់ពីសហព័ន្ធកីឡាទូកក្តោងកម្ពុជាដែលមានឈ្មោះថា ក្លឹបទូកក្តោងកែប(Kept Sailing)នោះ ត្រូវបានសម្ពោធដាក់ឲ្យប្រើប្រាស់ជាផ្លូវការកាលពីរសៀលថ្ងៃទី២៣ ខែមេសា ឆ្នាំ២០១៧ក្រោមវត្តមានដ៏ខ្ពង់ខ្ពស់ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការជាតិអូឡាំពិកកម្ពុជា និងឯកឧត្តម កែន សត្ថា អភិបាលខេត្តកែប។
ក្លឹបនេះក៏បានចូលជាសមាជិកពេញសិទ្ធិរបស់សហព័ន្ធកីឡាទូកក្តោងកម្ពុជានៅថ្ងៃទី២៣ខែមេសាឆ្នាំ២០១៧ ហើយក្លឹបក៏បានទិញនូវឧបករណ៍ទូកក្តោងថ្មីដូចជា៖ Optimist ,Hobie Wave, Hobie 16 និងT2 Sailing Boat សម្រាប់បម្រើដល់វិស័យកីឡាទូកក្តោងនៅកម្ពុជាដែលកំពុងធ្វើការអភិវឌ្ឍន៍ និងទទួលបានការគាំទ្រពីសំណាក់ភ្ញៀវជាតិនិងអន្តរជាតិ។គ្រូបង្ហាត់របស់ក្លឹបទូកក្តោងកែបនេះ ក៏បានឆ្លងកាត់ការត្រួតពិនិត្យនិងវាយតម្លៃទាំងផ្នែកជំនាញនិងបច្ចេកទេសពីសហព័ន្ធកីឡាទូកក្តោងកម្ពុជាដែលមានស្តង់ដារអន្តរជាតិមួយ ក្រោមគោលការណ៍របស់សហព័ន្ធកីឡាទូកក្តោងពិភពលោក(World Sailing)ផងដែរ។
សហព័ន្ធកីឡាទូកក្តោងកម្ពុជានិងក្លឹបទូកក្តោងកែបមានចក្ខុវិស័យរួម គឺណែនាំ តម្រង់ទិស ជម្រុញលើកទឹកចិត្តដល់ក្មេងៗនិងយុវជនកម្ពុជាឲ្យមានចិត្តស្រឡាញ់កីឡាទូកក្តោងដើម្បីប្រមូលផ្តុំកីឡាទូកក្តោងនិងចម្រាញ់យកកីឡាករឆ្នើម ដែលអាចតំណាងឲ្យកម្ពុជាដើម្បីចូលរួមការប្រកួតក្នុងឆាកជាតិនិងអន្តរជាតិ ។ ក្នុងនោះដែរ ក្រោមកិច្ចសហប្រតិបតិ្តការនិងគាំទ្រគ្នាទៅវិញទៅមក សហព័ន្ធកីឡាទូកក្តោងកម្ពុជា បានសម្រេចជ្រើសរើសយកក្លឹបទូកក្តោងកែបធ្វើជាមូលដ្ឋានហ្វឹកហាត់មួយដើម្បីពង្រឹងបច្ចេកទេសទូកក្តោងសំរាប់ការត្រៀមចូលការប្រកួតកីឡាអាសីុអាគ្នេយ៍លើកទី២៩(The 29th Sea Game)ដែលនឹងប្រព្រឹត្តនៅប្រទេស ម៉ាឡេសីុ និងធ្វើការហ្វឹកហាត់ដើម្បីត្រៀមចូលរួមសម្តែងអបអរសាទរក្នុងពិធីបុណ្យសមុទ្រលើកទី៦ដែលនឹងរៀបចំនៅខេត្តកែបនាពេលខាងមុខនេះ ពិសេសគឺដំណើរឆ្ពោះទៅរកការប្រកួតកីឡាអាសីុអាគ្នេយ៍លើកទី៣២ឆ្នាំ២០២៣ដែលប្រទេសកម្ពុជាយើងនឹងធ្វើជាម្ចាស់ផ្ទះនោះ។ស្របតាមការណែនាំនិងការហ្វឹកហាត់ពីក្លឹបទូកក្តោង Royal Yacht Club Association គ្រូបង្ហាត់ក្លឹបទូកក្តោងកែបប្រភេទ Optimist និងកម្រិតមធ្យមសំរាប់ប្រភេទ Hobie Wave, Hobie 16 និង T2 Sailing Boat ដែលមានការទទួលស្គាល់ពីសហព័ន្ធកីឡាទូកក្តោងកម្ពុជាយ៉ាងពិតប្រាកដ ៕
ណារិទ្ធ
