កំពត ៖ នៅព្រឹកថ្ងៃទី២៤ខែមេសា ឆ្នាំ២០១៧រដ្ឋបាលខេត្តកំពត បានធ្វើកិច្ចប្រជុំបូកសរុបលទ្ធផលការងាររយៈពេល២ខែនិងលើកទិសដៅអនុវត្តបន្ត របស់ក្រុមការងារថ្នាក់ជាតិ ខេត្តចុះមូលដ្ឋាន ដើម្បីត្រួតពិនិត្យនិងគាំទ្រការអនុវត្តកម្មវិធីនយោបាយនិងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលកម្ពុជា ក្រោមអធិបតីភាព ឯកឧត្តមបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្មនិងសិប្បកម្មនិងជាប្រធានក្រុមការងារថ្នាក់ជាតិចុះមូលដ្ឋានខេត្តកំពត ហែរហមដោយសហការីជាច្រើនរូប។ក្នុងពិធីនេះក៏មានការចូលរួមដ៏សកម្មពីសំណាក់ ឯកឧត្តម ចាន់ ចេស្តា អភិបាលខេត្តនិងជាអនុប្រធានអចិន្ត្រៃយ៍ក្រុមការងារថ្នាក់ជាតិចុះមូលដ្ឋានខេត្តកំពតរួមនឹងមន្ត្រីនៃមន្ទីរ អង្គភាពពាក់ព័ន្ធជាច្រើនរូបផងដែរ។
តាមរបាយការណ៍សង្ខេបរបស់ ឯកឧត្តម ចាន់ ចេស្តា បានឲ្យដឹងថា ក្នុងរយៈពេល២ខែនេះការងារបំពេញបែបបទផ្តល់អត្តសញ្ញាណប័ណ្ណជូនប្រជាពលរដ្ឋដែលនៅសេសសល់ពិសេសអ្នកចំណាកស្រុកនឹងបានធ្វើជូនដល់ពួកគាត់ជាបន្តបន្ទាប់ ហើយនៅខែមេសាឆ្នាំ២០១៧ក៏បានធ្វើវេទិកាចំនួន១៨លើកមានមន្ត្រីចូលរួម១៥៦នាក់និងប្រជាពលរដ្ឋចូលរួម៩៧៦នាក់ក្នុងនោះមានស្រី៤៤៩នាក់ទទួលបានបញ្ហានិងសំណូមពរ៤៩ករណីដោះស្រាយបាន៤ករណីនិងបន្តដោះស្រាយនាពេលខាងមុខ ។
ឯកឧត្តមបានឲ្យដឹងផងដែរថា ក្នុងឱកាសចូលឆ្នាំខ្មែរប្រពៃណីជាតិរយៈពេល៣ថ្ងៃខេត្តកំពតបានទទួលនូវអ្នកទេសចរណ៍ចំនួន៩២.៩១៩នាក់កើនឡើង៣៥,៤៥%នេះបើប្រៀបធៀបក្នុងឆ្នាំ២០១៦ក្នុងនោះភ្ញៀវជាតិ៩១.១៧២នាក់និងអន្តរជាតិ១៧.៤៧នាក់។ចំពោះវិស័យកសិកម្មការប្រមូលផលស្រូវប្រាំងត្រូវបានបញ្ចប់ ហើយលទ្ធផលទទួលបានទាំង២រដូវសរុប៤៧៥.៦៨២តោនក្នុងនោះស្រូវវស្សា៤៣៧.២៦៣តោននិងស្រូវប្រាំង៣៨.៤១៩តោន។ដោយឡែកការផលិតអំបិលក្នុងត្រីមាសទី១ឆ្នាំ២០១៧បានសរុបចំនួន១៦.២១៦តោននិងអំបិលសល់ក្នុងឃ្លាំងសរុបចំនួន១៨៨.៣៥០.៨តោន ហើយចំណុចពិសេសសំរាប់២ខែនៃដើមឆ្នាំនេះគឺនៅត្រង់អាកាសធាតុល្អប្រសើរដោយសារមានភ្លៀងធ្លាក់ជាបន្តបន្ទាប់ផងដែរ។
ជាមួយនេះ ឯកឧត្តមបណ្ឌិត ចម ប្រសិទ្ធ បានវាយតម្លៃថា ក្នុងរយៈពេល២ខែនេះ បេសកកម្មរបស់ក្រុមការងារថ្នាក់ជាតិ ខេត្ត្តពិតជាអនុវត្តភារកិច្ចបានល្អប្រសើរ ។ ប៉ុន្តែទោះជាបែបណា ក៏ត្រូវជម្រុញបន្ថែមទៀតសម្រាប់ផែនការអនុវត្តនាត្រីមាសខាងមុខ ពិសេសការស្រង់ឈ្មោះលើបេក្ខជនដែលត្រូវបោះឆ្នោតក្នុងបញ្ជីរឲ្យបានដិតដល់និងសំដៅលើកកម្ពស់រាល់ការធ្វើអត្តសញ្ញាណប័ណ្ណសញ្ជាតិខ្មែរឬសៀវភៅស្នាក់នៅរបស់ប្រជាពលរដ្ឋដោយពុំមានទាមទារកម្រៃ ព្រោះការបោះឆ្នោតជ្រើសរើសក្រុមប្រឹក្សាឃុំ សង្កាត់ ជិតចូលមកដល់ហើយ ៕
ណារិទ្ធ
