ខេត្តមណ្ឌលគិរី ៖ កក្រើកពេញខេត្តមណ្ឌលគិរី ខណៈឡានកែច្នៃប្រភេទបង្កុងដឹកឈើចំនួន៨គ្រឿងត្រូវបាននាយឧត្តសេនីយ៍ សៅ សុខា ដឹកនាំកម្លាំងដោយផ្ទាល់បង្ក្រាបបាននៅចំណុចប៉ុស្តិ៍ការពារព្រំដែនអូរហ៊ុចចន្លោះស្រុកអូររាំងនិងស្រុកកែវសីមាក្នុងតំបន់ដែនជម្រកសត្វព្រៃកែវសីមាកាលពីព្រឹកថ្ងៃ២២កុម្ភះ២០១៧។
លោក កែវ សុភគ៌ ប្រធានមន្ទីរបរិស្ថានបានឲ្យដឹងថា គិតត្រឹមវេលាម៉ោង៣រសៀលថ្ងៃទី២២កុម្ភៈកម្លាំងចម្រុះដែលក្រោមការដឹកនាំរបស់នាយឧត្តមសេនីយ៍ សៅ សុខា កម្លាំងចាប់បានឡានប្រភេទបង្កុងដឹកឈើចំនួន៨គ្រឿង និងមនុស្សចំនួន៧នាក់(ជនជាតិវៀតណាម៦នាក់ខ្មែរ១នាក់)រួមនិងវត្ថុតាងជាច្រើនទៀត ។ លោកសុភគ៌ថាក្នុងប្រតិបត្តិការនេះសមត្ថកិច្ចក៏រឹបអូសឈើខុសច្បាប់បានជាច្រើនកំណាត់ប៉ុន្តែដោយឈើទាំងនោះស្ថិតនៅក្នុងព្រៃជ្រៅសមត្ថកិច្ចបានត្រឹមការពារសិននិងពុំទាន់មានតួរលេខច្បាស់នៅឡើយទេ។
លោក ទៀ ខៃម៉េង មេបញ្ជាការកងអនុសេនាធំលេខ២ ចំនុះវរៈសេនាតូចការពារព្រំដែនលេខ១០៣បានឲ្យដឹងថាពិតជាមានករណីបង្ក្រាបឈើនៅតាមបន្ទាត់ព្រំដែនកម្ពុជាវៀតណាមមែនហើយនៅទីនោះកម្លាំងរបស់លោកកំពុងចូលរួមការបង្ក្រាបជាមួយកម្លាំងចម្រុះ។
ទោះយ៉ាងណា អ្នកយកព័ត៌មានមិនអាចសុំការបញ្ជាក់ពីលោក ខៃ ម៉េង បានទេជុំវិញសកម្មភាពដឹកឈើឆ្លងដែនខុសច្បាប់នៅតំបន់ដែលលោកគ្រប់គ្រងបែរជាគ្មានការបង្ក្រាបរហូតផ្អើលដល់ថ្នាក់ជាតិជាអ្នកបង្ក្រាបទៅវិញ។
លោក ឡេង សុភ័ណ្ឌ មេបញ្ជាការវរនគរបាលការពារព្រំដែនគោកលេខ៦២១មិនអាចសុំការបំភ្លឺបានទេនារសៀលថ្ងៃទី២២ខណៈតំបន់ដែលមានការបង្ក្រាបបទល្មើសព្រៃឈើទ្រង់ទ្រាយធំនេះគឺស្ថិតក្នុងដែនសមត្ថកិច្ចរបស់លោកគ្រប់គ្រង។
ចំណែកលោក រ័ត្ន សុវណ្ណ អនុប្រធានមន្ទីរបរិស្ថាននិងជានាយកដែនជម្រកសត្វព្រៃកែវសីមាដែលបានរងការរិះគន់ច្រើនពីមហាជនថាជាអ្នកអនុញ្ញាតឲ្យមានបទល្មើសព្រៃឈើក្នុងដែនសមត្ថកិច្ចរបស់ខ្លួនសហការីយើងមិនអាចសុំការបំភ្លឺបានទេនៅល្ងាចថ្ងៃទី២២។
ប្រតិបត្តិការបង្ក្រាបបទល្មើសព្រៃឈើតាមបន្ទាត់ព្រំដែនដែលមានសមាភាពរបស់នាយឧត្តមសេនីយ៍ផ្កាយមាស៤សៅសុខាដឹកនាំដោយផ្ទាល់បានសរបញ្ជាក់ឲ្យឃើញថាបទល្មើសព្រៃឈើនៅខេត្តមណ្ឌលគិរីគឺពិតជាមានប្រាកដដូចការចេញផ្សាយរបស់ទីភ្នាក់ងារកាសែតក្នុងស្រុកកាលពីថ្ងៃទី២១កុម្ភៈ២០១៧លើបញ្ហាអាជ្ញាធរខេត្តមណ្ឌលគិរីមិនមានសមត្ថភាពទប់ស្កាត់ឬបង្ក្រាបក្រុមឧក្រិដ្ឋជនព្រៃឈើស្របពេលដែលមន្ត្រីក្នុងខេត្តនេះតែងតែអះអាងនិងរាយការណ៏ទៅថ្នាក់លើរបស់ខ្លួនពីភាពស្ងប់ស្ងាត់សកម្មភាពកាប់ឈើខុសច្បាប់នៅក្នុងខេត្តមួយនេះ៕
