មណ្ឌលគិរី៖ ឈើប្រណិតចំនួន១០០ដុំទៀតហើយត្រូវបាននាយផ្នែករដ្ឋបាលព្រៃឈើស្រុកកែវសីមា យកទៅរក្សាទុកនៅផ្នែករដ្ឋបាលព្រៃឈើកែវសីមា ក្រោយពីធ្វើការឡមព័ទ្ធផ្ទះរបស់លោក ឆាយ វ៉ាត ជានាយទាហានវរៈសេនាតូចការពារព្រំដែនលេខ១០៣កងអនុសេនាធំលេខ២ ស្ថិតនៅក្នុងភូមិអូរអាមឃុំស្រែខ្ទុម ស្រុកកែវសីមា ខេត្តមណ្ឌលគិរី ។ ពលរដ្ឋបាននិយាយថា ឈើទាំងនោះត្រូវបានឈ្មួញធ្វើការដឹកជញ្ជូនយកមកស្តុបទុក ត្រៀមយកទៅលក់បន្តឲ្យពួកឈ្មួញនៅប្រទេសវៀតណាម ។
ការឆែកឆេទីតាំងស្តុកឈើប្រណិតខាងលើ ដឹកនាំបញ្ជាផ្ទាល់ដោយលោក សូ សុវិជ្ជា ព្រះរាជអាជ្ញារងអមសាលាដំបូងខេត្តមណ្ឌលគិរី ដែលមានសមត្ថកិច្ចចម្រុះប្រមាណ១២នាក់ហើយនិងជំនាញរដ្ឋបាលព្រៃឈើក្នុងស្រុកផងដែរ។
បើតាមប្រជាពលរដ្ឋរស់នៅទីនោះ សុំមិនបញ្ចេញឈ្មោះបានឲ្យដឹងថា លោក ឆាយ វ៉ាត គឺជាមេឈ្មួញដុះស្លែរកស៊ីតែបទល្មើសព្រៃឈើជាយូរឆ្នាំមកហើយ ហើយកាលពីប៉ុន្មានឆ្នាំមុនក៏ធ្លាប់ត្រូវបានកម្លាំងសមត្ថកិច្ចចម្រុះ ចុះបង្ក្រាបបានឈើប្រណិតនៅក្នុងផ្ទះលោក ឆាយ វ៉ាត ដែលលាក់ទុកជាច្រើនដុំផងដែរ។
លោក សូ សុវិជ្ជា ព្រះរាជអាជ្ញារងខេត្តមណ្ឌលគិរីបានអោយដឹងថា ឈើ១០០កំណាត់ត្រូវបានរកឃើញនៅទីតាំងនេះមែន តែលោកថា មិនដឹងជាឈើរបស់ឈ្មួញវៀតណាមដែលទិញស្តុកទុកនៅទីនេះឬជារបស់ម្ចាស់ផ្ទះនោះទេ បច្ចុប្បន្នជំនាញកំពុងចាត់ការ។
នាយផ្នែករដ្ឋបាលព្រៃឈើស្រុកកែវសីមា លោក ជុយ សុឃាង បានឲ្យដឹងដែរថា ជំនាញរកឃើញឈើប្រណិតជាង១០០កំណាត់ឯណ្ណោះ តែធ្វើការប្រមូលយកមករក្សាទុកតែ ឈើប្រណិតចំនួន៩០កំណាត់ទេដែលត្រូវបានប្រមូលយកមករក្សាទុកនៅផ្នែករដ្ឋបាលព្រៃឈើស្រុកកែវសីមា ចំណែកឈើមួយចំនួនទៀតដែលនៅសល ត្រូវម្ចាស់ផ្ទះខាងលើសុំទុកធ្វើរបស់ប្រើប្រាស់ ៕
