ប៉ៃលិន ៖ លូមួយកន្លែងនៅលើដងផ្លូវគ្រួសក្រហម១ខ្សែ មានការខូចខាតខ្ទេចខ្ទីបាក់បែក តែងបង្កគ្រោះថ្នាក់ដល់អ្នកដំណើរ នៅចំណុចខាងកើតវត្តស្រង់មានជ័យក្នុងភូមិទឹកភ្លៀវ ស្រុកសាលាក្រៅ ខេត្តប៉ៃលិន តែងបង្កគ្រោះថ្នាក់ដល់អ្នកធ្វើដំណើរជាហូរហែរ ប៉ុន្តែអាជ្ញាធរអត់រវល់អើពើជួសជុល តាមការស្នើសុំរបស់ពលរដ្ឋឡើយ ។
តាមប្រភពព័ត៌មានពីមហាជនដែលបានធ្វើដំណើរលើបណ្ដោយផ្លូវនោះបានឱ្យដឹងថាផ្លូវលំគ្រួសក្រហមមួយខ្សែនេះ ពួកគាត់បានឃើញបាក់បែកជាយូរមកហើយ តែពួកគាត់បានជូនដំណឹងដល់អាជ្ញាធរភូមិ ហាក់បីដូចមិនយកភ្នែងមើល រហូតដល់មានគ្រោះថ្នាក់ចរាចរណ៍ ដល់អ្នកធ្វើដំណើរ ដូចជាបងប្អូនកម្មករចំណាកស្រុកបើកបរម៉ូតូរងរបួសជាញឹកញាប់ ។ មិនថាតែកម្មករចំណាកស្រុកទេ ដូចជាប្រជាពល រដ្ឋរស់នៅតាមភូមិធ្វើដំណើរ មិនបានមើលក្នុងពេលយប់ ។
ប្រភពបានបន្តទៀតថា ក្រោយពីពួកគាត់បានជំរាបទៅមេភូមិបានតែប្រាប់ឱ្យដឹង តែមិនអនុវត្ត បន្ទាប់មកពួកគាត់ក៏បានទូរស័ព្ទទៅ ឯកឧត្តមកើត សុធា អភិបាលខេត្តប៉ៃលិន រួចស្រាប់តែឯកឧត្តមបានដាក់បញ្ជាឱ្យលោក សំ សារ៉េត អភិបាលស្រុកសាលាក្រៅឱ្យនាំកម្លាំង ជំនាញទៅមើល ។ ពីនោះមក គេមិនឃើញលោក សំ សារ៉េត អភិបាលស្រុកសាលាក្រៅទៅពិនិត្យទេ តែគេឃើញលោកឱ្យអភិបាលរង និងមន្ត្រីជំនាញរបស់លោកទៅពិនិត្យ កន្លែងលូបាក់បែកដាច់ដី កាត់ផ្លូវគ្រួសក្រហមមួយខ្សែក្នុងភូមិខាងលើនោះ ។
លោក សំ សារ៉េត អភិបាលស្រុកបានឱ្យដឹងថា ក្រោយពីអភិបាលរងស្រុកនិងកម្លាំងមន្ត្រីជំនាញបានចុះពិនិត្យ ឃើញលូបាក់បែកមួយ កន្លែងជាក់ស្ដែង រួចមកលោកនឹងឱ្យកម្លាំងធ្វើរបាយការណ៍ដើម្បីបញ្ជូនទៅអភិបាលខេត្តប៉ៃលិន លើកគម្រោងដើម្បីអភិវឌ្ឍចាត់វិធានខាងមុខនេះ ៕
អ៊ុក ទូច
