ខេត្តប៉ៃលិន ៖ ដោយយោងតាមព្រះរាជក្រឹត្យលេខ នស/រកត/១២២០/១៣៨២ ធ្វើនៅព្រះបរមរាជវាំង ចុះថ្ងៃទី១៨ ខែធ្នូ ឆ្នាំ២០២០ ដែលឡាយព្រះហស្ត ដោយព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ត្រាស់បង្គាប់ផ្ទេរភារកិច្ចឯកឧត្តម ផាន់ ចាន់ធុល ឋានន្តរស័ក្តិឧត្តមមន្ត្រី ថ្នាក់លេខ១ ពីអភិបាល នៃគណ:អភិបាលខេត្តប៉ៃលិន ឱ្យទៅបម្រើការងារនៅទីស្តីការក្រសួងមហាផ្ទៃ ។ ហើយតែងតាំងលោកជំទាវ បាន ស្រីមុំ ឋានន្តរស័ក្តិឧត្តមមន្ត្រីថ្នាក់លេខ២ ជាអភិបាល នៃគណអភិបាលខេត្តប៉ៃលិន ។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ត្រូវទទួលបន្ទុកអនុវត្តព្រះរាជក្រឹត្យនេះ ចាប់ពីថ្ងៃឡាយព្រះហស្តលេខាតទៅ ។
ចំណែកបងប្អូនប្រជាពលរដ្ឋរស់នៅក្នុងខេត្តប៉ៃលិនទាំង ក្មេង ចាស់ ប្រុស ស្រី គ្រាន់តែទទួលបាននូវដំណឹងដ៏សែនកក់ក្តៅនេះភ្លាម ពួកគាត់ពិតជាមានការសប្បាយរីករាយក្នុងចិត្តយ៉ាងខ្លាំង ខណ:ពេលដែលលោកជំទាវបណ្ឌិត បាន ស្រីមុំ នៅជាអ្នកតំណាងរាស្ត្រមណ្ឌលប៉ៃលិន លោកជំទាវតែងតែយកចិត្តទុកដាក់ ដឹកនាំក្រុមការងារ ចុះសួរសុខទុក្ខប្រជាពលរដ្ឋដូចភ្លៀងរលឹម ជាពិសេសបងប្អូនពលរដ្ឋ ដែលមានជីវភាពក្រីក្រ ខ្វះខាតស្បៀងអាហារ អ្នកទទួលរងគ្រោះទឹកជំនន់ ភ្លៀងឆេះផ្ទះ ស្ត្រីសម្រាលកូន អ្នកជម្ងឺធ្ងន់ ជាដើម ដោយមិនប្រកាន់និន្នាការអ្វីនោះឡើយ ។ ប្រជាពលរដ្ឋទាំងអស់ក៏សូមជូនពរដល់លោកជំទាវឱ្យទទួលបាននូវកម្លាំងមាំមួន សុខភាពល្អ ប្រាជ្ញាឈ្លាសវៃ និងទទួលជោគជ័យក្នុងការប្រកប ការងារគ្រប់ភារកិច្ច ។
សូមបញ្ជាក់ថា ៖ ផ្លាស់ប្តូរ និងផ្ទេរមុខតំណែង ឯកឧត្តម ផាន់ ចាន់ធុល ពីអភិបាលនៃគណ:អភិបាលខេត្តប៉ៃលិន ឱ្យទៅបម្រើការងារ ជាអនុរដ្ឋលេខាធិការក្រសួងមហាផ្ទៃ ។ ចំណែកលោកជំទាវ បាន ស្រីមុំ ផ្លាស់ប្តូរពីអ្នកតំណាងរាស្ត្រមណ្ឌលខេត្តប៉ៃលិន ដោយតែងតាំងទៅជាអភិបាល នៃគណអភិបាលខេត្តប៉ៃលិន នៅថ្ងៃខាងមុខឆាប់ៗ នេះផងដែរ ៕
