ខេត្តសៀមរាប ៖ ពិធីក្រុងពាលី បួងសួង សុំសេចក្តីសុខ នាព្រឹកថ្ងៃអាទិត្យ ១៤កើត ខែមាឃ ឆ្នាំមមែ សប្តស័ក ពស ២៥៥៩ ត្រូវនឹងថ្ងៃទី២១ ខែកុម្ភៈ គស ២០១៦ នៅលានជល់ដំរី ខាងជើងប្រាសាទបាយ័ន ( ឧទ្យានប្រវត្តិសាស្ត្រ អង្គរ ) ក្រុងសៀមរាប គឺបានពី ព្រឹត្តិការណ៍អង្គរសង្ក្រាន្ត នឹងធ្វើដំណើរ មកដល់ ឆ្នាំទី៤ របស់ខ្លួន សម្រាប់ឆ្នាំវក អដ្ឋស័ក ពស ២៥៦០ ដែលគ្រោងនឹងប្រារព្ធឡើង ចាប់ពីថ្ងៃទី១៣ ដល់ ថ្ងៃទី១៦ ខែមេសា ឆ្នាំ២០១៦ ខាងមុខនេះ! លោក សោម រតនា ប្រធាន ក្រុមការងារទំនាក់ទំនង សាធារណៈ ព្រឹត្តិការណ៍អង្គរសង្ក្រាន្ត បានឲ្យដឹងយ៉ាងដូច្នេះ នៅក្នុងឱកាសប្រារព្វពិធីក្រុងពាលីនោះ ។
ពិធីក្រុងពាលី ដែលបានប្រព្រឹត្តិទៅនាព្រឹកថ្ងៃអាទិត្យនោះ គេឃើញមានវត្តមានរបស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ជាមួយនឹងអភិបាលខេត្ត មន្ត្រីរាជការ អគ្គនាយកអាជ្ញាធរជាតិអប្សរា មន្ត្រីស្ថាប័នពាក់ព័ន្ធ ព្រមជាមួយយុវជន និង ប្រជាពលរដ្ឋ ផងដែរ ។
ពិធីក្រុងពាលីនេះ បានធ្វើឡើងតាមបែបព្រហ្មញ្ញសាសនាសុទ្ធសាធ ដែលនៅក្នុងនោះរួមមាន ពីធីថ្វាយគ្រឿងសក្ការៈទិសទាំង១០ ពិធីថ្វាយគ្រឿងសក្ការៈទិសធំ ប្រកាសឧទ្ទីសបួងសួង និងប្រគុំថ្វាយភ្លេងពិណពាធចំពោះបារមីវត្ថុស័ក្តសិទ្ធ ហើយដែលមួយផ្នែកនៃពិធីនេះ គឺបូជាព្រះភូមិ និងបូជាថ្វាយស្តេចក្រុងពាលី ។
លោក សោម រតនា បានបន្តឲ្យដឹងថា ៖ នេះជាលើកទី៤ហើយ ដែលសហភាពសហព័ន្ធ យុវជនកម្ពុជា បានសហការជាមួយអាជ្ញាធរ ស្ថាប័ន ដែលពាក់ព័ន្ធ និងដោយមានការចូលរួមផងដែរ ពីសំណាក់យុវជនស្ម័គ្រចិត្ត មកពីគ្រប់ទិសទី រៀបចំព្រឹត្តិការអង្គរសង្ក្រាន្ត ។ លោកក៏បានបកស្រាយឲ្យដឹងផងដែរ អំពីគោលបំណងនៃការរៀបចំព្រឹត្តិការណ៍អង្គរសង្ក្រាន្តនេះ ! ជាការផ្តល់ឱកាសឲ្យយុវជន និងសាធារណជនខ្មែរទូទៅ បានចូលរួមអបអរសាទរពិធីបុណ្យចូលឆ្នាំថ្មី ប្រពៃណីជាតិនៅអង្គរវត្ត ជាលក្ខណៈមហាគ្រួសារខ្មែរតែមួយ ក្រោមស្មារតីសុខដុម សប្បាយរីករាយ និងបានស្វែងយល់នូវភាពរុងរឿង នៃព្រះរាជាណាចក្រកម្ពុជា នាសម័យមហានគរ បំផុសឆន្ទៈ បន្តថែរក្សាមរតកវប្បធម៌ខ្មែរ ឲ្យបានគង់វង្ស តទៅអនាគត ។
លោកបានបន្តថា ៖ ព្រឹត្តិការណ៍អង្គរសង្ក្រាន្ត ក៏នឹងបានផ្តល់ឱកាសឲ្យព្រះរាជាណាចក្រកម្ពុជា បានផ្សព្វផ្សាយលើកតម្កើង អរិយធម៌ វប្បធម៌ ទំនៀមទម្លាប់ និងប្រពៃណីដ៏ផូរផង់របស់ខ្លួន ជូនភ្ញៀវអន្តរជាតិស្វែងយល់ ដើម្បីពង្រីកកិត្យានុភាពនៅក្នុងតំបន់ និងទៅលើពិភពលោក ហើយបន្ទាប់ពីពិធីក្រុងពាលីនេះ ក្រុមការងារអង្គរសង្ក្រាន្តឆ្នាំ២០១៦ នឹងចាប់ផ្តើមបើកការដ្ឋាន និងហ្វឹកហាត់ការសម្តែងនានា តាមតួនាទីនិងភារកិច្ច រៀងៗខ្លួន ៕
ដោយ កញ្ញា ឃួនសុគន្ធា-លុច ណាម
