មណ្ឌលគិរី៖ នគរបាលខេត្តមណ្ឌលគិរីបានធ្វើការឃាត់ខ្លួនយុវតីម្នាក់និងបញ្ជួនអោយក្រុមគ្រួសារវិញ ក្រោយពេលទទួលបានពាក្យ បណ្តឹងពីគ្រួសារតាមរយៈស្នងការដ្ឋាននគរបាលរាជធានីភ្នំពេញ អំពីករណីពង្រាត់គ្នា ។ ការឃាត់ខ្លួនបានធ្វើឡើង កាលពីថ្ងៃ២០កុម្ភះ ២០១៦ នៅក្រុងសែនមនោរម្យខេត្តមណ្ឌលគិរី។
លោក តូច យ៉ុន ស្នងការនគរបាលខេត្តមណ្ឌលគិរី បានអោយដឹងថានៅព្រឹកថ្ងៃ២១កុម្ភៈឆ្នាំ២០១៦ នគរបាលបានធ្វើការ ឃាត់ខ្លួនយុវតីម្នាក់មានឈ្មោះខូវ នីតា ភេទស្រីអាយុ១៦ឆ្នាំ មានទីលំនៅសង្កាត់វាលវង់ ខណ្ឌ៧មករា ក្រុងភ្នំពេញ។ លោកបន្តថា ដោយមានពាក្យបណ្តឹងករណីពង្រាត់គ្នា តាមរយះការិយាល័យប្រឆាំងការជួញដូរមនុស្សរាជធានីភ្នំពេញ សមត្ថកិច្ចខេត្តមណ្ឌលគិរី បានកំណត់បានភិនភាគយុវតីខាងលើនិងបានឃាត់ខ្លួនយកមកសួរនាំនៅស្នងការដ្ឋាននគរបាល ខេត្ត ។
លោកបន្តថា ក្រោយការសាកសួរ យុវតីខាងលើ បានអោយដឹងថា ខ្លួនបានពង្រត់គ្នាជាមួយសង្សារឈ្មោះឃី សុខុម អាយុ១៨ឆ្នាំ ហើយខាងប្រុសបានលួងលោម អោយនាងធ្វើដំណើរមកខេត្តមណ្ឌលគិរីមុន ហើយរូបគេនិងមកតាម ក្រោយ។ទំនងជាអ្នកកំលោះនោះដឹងខ្លួនថាស្ថានភាពមិនសូវស្រួលក៏មិនហ៊ានមកតសមការសន្យាជាមួយនាង ហើយគេចខ្លួនបាត់តែម្តង ធ្វើអោយនាងស្រីតូចនៅតែម្នាក់ឯងយ៉ាងកណ្តោចកន្តែងគួរអោយអាណិតចាពន់ពេក។
សូមបញ្ជាក់ថាយុវតីរូបនេះបានចាកចេញពីផ្ទះតាំងពីថ្ងៃទី១០កុម្ភះ២០១៦មកម្លេះ ហើយសមត្ថកិច្ចបានប្រគល់ យុវតីខាងលើជួនក្រុមគ្រួសារវិញ ចំណែកឈ្មោះឃី សុខុម នៅមិនទាន់រកឃើញនៅឡើយទេ៕
ហេង ចាន់ណុប
