ខេត្តបន្ទាយមានជ័យ ៖ ក្នុងកិច្ចប្រជុំប្រចាំខែ នាព្រឹកថ្ងៃទី១៩ ខែកុម្ភៈ ឆ្នាំ២០១៦ លោកអាត់ ខែម ស្នងការនគរបាលខេត្តបន្ទាយមានជ័យបានលើកទិសដៅពង្រឹងបញ្ហាសន្តិសុខជូនប្រជាពលរដ្ឋជាចំបងដោយមានការអញ្ជើញចូលរួម អធិការ-អធិការរងក្រុងស្រុក មេបញ្ជាការវរៈទាំង៤និងមន្ត្រីនគរបាលមួយចំនួនទៀត។
លោកឧត្តមសេនីយ៍ទោ អាត់ ខែម បានបញ្ជាក់ថាកងកម្លាំងទាំងអស់ត្រូវបង្កើនរក្សាសន្តិសុខ ទប់ស្កាត់អំពើលួច ឆក់ ប្លន់ តាមមូលដ្ឋានតាមរយៈការបង្កើនការយាមល្បាតទាំងយប់ទាំងថ្ងៃ ជាពិសេសពង្រឹងកម្លាំងនៅតាមគោលដៅដែលងាយរងគ្រោះដូចជាកន្លែងដូរលុយ លក់មាស ផ្ទេរប្រាក់និងទីប្រជុំជនជាដើម ចំពោះបទល្មើសគ្រឿងញៀនវិញ លោកឧត្តមសេនីយ៍ បានជំរុញបន្តចុះស្រាវជ្រាវ និងបង្ក្រាបកាន់តែខ្លាំងឡើងនៅតាមភូមិ-ឃុំ ហើយតាមចាប់មុខសញ្ញាដែលនៅសេសសល់ឲ្យខាងតែម្តង ស្ថានភាពតាមតំបន់ព្រំដែនវិញលោកស្នងការ ក៏ប្រាប់ទៅកងកម្លាំងពាក់ព័ន្ធត្រូវចុះល្បាតនិងធ្វើការទប់ស្កាត់បទល្មើសមួយចំនួនដូចជាពលករលួចឆ្លងដែនខុសច្បាប់ ការលួចនាំចូលទំនិញនាំចេញទំនិញរថយន្តចង្កូតស្តាំ សម្រាប់សេវាសាធារណៈដែលត្រូវធ្វើជូនប្រជាពលរដ្ឋបានបង្កើនធ្វើអត្តសញ្ញាប័ណ្ណតាមរយៈការបន្ថែមម៉ាស៊ីនចល័តដល់ឃុំនៅតំបន់ដាច់ស្រយាលនានា ។
ដោយឡែក សម្រាប់នៅលើដងផ្លូវវិញលោកស្នងការ ក៏ណែនាំដល់កងកម្លាំងនគរបាលចរាចរណ៍ចុះអប់រំនិងធ្វើការផ្សព្វផ្សាយ ជូនប្រជាពលរដ្ឋជាប្រចាំឲ្យពួកគាត់ស្វែងយល់នូវច្បាប់ចរាចរណ៍ផ្លូវគោកថ្មី ចុងបញ្ចប់នៃកិច្ចប្រជុំលោកឧត្តមសេនីយ៍ អាត់ ខែម បានចែកមួកសុវត្ថិភាពប្រមាណ៣០០មួកជូនដល់មន្ត្រីនគរបាលរបស់ខ្លួនផងដែរ ៕
