មណ្ឌលគិរី ៖ កម្លាំងអាវុធហត្ថខេត្ត និង កម្លាំងសមត្ថកិច្ចចំរុះបានធ្វើការសហការគ្នាដើម្បីឡោមព័ទ្ធផ្ទះរបស់លោក សូ ម៉ារិទ្ធ ដែលជាថៅកែឈើ និង ជាប៉េអឹមផ្ទៃប្រទេសផងនោះ ក្នុងករណីសង្ស័យមានលាក់ទុកឈើប្រណិត ។
ហេតុការណ៏នេះបានកើតឡើងនៅវេលាម៉ោង ២ : ១៥នាទីរសៀលថ្ងៃទី០៣ ខែកុម្ភ: ឆ្នាំ២០១៦ ស្ថិតនៅក្នុងភូមិឆ្នែង ឃុំស្រែខ្ទុម ស្រុកកែវសីមា ខេត្តមណ្ឌលគិរី តាមរយ:សមត្ថកិច្ច ដែលបានចុះប្រតិបត្តការផ្ទាល់ បានប្រាប់អ្នកយកព័ត៌មានថា ក្រោយពីកម្លាំងអាវុធហត្ថខេត្ត បានចាប់បានមរថយន្តដឹឈើចំនួន០១គ្រឿងដែលបើកបរចេញពីស្រុកអូរាំងឆ្ពោះទៅស្រុកកែវសីមា និង ០១គ្រឿងទៀតតាមចាប់មិនបាន ហើយបើកចូលគេចខ្លួនក្នុងផ្ទះ និង មានការបាញ់គំរាមពីក្នុងផ្ទះមកក្រៅទៀតផង ។ ភ្លាមនោះកម្លាំងក៏បានបន្តធ្វើការឡោមព័ទ្ធជុំវិញផ្ទះ រង់ចាំលោកព្រះរាជអាជ្ញាទៅដល់គ្រាន់តែមានបទបញ្ជាពីព្រះរាជអាជ្ញាភ្លាម កម្លាំងបានសំរុកចូលទៅក្នុងបរិវេណផ្ទះកើតហេតុ ដើម្បីធ្វើការឆែកឆេរដោយរកឈើប្រណិត ចំនួនជាងពីររយកំណាត់ រថយន្តកែឆ្នៃ០១គ្រឿង និង ម៉ាស៊ីនរ៉ៃ ០១គ្រឿង ដែល ប្រតិបត្តការនេះបានដឹកនាំដោយលោក ឡុង ហុងម៉េង ព្រះរាជអាជ្ញាសាលាដំបូងខេត្តមណ្ឌលគិរី។
សូមរំលឹកថា កាលពីឆ្នាំមុនកន្លងទៅផ្ទះនេះក៏ធ្លាប់បានព្រះរាជអាជ្ញាឡោមព័ទឆែកឆេររកឃើញឈើជាងប្រាំមួយរយដុំស្មើរនឹង៧០ម៉ែត្រគូបផងដែរ ចំណែកឯករណីឆែកឆេរថ្ងៃនេះគឺសមត្ថកិច្ចកំពុងធ្វើការស្រាវជ្រាវលំអិតបន្ថែមទៀតដោយមិនទាន់បានដឺងថានៅមានឈើលាក់ទុកប៉ុន្មានទៀតទេនៅកន្លែងកើតហេតុនោះ ៕
ដោយ ៖ គឹម ចំរើន ហេង ចាន់ណុប
