មណ្ឌលគិរី ៖ បាក់ស្រុតរណ្តៅរ៉ែមាសបណ្តាលឲ្យស្លាប់ម្នាក់ និង របួសធ្ងន់ម្នាក់នៅព្រឹកថ្ងៃទី២៧ ខែមករា ឆ្នាំ២០១៦ ស្ថិតនៅចំណុចភូមិពូទុង ឃុំចុងផ្លាស់ ស្រុកកែវសីមា ខេត្តមណ្ឌលគិរី នៅវលាម៉ោង៧ : ១៥នាទីព្រឹក នៅក្នុងរណ្តៅរ៉ែឈ្មោះ ហេង សម្បត្តិ។
លោក ស៊ុន ប៊ុនធឿន អធិការស្រុកកែវសីមា បានអោយដឹងថា ម្ចាស់រណ្តៅរ៉ែមានឈ្មោះ ហេង សម្បត្តិ ភេទប្រុសអាយុ ៤១ ឆ្នាំមានស្រុកកំណើតនៅភូមិមេមត់ ឃុំមេមត់ ស្រុកមេមត់ ខេត្តត្បូងឃ្មុំ ។ ចំណែកឯជនរងគ្រោះដែលស្លាប់ឈ្មោះ លឹម សាន្ត ភេទប្រុសអាយុ២១ឆ្នាំ ស្រុកកំណើតនៅភូមិមេមត់ ឃុំមេមត់ ស្រុកមេមត់ ខេត្តត្បូងឃ្មុំ និង អ្នកដែលរងរបួសធ្ងន់ឈ្មោះ អេន ណៃ ភេទប្រុស អាយុ៣១ឆ្នាំ មានស្រុកកំណើតនៅភូមិអូរពេជ្រ ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ អ្នកទាំងពីរបានមកស្នាក់នៅក្នុងភូមិ ឃុំ កើតហេតុខាងលើ ប្រកបរបរជាកម្មកររ៉ែមាស ។
ប្រភពពត័មានបានបន្តថាមូលហេតុដែលបណ្តាលអោយមានហេតុការណ៏នេះកើតឡើង គឺបណ្តាលមកពីការបាក់ស្រុតរណ្តៅរ៉ែធ្វើអោយមានដីលាយឡំនឹងផ្ទាំងថ្ម ដែលបាក់គ្រប់សង្កត់មកលើជនរងគ្រោះស្លាប់តែម្តង ។
លោកបានបន្តថា ករណីគ្រោះថ្នាក់របៀបនេះគឺតែងតែកើតមានឡើងជារៀងរហូតមក រហូតមកដល់ពេលនេះ នៅមិនទាន់បានជ្រាបច្បាស់ថា តើមន្ទីរឧស្សាហកម្មរ៉ែ ឬក៏សមត្ថកិច្ចដែលពាក់ព័ន្ធមានវិធានការយ៉ាងណានោះទេ ចំពោះការធ្វើអាជីវកម្មរ៉ែដែលមិនមានលក្ខណ:បច្ចេកទេសត្រឹមត្រូវ ដែលតែងតែកើតមានករណីគ្រោះថ្នាក់ដល់អាយុជិវិតមនុស្សស្ទើតែរៀងរាល់ឆ្នាំកន្លងមក ៕
ដោយ ៖ គឹម ចំរើន
