ការប្រារឰទិវារំលឹកខួបលើកទី ៣៧ នៃទិវាជ័យជំនះ ៧មករា ឆ្នាំ១៩៧៩-២០១៦ ដែលធ្វើឡើងនៅសាលាស្រុក ដំណាក់ចង្អើរ កាលពីព្រឹក ថ្ងៃទី ១៥ ខែមករា ឆ្នាំ២០១៦ ស្រុកដំណាក់ចង្អើរ មានការចូលរួមអធិបតីភាពដ៏ខ្ពង់ខ្ពស់ និងប្រធានក្រុមការងារ និងការអញ្ជើញចូលរួមពី ឯកឧត្តម ប្រធានក្រុមប្រឹក្សាខេត្ត ឯកឧត្តម ទេព យុទ្ធី ជាអធិការរងខេត្ត កែប និងលោកស្រីអភិបាលស្រុក គឹម ច័ន្ទនី ព្រមទាំងមន្ត្រីរាជការ កងកម្លាំងប្រដាប់អាវុធទាំងបីប្រភេទ ក្រុមយុវជន កាយារិទ្ធិ កាកបាទក្រហម និងលោកគ្រូ អ្នគ្រូ សិស្សានុសិស្ស និងប្រជាពលរដ្ឋមានការមកចូលរួមចំនួន ១២.០០០នាក់ ផងដែរ ។
ក្នុងឱកាសដ៏វិសេសវិសាលនេះ ប្រសាសន៍ថ្លែក្នុងកម្មវិធី ជាការរំលឹកដល់ជ័យជំនះក្នុងឆ្នាំ ១៩៧៩ ហើយជ័យជំនះ ៧មករា នេះ ជាមរតករបស់រាជរដ្ឋាភិបាលទូទាំងប្រទេស ដែលនាំមកនូវសុខសន្តិភាពជូនដល់ប្រជាពលរដ្ឋហើយធ្វើឱ្យ ប្រទេសយើងកំពុងមានការអភិវឌ្ឍន៍លើគ្រប់វិស័យ ។
ឯកឧត្តម បន្តទៀតថា ប្រជាពលរដ្ឋដែលឆ្លងកាត់ក្នុងរបបប្រល័យពូជសាសន៍ ប៉ុល ពត គឺមិនបំភ្លេចបានទេ នូវការ រស់នៅមានជីវិតថ្មីឡើងវិញ ដូច្នេះហើយ ៧មករា ជាថ្ងៃប្រវត្តិសាស្ត្រប្រជាជនទូទាំងប្រទេសហើយ ប្រជាពលរដ្ឋមិនបំភ្លេច នៅថ្ងៃ ៧មករានេះបានទេ ក៏មិនបំភ្លេចកំពូលថ្នាក់ដឹកនាំហ៊ានស្ម័គ្រចិត្តលះបង់បូជាជីវិតដើម្បីរំដោះប្រទេសជាតិ ។
ក្នុងឱកាសនោះដែរ រាជរដ្ឋាភិបាលក៏បានសន្យា និងខិតខំអភិវឌ្ឍន៍ប្រទេសកម្ពុជាឱ្យមានការរីកចំរើនកាន់តែខ្លាំងថែម ទៀត ហើយថ្នាក់ដឹកនាំ និងរង់ចាំនូវការរិះគន់របស់ប្រជាពលរដ្ឋ ដើម្បីបំពេញនូវកន្លែងខ្វះខាតដែលបងប្អូនប្រជាពលរដ្ឋត្រូវ ការ ។
សរុបមកមានន័យថា យើងទាំងអស់គ្នាមិនអាចបំភ្លេចនូវថ្ងៃ ៧មករា ឆ្នាំ១៩៧៩ និង ៧មករា ឆ្នាំ២០១៦ នេះបានទេ ។ នៅចុងបញ្ចប់នៃអង្គកម្មវិធី ឯកឧត្តម មានការចែកអំណោយជូនដល់ប្រជាពលរដ្ឋដែលចូលរួមនូវអាវយឺតម្នាក់ហើយ ក៏មាន ថតរូបអនុស្សាវរីយ៍ទៀតផងដែរ ៕
ដោយ ៖ សារ៉ាត់
