ជុំវិញបញ្ហាលោក សម រង្ស៊ី ត្រឡប់ចូលស្រុកខ្មែរវិញនៅថ្ងៃសៅរ៍ទី០ ៩ វិច្ឆិកា ឆ្នាំ២០១៩នាពេលខាងមុខនេះ មានមតិវិភាគជាច្រើនបាននិយាយថា តើ សម រង្ស៊ី បានផ្តាំបរទេសហើយឬនៅអំពីថ្ងៃចុងក្រោយដែលបានជួបមុខ ហើយដែលបានបាត់មុខនៅសៅរ៍ថ្ងៃ ០៩ វិច្ឆិកា យ៉ាងពិតប្រាកដ ។
ចំពោះសេចក្តីប្រកាសរបស់លោក សម រង្ស៊ី ដែលបានលាន់ឮពេញពិភពលោកថា ខ្លួននឹងវិលចូលស្រុកខ្មែរវិញនៅថ្ងៃសៅរ៍ ០៩ វិច្ឆិកា ឆ្នាំ២០១៩ ក្នុងគោលបំណងដ៏ធំមួយ និងដ៏ឃោរឃៅ ថ្លើមពាសមេឃថា «មកចាប់សម្តេច ហ៊ុន សែន ដែលជានាយករដ្ឋមន្ត្រីស្របច្បាប់នៃព្រះរាជាណាចក្រកម្ពុជា។ នេះគឺជាការប្រកាសប្តេជ្ញាដ៏ខ្ទរខ្ទាររបស់លោក សម រង្ស៊ី ។ បញ្ហានេះមជ្ឈដ្ឋានអ្នកវិភាគយល់បីយ៉ាងខុសគ្នា គឺ =
ទី១ = សំដីរបស់លោក សម រង្ស៊ី បន្លឺឡើងគ្រាន់តែជាការធ្វើតេស្តពញ្ញាក់ស្មារតីប្រជាពលរដ្ឋខ្មែរថា ពិតជាខ្លួនមានភាពអង់អាចក្លាហានក្នុងន័យយកបរទេសជាអ្នកគាំទ្រខ្លួនធ្វើ ជាខ្នងបង្អែកដើម្បីឲ្យខ្លួនឆ្លងផុតពីអន្ទាក់ច្បាប់តែប៉ុណ្ណោះ ។
ទី២ = សំដីរបស់លោក សម រង្ស៊ី គ្រាន់តែប្រកាសឡើងដើម្បីធ្វើការស្ទង់ស្ទាបជាចុងក្រោយ នូវមតិរបស់ប្រជាពលរដ្ឋខ្មែរថា តើមតិប្រជាពលរដ្ឋខ្មែរមានការពុះកញ្ជ្រោលក្នុងការគាំទ្រនូវវត្តមានរបស់គាត់ដែរឬទេ ? ឬជាតេស្តរបស់គាត់ចុងក្រោយចង់ដឹងថា មានប្រជាពលរដ្ឋនៅតែស្រឡាញ់គាត់ដែរឬក៏អត់ ?
ទី៣ = គេយល់ថា សម្តីរបស់លោក សម រង្ស៊ី គ្រាន់តែដូចពាក្យចាស់ពោលថា «ទូងៗដូចស្គរតែ ប៉ុណ្ណោះ» យកជាការពិតមិនបានទេ ព្រោះគាត់មិនអាចហ៊ានប្រថុយយកកលអន្ទាក់ឡើយ ។ ដ្បិតអីវាសនារបស់គូកនគាត់ជាច្រើននាក់ឋិតនៅក្នុងពន្ធនាគារដែលមិនអាចមានអន្តរាគមន៍ពីមជ្ឈដ្ឋានណាជួយបាននោះទេ
មែន ! ជាការពិតណាស់ ! គឺលោក សម រង្ស៊ី មានការខកបំណងដ៏ធំម្តងទៅហើយកាលពីគណបក្សនយោបាយរបស់គាត់(សង្គ្រោះជាតិ)ត្រូវបានច្បាប់លុបចេញពីបញ្ជីបោះឆ្នោតកន្លងមក ដោយពុំមានការភ្ញាក់ផ្អើលក្នុងស្រទាប់មហាជនក្នុងការសោកស្តាយ និងគ្មានពុះកញ្ជ្រោលគាំទ្រឡើយ ។ បានសេចក្តីថា ស្ងាត់ច្រៀបសូន្យឈឹង ព្រោះគណបក្សសង្គ្រោះជាតិមិនទាន់មានប្រជាប្រិយភាព ឬមិនទាន់មានឥទ្ធិពលលើទឹកចិត្តប្រជាពលរដ្ឋខ្មែរទាល់តែសោះ ។
ឯការរត់ចោលស្រុករបស់លោក សម រង្ស៊ី នោះ គឺគាត់ជាជនមានទោស ឬហៅថាជាទណ្ឌិតដែលពន្ធនាគារកំពុងរង់ចាំជាស្រេច ។ ម្យ៉ាងវិញទៀត ក្នុងពេលថ្មីៗកន្លងមកនេះ គេឃើញ និងដឹងនិងឮថា លោក សម រង្ស៊ី បានជេរប្រមាថព្រះមហាក្សត្រជាទីសក្ការៈរបស់ជាតិខ្មែរ ផង ប្រការសំខាន់មួយទៀត លោក សម រង្ស៊ី ដើរតួជាជនអនាធិបតេយ្យ មិនគោរពច្បាប់ក្នុងការបញ្ចេញមតិរបស់ប្រជាពលរដ្ឋ ឬប្រាសចាកពីលទ្ធិប្រជាធិបតេយ្យដោយចង់ផ្តួលរំលំរាជរដ្ឋាភិបាលស្របច្បាប់ផង ។ ទាំងនេះ គឺជាទោសកំហុសត្រួតពីលើទោសកំហុសចាស់ដែលទណ្ឌិត សម រង្ស៊ី គ្មានអ្វីត្រូវប្រកែកបាន និងបន្លំឲ្យបានរួចខ្លួននោះទេ ។
ចំពោះប្រការដាច់ខាតដែលមជ្ឈដ្ឋានប្រជាពលរដ្ឋ ក៏ដូចជាអ្នកវិភាគនៅរង់ចាំមើលនោះ គឺថ្ងៃសៅរ៍ទី0៩ វិច្ឆិកា ឆ្នាំ២០១៩ខាងមុខដ៏ខ្លីនេះ ជាថ្ងៃអវសាននៃជីវិតនយោបាយប្រឆាំងចុងក្រោយ របស់លោក សម រង្ស៊ី មិនអាចរំលងបានឡើយ ។ អ៊ីចឹងហើយ ទើបអ្នកវិភាគជាច្រើនបានបញ្ជាក់ថា បើលោក សម រង្ស៊ី មានចិត្តស្លុយជាកូនប្រុសម៉ាត់ណាម៉ាត់ហ្នឹង ដូចពាក្យចាស់ពោលថា មនុស្សយកសំដីពិតមែននោះ ត្រូវតែផ្តាំផ្ញើបរទេសដែលជាអ្នកគាំទ្រខ្លួនថា លាហើយ ! លាដោយខានឃើញមុខ និងលាដោយមិនអាចវិលវិញទៀតទេ ។ ប៉ុន្តែប្រសិនបើលោក សម រង្ស៊ី គ្រាន់តែកុហកភូតភរបោកប្រាស់មជ្ឈដ្ឋានសាធារណៈនោះទេ គឺវាជាការខាតលក្ខណ៍ជាចុងក្រោយមានចរិតអន់ខ្សោយថោកទាបដែលធ្វើឲ្យលោក សម រង្ស៊ី កប់ខ្លួនក្នុងឆាកនយោបាយ ឬជាភាពអស្តង្គតរលត់រស្មី គ្មានថ្ងៃងើបរួចពិតប្រាកដ ៕
