(ខេត្តកំពត)៖ នៅព្រឹក ថ្ងៃអង្គារ ៩កើត ខែកត្តិក ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៥ ខែវិច្ឆិកា ឆ្នាំ ២០១៩ លោក ជាវ តាយ អភិបាលនៃគណៈអភិបាលខេត្តកំពត និងជាប្រធានគណៈកម្មការកាកបាទក្រហមកម្ពុជា សាខាខេត្តកំពត បានអញ្ជើញចែកអំណោយមនុស្សធម៌ដល់ប្រជាពលរដ្ឋចំនួន ៣០០នាក់ មកពី ស្រុកអង្គរជ័យ ស្រុកបន្ទាយមាស និងស្រុកកំពង់ត្រាច នៅវិទ្យាល័យទូកមាស ។
ក្នុងពិធីផ្តល់អំណោយនេះ ក៏មានការអញ្ជើញចូលរួមពី លោក លោកស្រី អភិបាលរងខេត្ត លោក លោកស្រីនាយក នាយករងរដ្ឋបាលខេត្ត ប្រធាន អនុប្រធានមន្ទីរ-អង្គភាពជុំវិញខេត្ត កម្លាំងទាំងបីប្រភេទ សមាជិកគណៈកម្មាធិការ សមាជិកសកម្ម ក្រុមប្រតិបត្តិ យុវជនកាកបាទក្រហម អ្នកស្ម័គ្រចិត្ត អាជ្ញាធរភូមិ ក្រុមប្រឹក្សាឃុំ មេភូមិ និងប្រជាពលរដ្ឋងាយរងគ្រោះ សរុប ៣៩៥នាក់ ។
ស្ថិតក្នុងឱកាសដ៏មានអត្ថន័យនេះ លោក ជាវ តាយ អភិបាលខេត្តកំពត បានពាំនាំនូវការផ្តាំផ្ញើសាកសួរសុខទុក្ខពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ដែលកន្លងតែងតែយកចិត្តទុកដាក់ និងចុះសួរសុខទុក្ខ ដោះស្រាយសម្រាលការលំបាករបស់ប្រជាពលរដ្ឋទាន់ពេលវេលា។
លោកអភិបាលខេត្ត ក៏បានស្នើសុំការយោគយល់ពីបងប្អូនប្រជាពលរដ្ឋទាំងអស់ផងដែរ ដោយជំនួយមនុស្សធម៌មានចំនួនតិចតួចមិនបានសមស្របទៅនឹងទំហំនៃការខ្វះខាតរបស់បងប្អូនឡើយ ប៉ុន្តែទោះជាយ៉ាងណាក៏អំណោយនេះអាចជួយសម្រាលទុក្ខលំបាករបស់បងប្អូនប្រជាពលរដ្ឋយើងបានមួយរយៈផងដែរ។
ឆ្លៀតក្នុងឱកាសនេះផងដែរ លោក ជាវ តាយ អភិបាលខេត្ត ក៏បានអំពាវនាវដល់លោកតា លោកយាយ អុំ ពូ មីង បងប្អូនប្រជាពលរដ្ឋទាំងអស់ សូមកុំចូលរួមជាមួយនឹងចលនាឧទ្ទាមក្រៅច្បាប់ ដែលដឹកនាំដោយឧក្រិដ្ឋជន សម រង្ស៉ី និងបក្សពួក ដែលជាការបំផ្លាញនូវសុខសន្តិភាពរបស់ប្រជាពលរដ្ឋ និងប្រទេសជាតិ។ ហើយនៅថ្ងៃទី ៩ វិច្ឆិកា ខាងមុខនេះ សូមបងប្អូនប្រជាពលរដ្ឋទាំងអស់ចូលរួមពិសារ អំបុក ដើម្បីការពារ ជាតិ សាសនា ព្រះមហាក្សត្រ នៅតាមមូលដ្ឋាននីមួយៗ របស់បងប្អូន។
ចំពោះអំណោយដែលបានចែកជូននាថ្ងៃនេះរួមមាន៖ អង្ករ ៣០គ.ក្រ មី ១កេស ទឹកស៊ីអ៊ីវ ១យួរ ត្រីខ ១យួរ ថវិកាសរុប៦លានរៀល ដោយក្នុងមួយគ្រួសារទទួលបានថវិកា ២ម៉ឺនរៀល៕ សេង ណារិទ្ធ
