(ខេត្តកំពត)៖ ដើម្បីសម្រួលដល់ការធ្វើចរាចរណ៍ក្នុងក្រុងកំពតឲ្យបានកាន់តែប្រសើរឡើង ជាពិសេសរក្សានូវសណ្ដាប់ធ្នាប់ក៏ដូចជាការរួមចំណែកកាត់បន្ថយនូវគ្រោះថ្នាក់ចរាចរណ៍។
នៅរសៀលថ្ងៃទី០៤ ខែវិច្ឆិកា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តបានដឹកនាំ មន្ត្រីជំនាញពាក់ព័ន្ធ មានមន្ទីរធនធានទឹកនិងឧតុនិយមខេត្ត មន្ទីរសាធារណការនិងដឹកជញ្ជូនខេត្ត មន្ទីររៀបចំដែនដីនគរូបនីយកម្មសំណង់ និងសុរិយោដី និងអង្គភាពអគ្គិសនីខេត្តរួមទាំងអាជ្ញាធរមូលដ្ឋានក្រុងសង្កាត់បានអញ្ជើញចុះពិនិត្យសិក្សានិងវាយតម្លៃអំពីផលប៉ះពាល់នៃគម្រោងការកសាងផ្លូវវាងក្រុងមួយខ្សែដែលស្ថិតនៅក្នុងភូមិកំពង់បាយខាងជើង សង្កាត់កំពង់បាយ ក្រុងកំពត ខេត្តកំពត។
តាមគម្រោងនៃការកសាងផ្លូវវាងក្រុងមួយខ្សែនេះមានទទឹង ១៥ ម៉ែត្របណ្ដោយ ១៣៨០ម៉ែត្រធ្វើពីបេតុងសរសៃដែកអមដោយប្រព័ន្ធលូរំដោះទឹកចេញពីក្នុងក្រុងកំពត ដោយផ្លូវនេះតបំបែកចេញពីផ្លូវជាតិលេខ៣ឆ្ពោះមកទល់នឹងផ្លូវបេតុងម៉ាកេងស្របតាមបណ្ដោយផ្លូវរថភ្លើងដែលមានគម្លាតពីផ្លូវរថភ្លើងចំងាយ ១២ម៉ែត្រនិងចិញ្ចើមផ្លូវម្ខាងទៀតមានចំនួន ៣ម៉ែត្រ ក្រោមគម្រោងប្រើប្រាស់ថវិការបស់រដ្ឋបាលខេត្តកំពត។
ផ្លូវវាងក្រុងមួយខ្សែនេះគឺពិតជាមានសារៈសំខាន់ក្នុងការកាត់បន្ថយការកកស្ទះនូវរថយន្តតូចនិងរថយន្តធំបើកបរលើដងផ្លូវជាតិលេខ៣ ក្បែរផ្សារសាមគ្គីក្រុងកំពត និងក៏ដូចជាការកាត់បន្ថយគ្រោះថ្នាក់ចរាចរណ៍ព្រមទាំងរបៀបរៀបរយសណ្ដាប់ធ្នាប់សាធារណៈក្នុងក្រុងកំពត ព្រោះបច្ចុប្បន្នក្រុងកំពតផ្លូវវាងក្រុងប៉ែកខាងជើងឬខាងលិចក្រុងកំពតនៅពុំទាន់មាននៅឡើយ។ហើយនៅថ្ងៃតទៅមុខទៀត ផ្លូវវាងក្រុងមួយខ្សែនេះដែរក៏មានគម្រោងកសាងបន្តទៀតទិសដៅស្របតាមផ្លូវរថភ្លើងនេះដែររហូតទល់នឹងមាត់ព្រែកកំពតក្បែរស្ពានដែករថភ្លើង។ដ្ឋបាលខេត្តមានគម្រោងនឹងធ្វើសំណើទៅរាជរដ្ឋាភិបាលដើម្បីកសាងស្ពានឆ្លងកាត់ព្រែកកំពតផ្លូវវាងក្រុងមួយខ្សែនេះផងដែរ។
ជាមួយនេះ លោក ជាវ តាយអភិបាលខេត្តក៏បានណែនាំជំរុញដល់មន្ត្រីជំនាញពាក់ព័ន្ធទាំងអស់រួមទាំងអាជ្ញាធរមូលដ្ឋានត្រូវធ្វើយ៉ាងណាសហការគ្នាដើម្បីសិក្សាពីផលប៉ះពាល់ក៏ដូចជាគម្រោងផែនការលម្អិតពាក់ព័ន្ធផ្សេងៗនៃគម្រោងការកសាងផ្លូវវាងក្រុងមួយខ្សែនេះឲ្យបានល្អដើម្បីពន្លឿនការកសាងឲ្យបានឆាប់រហ័សតាមលក្ខណៈស្តង់ដារបច្ចេកទេស ឲ្យបានរួចរាល់នៅមុនព្រឹត្តិការណ៍នៃពិធីបុណ្យសមុទ្រលើកទី៨ ជុំទី២ដែលឈានមកដល់នៅចុងឆ្នាំ ២០១៩ នេះដែលខេត្តកំពតត្រូវទទួលធ្វើជាម្ចាស់ផ្ទះ៕ សេង ណារិទ្ធ
