ដើម្បីត្រៀមរៀបចំពិធីប្រណាំងទូកនៅថ្ងៃអាទិត្យទី២៧ ខែតុលា ឆ្នាំ២០១៩ ខាងមុខនេះ ឲ្យប្រព្រឹត្តទៅដោយរលូន ទទួលបានជោគជ័យ បង្កភាពសប្បាយរីករាយជូនបងប្រជាពលរដ្ឋទាំងក្នុង និងក្រៅខេត្ត នៅរសៀលថ្ងៃទី២៥ ខែតុលា ឆ្នាំ២០១៩នេះ រដ្ឋបាលខេត្តស្វាយរៀង បានរៀបចំពិធីប្រណាំងទូកសាកល្បង នៅទន្លេវ៉ៃគោ ក្រុងស្វាយរៀង ខេត្តស្វាយរៀង ដោយមានទូកខ្នាតអន្តរជាតិ១៧គូ រួមទាំងទូកក្តាបីសន្លឹកក្រោមវត្តមាន ឯកឧត្ដម ម៉ែន វិបុល អភិបាល នៃគណៈអភិបាលស្វាយរៀង និងមានការចូលរួមពីឯកឧត្ដម លោកជំទាវសមាជិកក្រុមប្រឹក្សាខេត្ត អភិបាលរងខេត្ត លោក លោកស្រីនាយក នាយករងរដ្ឋបាលសាលាខេត្ត លោកប្រធានមន្ទីរ-អង្គភាព អភិបាលក្រុង ស្រុក និងតំណាងគណៈកម្មការរដឹកនាំទូកដែលចូលរួមប្រណាំងសាកល្បងនៅថ្ងៃនេះ ។
ក្នុងឱកាសនោះដែរ ឯកឧត្តមអភិបាលខេត្តស្វាយរៀងក៏បានធ្វើបទសម្ភាសន៍ជាមួយទូរទស្សន៍BTV News ស្តីពីវឌ្ឍនភាពនៃការរៀបចំពិធីប្រណាំងទូក ជាពិសេសការរៀបចំសន្តិសុខសណ្តាប់ធ្នាប់ជូនបងប្អូនប្រជាពលរដ្ឋដែលមកលេងកម្សាន្តក្នុងឱកាសនៃពិធីនេះផងដែរ។
