(ខេត្តកំពត)៖ នៅព្រឹកថ្ងៃសៅរ៍ ០៨កើត ខែ ពិសាខ ឆ្នាំ កុរ ឯកស័ក ព.ស ២៥៦២ ត្រូវថ្ងៃទី១១ ខែឧសភា ឆ្នាំ២០១៩ លោកបណ្ឌិត ប៉ែន ស៊ីម៉ន ប្រធានគណៈកម្មាធិការទី១០ នៃរដ្ឋសភា បានអញ្ជើញជាអធិបតីភាព ក្នុងពិធីបុណ្យបញ្ចុះខណ្ឌសីមាសម្ពោធឆ្លងព្រះវិហារនិងសមិទ្ធផលនានាវត្តអង្គខ្នាឫស្សីស្រុក ស្ថិតក្នុងភូមិឫស្សីស្រុក ឃុំឫស្សីស្រុកខាងកើតស្រុកកំពង់ត្រាច ខេត្តកំពត។
ពិធីនេះ ក៏មានវត្តមានចូលរួមពីសំណាក់លោកស្រី អ៊ុន សុគន្ធា តំណាងរាស្ត្រមណ្ឌលខេត្តកំពត លោក ខូយ ឃុនហ៊ួរ រដ្ឋលេខាធិការទីស្ដីការគណៈរដ្ឋមន្ត្រី លោក ជាវ តាយ អភិបាល នៃគណៈអភិបាលខេត្តព្រមទាំង លោក លោកស្រី ថ្នាក់ដឹកនាំខេត្តនិងមន្ទីរ អង្គភាពជុំវិញខេត្ត លោកគ្រូ អ្នកគ្រូ សិស្សនិស្សិត និងប្រជាពលរដ្ឋយ៉ាងច្រើនកុះករ។
លោក អូន ខន អភិបាលនៃគណៈអភិបាលស្រុកកំពង់ត្រាច បានឲ្យដឹងថា៖ វត្តអង្គខ្នារឬស្សីស្រុក មានអាយុកាលប្រមាណជាង ២០០ឆ្នាំមកហើយតែនៅក្នុងរបប ប៉ុល ពត ទីអារាមនេះត្រូវបានបំផ្លាញអស់ស្ទើរគ្មានសល់ រហូតដល់ក្រោយថ្ងៃរំដោះ ៧មករា ឆ្នាំ១៩៧៩ វត្តនេះបានរៀបចំកសាងឡើងវិញជាបន្តបន្ទាប់ ក្រោមការយកចិត្តទុកដាក់និងចូលរួមឧបត្ថម្ភគាំទ្រពីសំណាក់ឯកឧត្ដមបណ្ឌិត ប៉ែន ស៊ីម៉ន រួមនិង ព្រះសង្ឃ គណកម្មការអាចារ្យវត្ត ពុទ្ធបរិស័ទនិងសប្បុរសជន ជិតឆ្ងាយធ្វើអោយសមិទ្ធិផលទីអារាមវត្តនេះមានការរីកចម្រើនជាបន្តបន្ទាប់។ជាក់ស្ដែងព្រះវិហារដែលធ្វើពិធីបញ្ចុះខណ្ឌសីមាសម្ពោធឆ្លងនាពេលនេះ បានចាប់ផ្ដើមកសាងឡើង ក្នុងចុងឆ្នាំ២០០៧ និងបានបញ្ចប់ស្ថាពរក្នុងឆ្នាំ២០២០១៩នេះ ដោយប្រើប្រាស់ថវិកាសរុបចំនួនប្រមាណ ៣៦៩.២០០ដុល្លារអាមេរិក។
មានប្រសាសន៍ សំណេះសំណាល លោកបណ្ឌិតទេសរដ្ឋមន្ត្រី ប៉ែន ស៊ីម៉ន បាន ថ្លែងការកោតសរសើរចំពោះព្រះសង្ឃ អាចារ្យគណៈកម្មការវត្ត ពុទ្ធបរិស័ទ សប្បុរសជនរួមនិងអាជ្ញាធរគ្រប់លំដាប់ថ្នាក់ ដែលបានសហការសាមគ្គីគ្នា ក្នុងការរួមចំណែកកសាងនូវសមិទ្ធផលនានានិងព្រះវិហារក្នុងទីអារាមវត្តនេះឡើងដែលសមិទ្ធផលទាំងនេះបានរួមចំណែកបម្រើឲ្យវិស័យព្រះពុទ្ធសាសនាដែលជាសាសនារបស់រដ្ឋ។
ក្នុងឱកាសនោះដែរ លោកបណ្ឌិតទេសរដ្ឋមន្ត្រី ប៉ែន ស៊ីម៉នក៏បានលើកឡើងអំពីបរិបទអំណោយផលនៃប្រទេសជាតិនាពេលបច្ចុប្បន្នដែលកំពុងមានសុខសន្តិភាពពេញលេញ និងមានការអភិវឌ្ឍន៍យ៉ាងខ្លាំងក្លាលើគ្រប់វិស័យ។លោកបណ្ឌិត បានបន្តទៀតថាដោយមើលឃើញពីសច្ចភាពនេះហើយទើប ប្រជាពលរដ្ឋកម្ពុជា ភាគច្រើនបំផុត នៅតែស្រឡាញ់ ជឿជាក់ និងផ្ដល់ទំនុកចិត្តលើការដឹកនាំរបស់សម្ដេចតេជោ ហ៊ុន សែន ជានាយករដ្ឋមន្ត្រីរាល់គ្រប់អាណត្តិនៃការបោះឆ្នោតជ្រើសតាំងតំណាងរាស្ត្រ។
ក្នុងឱកាសនោះដែរ លោកបណ្ឌិត ប៉ែន ស៊ីម៉ន ក៏បានប្រគេនបច្ច័យដល់ព្រះសង្ឃសម្រាប់សីមាឥន្ទកិល-សីមាទិសទាំង៨ទិស រួមនិងថ្លៃ តន្ត្រីសម័យ ល្ខោនបាសាក់និងជូនដល់កម្លាំងប្រដាប់អាវុធ ក្រុមគ្រូពេទ្យ តាជី យាយជី លោកគ្រូ អ្នកគ្រូសិស្ស យុវជនកាកបាទក្រហម យុវជនកាយរិទ្ធព្រះសង្ឃរួមនិង ការចំណាយផ្សេងៗទៀតសរុបថវិកា៥២ លាន ២៤ម៉ឺន៥ពាន់រៀលផងដែរ៕ សេង ណារិទ្ធ
