(ខេត្តកែប)៖ មិនដឹងមូលហេតុអ្វី រថយន្តមួយគ្រឿងដឹកទឹកកកយកទៅបោះឲ្យម៉ូយគ្រឿង ពេលកំពុងបើកបរនៅលើផ្លូវជាតិសុខៗ ស្រាប់តែក្រឡាប់ទម្លាក់ទឹកកកចោលពេញទ្រូងផ្លូវ បង្កភ្ញាក់ផ្អើលដល់អ្នកដំណើរ។
ហេតុការណ៍នេះបានកើតឡើងកាលពីវេលាម៉ោង៣និង៤០នាទីទៀបភ្លឺ ថ្ងៃទី១០ ខែឧសភា ឆ្នាំ២០១៩ ត្រង់ចំណុចខាងកើតរង្វង់មូលសេះសប្រមាណ៣០ម៉ែត្រ ស្ថិតក្នុងភូមិអូរក្រសារ សង្កាត់អូរក្រសារ ក្រុងកែប ខេត្តកែប លើកំណាត់ផ្លូវជាតិលេខ៣៣។
យោងតាមប្រភពព័ត៌មានពីសមត្ថកិច្ចបានឲ្យដឹងថា គ្រោះថ្នាក់នេះគឺបង្កដោយខ្លួនឯង ខណៈអ្នកបើកបររថយន្តផ្ទុកទឹកកកខាងលើបោះពួយមកពីលិចទៅកើតដោយល្បឿនលឿន លុះមកដល់ចំណុចកើតហេតុក៏វាក់អើុជាមួយនឹងអ្នកដំណើរផ្សេងទៀត ពេលនោះអ្នកបើកបររថយន្តបួងចង្កូតដោយបង្ខំ ទើបរថយន្តនោះក្រឡាប់ទាំងកម្រោលបណ្តាលឲ្យធ្លាក់ទឹកកកពាសពេញទ្រូងផ្លូវតែម្តង។
ប៉ូលិសបានបញ្ជាក់ថា រថយន្តនោះដឹកទឹកកកពេញនិងផ្ទុកមនុស្សពីរនាក់មកពីភូមិក្រុងកំពត ដើម្បីយកទឹកកកទៅកាន់ស្រុកកំពង់ត្រាច ប៉ុន្តែមិនទាន់ដល់គោលដៅផងក៏ជួបហេតុការណ៍បែបនេះតែម្តង តែករណីនេះ ពុំបានបង្កគ្រោះថ្នាក់អ្វីធ្ងន់ធ្ងរឡើយ។ ប៉ូលិសបានប្រាប់ទៀតថា អ្នកបើកបរឈ្មោះ អេវ ខុម ភេទប្រុស អាយុ៣៣ឆ្នាំ មានទីលំនៅភូមិដំណាក់កន្ទួត ឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត។
បច្ចុប្បន្នរថយន្តបង្កខ្លួនត្រូវបានសមត្ថកិច្ចអនុញ្ញាតឲ្យម្ចាស់ស្ទួចយកទៅជួសជុលឡើងវិញ ដោយសារពេលជួបគ្រោះថ្នាក់មិនបង្កបញ្ហាដល់អ្នកដំណើរណាម្នាក់ឡើយ៕ សេង ណារិទ្ធ
