កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ ចុះរដ្ឋបាលពិនិត្យទីតាំងអគារ ខុនដូរ (the park way )ស្ថិតនៅសង្កាត់ទួលសង្កែទី១ ខណ្ឌប្ញស្សីកែវ

កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ អនុវត្តតាមបទបញ្ជាផ្ទាល់ពីឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាព រដ្ឋបាលរាជធានីភ្នំពេញ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ ក្រោមការដឹកនាំកម្លាំងចុះអនុវត្តផ្ទាល់ដោយ ឯកឧត្តម ឃ្លាំង ហួត, ឯកឧត្តម ហ៊ុន សុរិទ្ធី ,ឯកឧត្តម ពេញ ធារម្យ ,ឯកឧត្តម អ៉ីមរ៉ន ហាហ្សាន់ ដែលជាអភិបាលរងនៃគណៈអភិបាលរាជធានីភ្នំពេញ លោក-លោកស្រីស្នងការរង និងលោក អភិបាលខណ្ឌប្ញស្សីកែវ ដែលមានការសម្របសម្រួលនីតិវិធី ពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នាព្រឹកថ្ងៃទី៧ខែសីហាឆ្នាំ២០២៦ បានចុះរដ្ឋបាលពិនិត្យទីតាំងអគារ ខុនដូរ (the park way )ស្ថិតនៅសង្កាត់ទួលសង្កែទី១ ខណ្ឌប្ញស្សីកែវ ដើម្បីពិនិត្យបង្រ្កាបបទល្មើសឆបោកតាមប្រព័ន្ធបច្ចេកវិទ្យាខុសច្បាប់ (online scams)។ក្រុមការងារបានចុះពិនិត្យជាក់ស្តែង ចំពោះអគារ A, BនិងC សរុប១,៥៣០បន្ទប់ ជាលទ្ធផលនៃការចុះត្រួតពិនិត្យអគារខាងលើ គឺពុំឃើញមានបទល្មើសឆបោកតាមប្រព័ន្ធបច្ចេកវិទ្យាខុសច្បាប់ (online scams) និងគ្មានបទល្មើសផ្សេងៗនោះឡើយ។បច្ចុប្បន្នកម្លាំងគណៈបញ្ជាការឯកភាពរដ្ឋបាលរាជធានីភ្នំពេញនៅតែបន្តយកចិត្តទុកដាក់ ស្រាវជ្រាវដើម្បីបង្ការនិងបង្រ្កាបបទល្មើសឆបោកតាមប្រព័ន្ធបច្ចេកវិទ្យាខុសច្បាប់ (online scams)នៅក្នុងរាជធានីភ្នំពេញឲ្យកាន់តែមានប្រសិទ្ធភាព ដែលជាការចូលរួម អនុវត្តតាមបទបញ្ជានិងការប្តេជ្ញា យ៉ាងម៉ឺងម៉ាត់ របស់រាជរដ្ឋាភិបាលកម្ពុជា ក្នុងការបោសសម្អាតបទល្មើសឆបោកតាមប្រព័ន្ធបច្ចេកវិទ្យាខុសច្បាប់ (online scams)នៅព្រះរាជាណាចក្រកម្ពុជា ឲ្យមានប្រសិទ្ធភាពបណផុត៕