ខេត្តមណ្ឌលគិរី ៖ នាព្រឹកថ្ងៃទី០៦ ខែសីហា ឆ្នាំ២០២៦ ឯកឧត្តម គង់ គឹមនី អភិបាល នៃគណៈអភិបាលខេត្តមណ្ឌលគិរី បានអញ្ជើញជាអធិបតីក្នុងពិធីជួបសំណេះសំណាល សាកសួរទុក្ខ និងលើកទឹកចិត្តដល់កម្លាំងកងរាជអាវុធហត្ថខេត្តមណ្ឌលគិរី ដោយមានការចូលរួមពីលោកឧត្តមសេនីយ៍ត្រី ទាវ ចាន់ដារ៉ា មេបញ្ជាការកងរាជអាវុធហត្ថខេត្ត ព្រមទាំងលោក មេបញ្ជាការរង នាយសេនាធិការ នាយ-នាយរង និងពលអាវុធហត្ថជាច្រើនរូប ស្ថិតនៅក្នុងក្រុងសែនមនោរម្យ។
ក្នុងឱកាសនោះ លោកឧត្តមសេនីយ៍ត្រី ទាវ ចាន់ដារ៉ា មេបញ្ជាការកងរាជអាវុធហត្ថខេត្តមណ្ឌលគិរី បានសម្តែងនូវការស្វាគមន៍យ៉ាងកក់ក្តៅចំពោះវត្តមានដ៏ខ្ពង់ខ្ពស់របស់ ឯកឧត្តម អភិបាលខេត្ត។ លោកមេបញ្ជាការ បានគូសបញ្ជាក់ថា ដោយអនុវត្តតាមបទបញ្ជាដ៏ខ្ពង់ខ្ពស់របស់ នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស កម្លាំងអាវុធហត្ថខេត្តបាននិងកំពុងខិតខំបំពេញភារកិច្ចយ៉ាងសកម្មក្នុងការថែរក្សាសន្តិសុខ និងសណ្តាប់ធ្នាប់សាធារណៈក្នុងខេត្ត។
លោកឧត្តមសេនីយ៍ត្រី បានបន្តថា កម្លាំងអាវុធហត្ថទាំងអស់បានប្តេជ្ញាចិត្តខ្ពស់ក្នុងការខិតខំហ្វឹកហាត់រៀនសូត្រជាប្រចាំ ទាំងផ្នែកកាយសម្បទា យុទ្ធវិធី និងជំនាញការងារ ដើម្បីពង្រឹងសមត្ថភាពក្នុងការឆ្លើយតបបានទាន់ពេលវេលាចំពោះរាល់សភាពការណ៍ផ្សេងៗ។ ការហ្វឹកហាត់ជាប់មិនដាច់នេះ គឺដើម្បីធានាការពារសន្តិសុខ សុវត្ថិភាព និងសណ្តាប់ធ្នាប់ជូនប្រជាពលរដ្ឋក្នុងមូលដ្ឋានឱ្យបានល្អប្រសើរ ជាពិសេសគឺការបង្កើតបរិយាកាសប្រកបដោយសុវត្ថិភាព និងភាពកក់ក្តៅជូនដល់ភ្ញៀវទេសចរជាតិ និងអន្តរជាតិ ដែលអញ្ជើញមកទស្សនាកម្សាន្តនៅក្នុងខេត្តមណ្ឌលគិរី។
មានប្រសាសន៍សំណេះសំណាលនាឱកាសនោះ ឯកឧត្តម គង់ គឹមនី អភិបាលខេត្តមណ្ឌលគិរី បាននាំនូវការផ្តាំផ្ញើសាកសួរទុក្ខពីសំណាក់ថ្នាក់ដឹកនាំរាជរដ្ឋាភិបាល ព្រមទាំងបានសម្តែងនូវការកោតសរសើរ និងវាយតម្លៃខ្ពស់ចំពោះកងរាជអាវុធហត្ថខេត្ត ដែលបានខិតខំប្រឹងប្រែងលះបង់កម្លាំងកាយចិត្តក្នុងការបំពេញភារកិច្ចការពារជាតិ សន្តិសុខ និងសណ្តាប់ធ្នាប់សាធារណៈនាពេលកន្លងមក។
ក្នុងនោះ ឯកឧត្តមអភិបាលខេត្ត បានផ្តល់អនុសាសន៍ និងណែនាំដល់កម្លាំងកងរាជអាវុធហត្ថទាំងអស់ត្រូវ បន្តពង្រឹងស្មារតីកតញ្ញូធម៌ចំពោះជាតិ សាសនា ព្រះមហាក្សត្រ និងស្មោះត្រង់ចំពោះរាជរដ្ឋាភិបាល។ ត្រូវយកចិត្តទុកដាក់ខ្ពស់លើការងារហ្វឹកហាត់ ឱ្យស្ទាត់ជំនាញលើរាល់យុទ្ធវិធី និងពង្រឹងវិន័យកងទ័ពឱ្យបានម៉ឺងម៉ាត់ជាប្រចាំ។ ត្រូវបង្កើនកិច្ចសហការជិតស្និទ្ធជាមួយអាជ្ញាធរដែនដី និងកងកម្លាំងប្រដាប់អាវុធគ្រប់ប្រភេទ ដើម្បីចុះល្បាត ការពារ និងបង្ក្រាបរាល់បទល្មើសផ្សេងៗឱ្យបានទាន់ពេលវេលា។បង្កើនការការពារសុវត្ថិភាពជូនប្រជាពលរដ្ឋ ព្រមទាំងសម្រួល និងការពារសុវត្ថិភាពដាច់ខាតជូនដល់ភ្ញៀវទេសចរ ដើម្បីរួមចំណែកលើកកម្ពស់វិស័យទេសចរណ៍ និងសេដ្ឋកិច្ចក្នុងខេត្ត។
ដើម្បីលើកទឹកចិត្ត និងសម្រួលដល់ការរស់នៅ ព្រមទាំងការបំពេញការងារប្រចាំថ្ងៃរបស់កងកម្លាំង ឯកឧត្តម គង់ គឹមនី ក៏បាននាំយកនូវថវិកា និងគ្រឿងឧបភោគបរិភោគមួយចំនួនប្រគល់ជូនដល់បញ្ជាការដ្ឋានកងរាជអាវុធហត្ថខេត្ត រួមមាន ថវិកាចំនួន ៥.០០០.០០០ រៀល (ប្រាំលានរៀល) អង្ករចំនួន ២០ បេ ទឹកបរិសុទ្ធចំនួន ៥០ កេស ទឹកក្រូចចំនួន ៣០ កេស មីចំនួន ៥០ កេស ត្រីខកំប៉ុងចំនួន ២០ កេសផងដែរ៕
