(ខេត្តកែប)៖ នារសៀលថ្ងៃសៅរ៍១០រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣០ ខែមីនាឆ្នាំ២០១៩ នេះ លោក កែន សត្ថា អភិបាល នៃគណៈអភិបាលខេត្តកែប បានអញ្ជើញចូលរួមក្នុងពិធីបើកការដ្ឋានសាងសង់ផ្លូវលំក្រាលគ្រួសក្រហមចំនួន០២ខ្សែរ ឆ្លងកាត់ភូមិកោះសោម និងភូមិអំពេង ឃុំអង្កោល ស្រុកដំណាក់ចង្អើរ ដោយខ្សែរទី១ តភ្ជាប់ចេញពីភូមិកោះសោមមកថ្នលជាតិលេខ១៣៣២ប្រវែង១.៤៧៥ម៉ែត្រ ។ ខ្សែរទី២ តភ្ជាប់ចេញពីភូមិអំពេង និងភូមិកោះសោមមកថ្នលជាតិលេខ១៣៣២ ដែលមានប្រវែង១.៦២០ម៉ែត្រ។
ក្រោយពីបានស្ដាប់របាយការណ៍របស់លោក មីុ ជី មេឃុំអង្កោល រួចមក លោក កែន សត្ថា អភិបាលខេត្តកែប បានមានប្រសាសន៍ផ្ដាំផ្ញើដល់បងប្អូនប្រជាពលរដ្ឋដែលបានអញ្ជើញមកចូលរួម នោះ ត្រូវធ្វើយ៉ាងណាជួយថែទាំផ្លូវឲ្យបានល្អ ព្រោះជាផ្លូវរបស់យើងទាំងអស់គ្នា នេះហើយជាការយកចិត្តរបស់ប្រមុខរាជរដ្ឋាភិបាលដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំ។លោកអភិបាលខេត្ត បានក្រើនរំឮកទៀតថា ជាពិតណាស់ បើយើងមានផ្លូវគឺត្រូវតែមានក្តីសង្ឃឹម។
លើសពីនេះ មូលដ្ឋានយើងបើមានផ្លូវស្អាតពិតជាងាយស្រួលឲ្យបងប្អូនប្រជាពលរដ្ឋធ្វើដំណើរបានលឿនរហ័ស ពិសេសងាយស្រួលដល់កូនចៅបានទៅសាលារៀនទៀងទាត់ពេលវេលាទៀតផង។
ជាមួយគ្នានេះ លោកអភិបាលខេត្ត ក៏សូមផ្តាំផ្ញើដល់ប្រជាពលរដ្ឋទាំងចាស់ទាំងក្មេងបើបានផ្លូវល្អហើយ ត្រូវចេះជួយថែរក្សាឲ្យបានគង់វង្ស ហើយសូមបើកបរដោយប្រុងប្រយ័ត្ន និងត្រូវជៀសឲ្យឆ្ងាយពីគ្រឿងញៀន៕
សេង ណារិទ្ធ
