(ខេត្តកែប)៖ នៅរសៀលថ្ងៃទី២៩ ខែមីនា ឆ្នាំ២០១៩នេះ មន្ទីរសុខាភិបាលខេត្តកែប បានធ្វើពិធីបិទសន្និបាតបូកសរុបសមិទ្ធផលសុខាភិបាលឆ្នាំ២០១៨ និងលើកទិសដៅការងារឆ្នាំ២០១៩ ក្រោមអធិបតីភាព លោក កែន សត្ថា អភិបាល នៃគណៈអភិបាលខេត្តកែប អមដំណើរដោយ លោកអភិបាលរងខេត្ត ប្រធាន អនុប្រធាន មន្ទីរអង្គភាពជុំវិញខេត្ត ព្រមទាំងបុគ្គលិកសុខាភិបាលក្នុងអង្គភាពទាំងមូល។
យោងតាមរបាយការណ៍របស់ លោក ម៉ែន សុធីរ ប្រធានមន្ទីរសុខាភិបាលខេត្តកែប បានឲ្យដឹងថា បច្ចុប្បន្នដោយផ្អែកលើសូចនាករសំខាន់ៗនៃកម្មវិធីបន្តពូជ មាតា ទារក និងកុមារបានជះឥទ្ធិពលលើការកាត់បន្ថយមរណភាពមាតានិងទារក នៅតែបន្តស្ថិតក្នុងវឌ្ឍនភាពគួរឲ្យមោទនៈ ជាក់ស្តែងលទ្ធផលបានបង្ហាញថា ពុំមានករណីស្លាប់របស់មាតានិងទារកនោះទេ នៅក្នុងឆ្នាំ២០១៨កន្លងមក ដោយលទ្ធផលនេះបានបញ្ជាក់ថា ចំនួនស្ត្រីកាន់តែកើនឡើងដែលបានសម្រេចចិត្តយ៉ាងត្រឹមត្រូវក្នុងការជ្រើសរើសយកការសម្រាលកូនមានសវត្ថិភាព នៅមូលដ្ឋានសុខាភិបាល ពីឆ្នាំ២០១៥ ដល់ឆ្នាំ២០១៨ ស្ថិតក្នុងអត្រា៥០%។ចំពោះការសម្រាលកូនដោយឆ្មបបុរាណ គឺពុំមានឡើយ ហើយស្ត្រីមានផ្ទៃពោះបានទទួលការពិនិត្យផ្ទៃពោះមុនពេលសម្រាលយ៉ាងតិច២ដង មានចំនួនកាន់តែច្រើនឡើងៗ។
លោកម៉ែន សុធីរ បានបញ្ជាក់ទៀតថា នៅឆ្នាំ២០១៩នេះ ដោយផ្អែកលើយុទ្ធសាស្ត្រចតុកោណដំណាក់កាលទី៣ នៃរាជរដ្ឋាភិបាលបន្តផ្តោតលើការបង្កើន ការសម្រាលកូនដោយឆ្មបជំនាញ ពង្រីកសេវាសម្ភពសង្គ្រោះបន្ទាន់ និងសេវាថែទាំទារក ពង្រីកសេវាផ្តល់មធ្យោបាយពន្យាកំណើត បង្កើនអត្រាគ្របដណ្តប់នៃការផ្តល់ថ្នាំបង្ការ ពង្រឹងវិធានការបង្ការ និងកែលម្អគុណភាព សេវាថែទាំព្យាបាលជំងឺឆ្លង ជំងឺមិនឆ្លងរាំុរ៉ៃ ព្រមទាំងបង្កើនប្រសិទ្ធភាពអន្តរាគមន៍សុខភាពសាធារណៈ។បន្តពង្រីក និងពង្រឹងប្រព័ន្ធសុខាភិបាលដូចជា ពង្រីកហេដ្ឋារចនាសម្ព័ន្ធ មន្ទីរពេទ្យខេត្ត តំឡើងកម្រិត ពីCPA1 ទៅ CPA2 បំពាក់ឧបករណ៍ បរិក្ខាពេទ្យ បច្ចេកវិទ្យា អភិវឌ្ឍព័ត៌មានវិទ្យា ពង្រឹងការអនុវត្តមូលនិធិសមធម៌ ពង្រឹងការគ្របដណ្តប់សេវាឯកជន ពង្រឹងគុណភាពអនាម័យអាហារដ្ឋាន ភោជនីយដ្ឋាននិងរីស៊ត សណ្ឋាគារ ផ្ទះសំណាក់ និងបន្តពង្រឹងកិច្ចសហការល្អជាមួយស្ថាប័នពាក់ព័ន្ធ និងដៃគូអភិវឌ្ឍផងដែរ។
ក្នុងឱកាសបិទសន្និបាត លោក កែន សត្ថា អភិបាលខេត្តកែប បានគូសបញ្ជាក់ថា រាជរដ្ឋាភិបាលបានបង្កើនថវិកាសម្រាប់វិស័យសុខាភិបាលជារៀងរាល់ឆ្នាំ ពិសេសបានអនុវត្តគម្រោងលើកទឹកចិត្តជាច្រើនក្រៅពីប្រាក់បៀវត្ស រួមមាន៖ កន្សោមអាទិភាព មូលលិធិសមធម៌ ការផ្តល់ប្រាក់លាភការបន្ថែមលើកទឹកចិត្តដល់ឆ្មបដែលបានបង្កើតកូនរស់ ព្រមទាំងប្រាក់រង្វាន់នៃការប្រកួតប្រជែងលើការផ្តល់សេវាក្នុងវិស័យសាធារណៈ ក្នុងគោលបំណងរួមគ្នាក្នុងការធ្វើឲ្យប្រសើរឡើង នូវការផ្តល់សុខាភិបាលប្រកបដោយប្រសិទ្ធភាព គុណភាព គុណធម៌ សមធម៌ ពិសេសសំដៅធ្វើយ៉ាណាកាត់បន្ថយអត្រាឈឺ និងស្លាប់របស់មាតា-ទារក និងកុមារ កាត់បន្ថយអត្រាឈឺនិងស្លាប់ដោយជំងឺឆ្លង និងបន្ថយបន្ទុកជំងឺមិនឆ្លង ព្រមទាំងបញ្ហាសុខភាពផ្សេងៗ ឲ្យបានជាអតិបរិមា។ តាមរយៈលទ្ធផលទទួលបាននាពេលនេះ សបញ្ជាក់ឲ្យឃើញថា ស្ថានភាពសុខភាពរបស់ស្ត្រីនិងកុមារ និងប្រជាជនកម្ពុជាមានលក្ខណៈល្អប្រសើរបន្តិចម្តងៗ ជារៀងរាល់ឆ្នាំនៅទូទាំងប្រទេស ជាពិសេសនៅខេត្តកែបយើងតែម្តង។ ទន្ទឹមនេះត្រូវយកចិត្តទុកដាក់លើសុខភាពរបស់មាតា-ទារក និងកុមារតូចៗក្នុងចំណោមគ្រួសារក្រីក្រនៅទីជនបទ និងតំបន់ដាច់ស្រយាលនៅតែជាបញ្ហាប្រឈមសម្រាប់សង្គមជាតិ។
លោកអភិបាលខេត្តបានបញ្ជាក់ទៀតថា ការលើកកម្ពស់សេវាសាធារណៈ និងអាហារូបត្ថម្ភគឺជាកិច្ចការអាទិភាពមួយដែលរាជរដ្ឋាភិបាលតែងតែផ្តល់ការយកចិត្តទុកដាក់ខ្ពស់បំផុត ក្នុងនីតិកាលកន្លងមក ក៏ដូចជានីតិកាលទី៦នេះ។ដូច្នេះដើម្បីឲ្យប្រព័ន្ធសុខាភិបាលកម្ពុជាក្លាយជាប្រព័ន្ធសុខាភិបាលដែលមានប្រជាប្រិយភាព ប្រសិទ្ធភាព គុណធម៌ និងកាត់បន្ថយការប្រើប្រាស់សេវាសុខាភិបាលនៅក្រៅប្រទេស ដែលធ្វើឲ្យខាតពេលវេលា និងថវិកាច្រើន លោកសូមឲ្យមន្ទីរសុខាភិបាល មន្ទីរអង្គភាពវិស័យពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ត្រូវយកចិត្តទុកដាក់ រួមសហការគ្នាអនុវត្តការងារឲ្យកាន់តែមានគុណភាព និងមានប្រសិទ្ធភាពខ្ពស់ថែមទៀត។
ជាទីបញ្ចប់គណៈអធិបតី ក៏បានប្រគល់ប្រាក់រង្វាន់ដល់មន្ត្រី បុគ្គលិក នៃមន្ទីរពេទ្យបង្អែក និងតាមមណ្ឌលសុខភាពនិមួយៗដែលមានស្នាដៃឆ្នើម និងបានជូននូវវត្ថុអនុស្សារីយ៍ ដល់សមាជិក សមាជិកា ក្នុងអង្គពិធីនេះផងដែរ៕
សេង ណារិទ្ធ
