(ខេត្តកែប)៖ ផ្លូវលំក្រាលក្រួសល្បាយថ្មភ្នំ១ខ្សែ តភ្ជាប់ពីវង្វង់មូលភូមិចំការបី ឃុំពងទឹក ស្រុកដំណាក់ចង្អើរ ខេត្តកែប ដែលមានប្រវែង ៣.៦០០ម៉ែត្រ ត្រូវបានបើកការដ្ឋានជួសជុល នៅព្រឹកថ្ងៃទី២៩ ខែមីនា ឆ្នាំ២០១៩នេះ ក្រោមវត្តមាន លោក កែន សត្ថា អភិបាល នៃគណៈអភិបាលខេត្តកែប និង លោកបណ្ឌិត យឿង សុខុន មេបញ្ជាការយោធភូមិភាគ៣ និងជាប្រធានក្រុមការងារចុះជួយភូមិចំការបី អមដំណើរដោយលោក លោកស្រីជាអភិបាលរងខេត្ត លោក លោកស្រីជាប្រធាន អនុប្រធាន មន្ទីរអង្គភាពជំុវិញខេត្ត កងកម្លាំងប្រដាប់អាវុធទាំងបី លោកស្រីអភិបាលស្រុក អាជ្ញាធរមូលដ្ឋាន និងប្រជាពលរដ្ឋក្នុងតំបន់។
តាមរបាយការណ៍របស់លោក ហង្ស សាវ៉ន ប្រធានមន្ទីរអភិវឌ្ឍន៍ជនបទខេត្តកែប បានឲ្យដឹងថា ក្នុងឆ្នាំ២០១៩នេះ មន្ទីរអភិវឌ្ឍន៍ជនបទបានទទួលថវិកាពីរាជរដ្ឋាភិបាល តាមរយៈក្រសួងអភិវឌ្ឍន៍ជនបទ សម្រាប់ជួសជុលថែទាំផ្លូវជាលក្ខណៈខួបក្រាលក្រួសល្បាយថ្មភ្នំចំនួន៤ខ្សែ ស្ថិតក្នុងភូមិសាស្ត្រក្រុងកែប និងស្រុកដំណាក់ចង្អើរ ខេត្តកែប មានប្រវែងសរុប ១១.៤៧០ម៉ែត្រ ទទឹងខ្នងលើ៤ម៉ែត្រ និងសាងសង់លូប្រអប់មុខ២ទំហំ ៦ម×៨មផងដែរ។ លោកបានបញ្ជាក់ថា ចំពោះផ្លូវដែលកំពុងជួសជុលនាពេលនេះ ត្រូវបានតភ្ជាប់ពីផ្លូវលេខ១៣៣៥ នៃភូមិចំការបី មានប្រវែង៣.៦០០ម៉ែត្រ ទទឹងខ្នងលើ ៤ម៉ែត្រ។
ជាមួយនេះ លោកបណ្ឌិត យៀង សុខុន ប្រធានក្រុមការងារចុះជួយភូមិចំការបី បានលើកឡើងថា ភូមិសាស្ត្រភូមិចំការបី(ភ្នំវល្លិ៍)កាលពីមុនជាតំបន់គ្រប់គ្រងដោយកងទ័ពខ្មែរក្រហម ដែលមានបង្កប់ដោយគ្រាប់យុទ្ធភណ្ឌមិនទាន់ផ្ទុះជាច្រើនប្រភេទ ដូចក្បាលគ្រាប់ និងជាមីនជាដើម។ប៉ុន្តែដោយសារគោលនយោបាយឈ្នះ ឈ្នះ របស់សម្តេចតេជោ ហ៊ុន សែន បានធ្វើឲ្យតំបន់នេះប្រែក្លាយជាតំបន់មានការអភិវឌ្ឍន៍ រីកចម្រើនលើគ្រប់វិស័យ ពិសេសផ្លូវថ្នល់ជាដើម។ល។លោកបណ្ឌិតបានបញ្ជាក់ទៀតថា ឥឡូវនេះស្រុកទេសមានសុខសន្តិភាព និងមានការរីកចម្រើនគ្រប់វិស័យ យើងចង់ទៅកម្សាន្តនៅទីណាក៏បាន។ដូច្នេះ សូមបងប្អូនរួមគ្នាថែរក្សាសន្តិភាពនេះឲ្យបានគង់វង្សជាដរាប។
ក្នុងឱកាសបើកការដ្ឋាននាពេលនេះ លោក កែន សត្ថា អភិបាលខេត្តកែប បានគូសបញ្ជាក់ថា ផ្តើមចេញពីលទ្ធផលការងាររីកចម្រើនលើគ្រប់វិស័យ ស្ថិតតាមភូមិសាស្ត្រនានាទូទាំងប្រទេស គឺបានកើតឡើងដោយសារប្រទេសយើង មានសុខសន្តិភាពដ៏ពិតប្រាកដ។យ៉ាងណាមិញខេត្តកែបដែលជាខេត្តទេសចរណ៍ ក៏ត្រូវបានជំរុញការស្តារនូវហេដ្ឋារចនាសម្ព័ន្ធមានការរីកលូតលាស់គ្រប់ផ្នែក គ្រប់វិស័យ ពិសេសការងារស្ថាបនាផ្លូវជាតិ និងផ្លូវលំជាដើម សម្រាប់ងាយស្រួលឲ្យបងប្អូនប្រជាពលរដ្ឋធ្វើដំណើរ ព្រោះថានៅទីណាក៏យើងត្រូវការផ្លូវ ថ្នល់ ជាកត្តាចាំបាច់ មិនខុសនឹងពាក្យថា បើយើងមានផ្លូវល្អត្រូវតែមានក្តីសង្ឃឹម។
លោកអភិបាលខេត្តបានបន្ថែមទៀតថា បច្ចុប្បន្នក្នុងភូមិសាស្ត្រនេះ ក្រៅពីមានផ្លូវលំស្អាត និងផ្លូវក្រាលកៅស៊ូល្អ យើងក៏មានវត្តអារាម មណ្ឌលសុខភាពកាន់តែខិតជិត សម្រាប់ផ្តល់សេវាថែទាំ និងពិគ្រោះព្យាបាលជំងឺទៀតផង។ដូច្នេះលោកសូមផ្តែផ្តាំដល់បងប្អូនប្រជាពលរដ្ឋ បើមានបញ្ហាផ្នែកសុខភាព សូមប្រញាប់រួសរាន់ទៅកាន់មណ្ឌលសុខភាព ដើម្បីពិនិត្យនិងព្យាបាលជំងឺជាបន្ទាន់។ជាមួយគ្នានេះ លោកសូមដាស់តឿនដល់បងប្អូនត្រូវប្រុងប្រយ័ត្នពីបញ្ហាការធ្វើចរាចរ សូមកុំបើកបរលឿនហួសកម្រិត ជៀសវាងកុំឲ្យមានគ្រោះថ្នាក់ចរាចរកើតឡើង និងជៀសឲ្យឆ្ងាយពីគ្រឿងញៀន៕ សេង ណារិទ្ធ
