លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ តែងតែដាក់បទបញ្ជាជាប្រចាំឲ្យអភិបាលខណ្ឌទាំង១៤ បន្ដត្រូវចុះត្រួតពិនិត្យទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា និងផ្សព្វផ្សាយអនុក្រឹត្យលេខ០៣ ឲ្យកាន់តែសកម្ម និងមិនរាថយដាច់ខាត ធ្វើយ៉ាងណាត្រូវតែធានាលុបបំបាត់ ឲ្យអស់នូវបទល្មើសក្នុងមូលដ្ឋានរបស់ខ្លួនទាំងស្រុង។
លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឲ្យដឹងនាព្រឹកថ្ងៃទី៤ ខែមិថុនា ឆ្នាំ២០២៦នេះថា ជាក់ស្តែងគិតត្រឹមថ្ងៃទី៣ ខែមិថុនា ឆ្នាំ២០២៦នេះ គណៈបញ្ជាការឯកភាពរដ្ឋបាលរាជធានីភ្នំពេញ រដ្ឋបាលខណ្ឌទាំង១៤ បានចុះត្រួតពិនិត្យតាមទីតាំងអគារខុនដូរ អាផាតមិន បុរី ផ្ទះសំណាក់ និងសណ្ឋាគារ ទីតាំងរស់នៅប្រមូលផ្តុំមួយចំនួន ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) និងផ្សព្វផ្សាយអនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ របស់រាជរដ្ឋាភិបាលកម្ពុជា ស្ដីពីការគ្រប់គ្រងសន្ដិសុខសុវត្ថិភាពតាមទីតាំងរស់នៅប្រមូលផ្ដុំ ក្នុងភូមិសាស្ដ្ររាជធានីភ្នំពេញ បានចំនួន៩៤ទីតាំង រកឃើញជនបរទេសស្នាក់នៅសរុបចំនួន៤៨០នាក់ (ស្រី១៤៤នាក់) ក្នុងនោះជនបរទេសដែលស្នាក់នៅដោយពុំមានលិខិត ឆ្លងដែនមានចំនួន៦នាក់។
លោកស្រីអ្នកនាំពាក្យ បានបញ្ជាក់ទៀតថា ក្នុងថ្ងៃនេះដែរ នៅខណ្ឌសែនសុខ ក្រុមការងារបានចុះត្រួតពិនិត្យទីតាំងខុនដូរ ពិភពថ្មីសែនសុខ ស្ថិតនៅក្នុងភូមិ សំរោងទាវ សង្កាត់ក្រាំងធ្នង់ មាន៨អគារ រកឃើញជនបរទេសស្នាក់នៅសរុបចំនួន៣៦នាក់ (ស្រី២នាក់) ពុំមានលិខិតឆ្លងដែន៣នាក់។
ក្រុមការងារបានរកឃើញបទល្មើសឆបោកតាមប្រព័ន្ធបច្ចេកវិទ្យា ១ករណី នៅអគារទី៥ ជាន់ទី១២ បន្ទប់១២០១ ដោយបានឃាត់ខ្លួនជនសង្ស័យជាជនជាតិចិន ៣នាក់ ព្រមទាំងសម្ភាររួមមាន Laptop ចំនួន១គ្រឿង និងទូរស័ព្ទ ចំនួន៣គ្រឿង។ តាមការធ្វើកោសល្យវិច័យរបស់ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ រកឃើញថា មានជាប់ពាក់ព័ន្ធករណីសង្ស័យប្រព្រឹត្តអំពើឆបោកតាមប្រព័ន្ធបច្ចេកវិទ្យា។
លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ បានបន្ថែមថា ក្រោយចប់ប្រតិបត្តិការ ជនសង្ស័យ និងសម្ភារខាងលើ ត្រូវបានបញ្ជូនទៅស្នងការដ្ឋាននគរបាល រាជធានីភ្នំពេញ ដើម្បីបន្ដនីតិវិធី ហើយចំពោះទីតាំងបន្ទប់ពាក់ព័ន្ធករណីនេះ ក្រុមការងារបានសម្រេចបិទឃ្លុំបណ្ដោះអាសន្ន។
ជាមួយគ្នានេះដែរ ស្នងការដ្ឋានននគរបាលរាជធានីភ្នំពេញ បានអនុវត្តការផាកពិន័យចំពោះម្ចាស់ ឬអ្នកគ្រប់គ្រងទីតាំងរស់នៅប្រមូលផ្ដុំតាមអនុក្រឹត្យលេខ០៣ ចំនួន២ទីតាំង មនុស្សចំនួន៩នាក់ គិតជាថវិកាសរុបបានចំនួន៣៦,០០០,០០០រៀល (សាមសិបប្រាំមួយលានរៀល)៕
