ពោធិ៍សាត់៖ នាថ្ងៃទី១ ខែមិថុនា ឆ្នាំ២០២៦ លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំមន្ត្រីរាជការ អាជ្ញាធរមូលដ្ឋាន ក្រុមយុវជន និងប្រជាពលរដ្ឋយ៉ាងច្រើនកុះករ បើកយុទ្ធនាការដាំដើមក្ងោក ចំនួន៣០០ដើម នៅលើកំណាត់ផ្លូវជាតិលេខ៥៥ (ចាប់ពីចំណុចបំបែកផ្លូវជាតិលេខ៥ ស្ថិតក្នុងឃុំស្នាមព្រះ ស្រុកបាកាន រហូតដល់ផ្លូវបំបែកវត្តហ្លួង ស្ថិតក្នុងសង្កាត់លលកស ក្រុងពោធិ៍សាត់) ដែលជាវិថីឆ្លងកាត់ទីសក្ការៈបូជនីយដ្ឋាន ទេពឧកញ៉ា ឃ្លាំង មឿង និងជំទាវ ខាន់ ខៀវ។
ដើមក្ងោកដែលមានកម្ពស់ចន្លោះពី ២ទៅ៤ម៉ែត្រដែលត្រូវដាំនេះ គឺជាអំណោយដ៏ថ្លៃថ្លារបស់ លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ផ្តល់ជូនរដ្ឋបាលខេត្ត តាមរយៈមន្ទីរបរិស្ថានខេត្តពោធិ៍សាត់។
ថ្លែងក្នុងឱកាសនោះ លោក ខូយ រីដា បានគូសបញ្ជាក់ថា ការបំផុសចលនាដាំកូនឈើឱ្យបានច្រើន និងគ្រប់ទីកន្លែង គឺជាឆ្លើយតបទៅនឹងយុទ្ធសាស្ត្រចក្រាវិស័យបរិស្ថាន ដែលផ្តោតលើមុំយុទ្ធសាស្ត្រអាទិភាពចំនួន៣ គឺ «ស្អាត បៃតង និងចីរភាព»។ យុទ្ធនាការនេះមិនត្រឹមតែជួយលើកកម្ពស់សោភ័ណភាពខេត្តប៉ុណ្ណោះទេ ប៉ុន្តែថែមទាំងចូលរួមចំណែកបង្កើតគម្របព្រៃឈើ និងកសាងភាពធន់ទៅនឹងការប្រែប្រួលអាកាសធាតុ, គាំទ្រយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ក្នុងការជំរុញសេដ្ឋកិច្ចបៃតង និងរួមចំណែកសម្រេចចក្ខុវិស័យវែងឆ្ងាយ ក្នុងការធ្វើឱ្យកម្ពុជាក្លាយជាប្រទេសអព្យាក្រឹតកាបូននៅឆ្នាំ២០៥០ ដែលកម្ពុជាជាប្រទេសដំបូងគេ ក្នុងតំបន់អាស៊ីអាគ្នេយ៍ ដែលបានដាក់ចេញយុទ្ធសាស្ត្ររយៈពេលវែងនេះ។
លោកបន្ថែមថា ដើម្បីបន្តនិរន្តរភាពនេះ រដ្ឋបាលខេត្តពោធិ៍សាត់បានដាក់ចេញផែនការសកម្មភាព ទៅគ្រប់បណ្តាក្រុង ស្រុក ឃុំ សង្កាត់ និងមន្ទីរអង្គភាពជុំវិញខេត្ត ឱ្យបន្តបំផុសចលនាដាំដើមឈើចម្រុះនៅតាមដងផ្លូវ សាលារៀន និងទីសាធារណៈនានា ពិសេសក្នុងរដូវវស្សានេះ។
ក្នុងនាមរដ្ឋបាលខេត្ត និងប្រជាពលរដ្ឋខេត្តពោធិ៍សាត់ទាំងមូល លោកអភិបាលខេត្ត បានថ្លែងអំណរគុណយ៉ាងជ្រាលជ្រៅជូនចំពោះ លោករដ្ឋមន្ត្រីក្រសួងបរិស្ថាន ដែលតែងតែគិតគូរ និងយកចិត្តទុកដាក់ខ្ពស់ លើវិស័យព្រៃឈើ និងបរិស្ថាន តាមរយៈការផ្តល់កូនឈើសម្រាប់ដាំដុះនាពេលនេះ។
គួរជម្រាបជូនថា ដើមក្ងោក ជាប្រភេទរុក្ខជាតិឈើធំ មានមែកធាងលាតសន្ធឹងធំទូលាយដូចឆត្រ ដែលផ្តល់ម្លប់យ៉ាងល្អ។ រុក្ខជាតិនេះមានភាពទាក់ទាញខ្លាំង ដោយសារវាផ្ដល់ផ្កាពណ៌ក្រហមឆ្អៅ រីកស្គុះស្គាយយ៉ាងស្រស់ស្អាតនៅចន្លោះខែមេសា ដល់ខែមិថុនា ដែលជានិមិត្តរូបនៃការចូលមកដល់នៃរដូវវស្សា ព្រមទាំងផ្តល់នូវភាពត្រជាក់ត្រជុំ និងសោភ័ណភាពស្រស់បំព្រងសម្រាប់ដងវិថី៕
