(ខេត្តកំពត)៖ សន្និបាតបូកសរុបលទ្ធផលការងារសុខាភិបាលឆ្នាំ២០១៨ និងលើកទិសដៅផែនការអនុវត្តន៍បន្តឆ្នាំ២០១៩ របស់មន្ទីរសុខាភិបាល ខេត្តកំពត ត្រូវបានរៀបចំឡើងនៅព្រឹកថ្ងៃពុធ ៧រោច ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៧ ខែមីនា ឆ្នាំ២០១៩ ក្រោមអធិបតីភាព លោក ញ៉ែម សូភឿន អនុរដ្ឋលេខាធិការក្រសួងសុខាភិបាល អមដំណើរដោយសហការីចំណុះរដ្ឋបាលខេត្ត កងកម្លាំងប្រដាប់អាវុធទាំងបី និងមន្ត្រីចំណុះក្នុងជួរអង្គភាពទាំងមូល។
តាមរបាយការណ៍របស់ លោកវេជ្ជបណ្ឌិត ញា ប៊ុនថន ប្រធានមន្ទីរសុខាភិបាលខេត្តកំពត បានឲ្យដឹងថា វិស័យសុខាភិបាល ជាជ្រុងមួយនៃយុទ្ធសាស្ត្រចតុកោណ និងមានការយកចិត្តទុកដាក់ខ្ពស់ពីសំណាក់រាជរដ្ឋាភិបាល ក្នុងការផ្តល់លទ្ធភាពដល់ក្រសួងសុខាភិបាល ក៏ដូចជាមន្ទីរសុខាភិបាល បានអនុវត្តនូវគោលនយោបាយ ក្នុងការកាត់បន្ថយអត្រាឈឺនិងស្លាប់ របស់មាតា-កុមារ ព្រមទាំងជំងឺឆ្លង-ជំងឺមិនឆ្លង និងកត្តាគ្រោះថ្នាក់នានា ដូចជាគ្រោះទឹកជំនន់ និងគ្រោះមហន្តរាយជាដើម។
លោកវេជ្ជបណ្ឌិតបានបញ្ជាក់ទៀតថា ក្រោមការចង្អុលបង្ហាញពីក្រសួងសុខាភិបាល និងមានការណែនាំផ្ទាល់ ពីសំណាក់ថ្នាក់ដឹកនាំខេត្ត និងមានកិច្ចសហប្រតិបតិ្តការជាមួយបណ្តាមន្ទីរ-អង្គភាពពាក់ព័ន្ធនិងអង្គការដៃគូអភិវឌ្ឍនានាក្នុងខេត្តកំពត បានធ្វើឲ្យមន្ទីរសុខាភិបាល មានឱកាសនិងលទ្ធភាពគ្រប់គ្រាន់ក្នុងការផ្តល់សេវាសុខាភិបាលឲ្យកាន់តែមានប្រសិទ្ធភាព និងប្រសិទ្ធផល ក្នុងការសម្រេចបាននូវអត្រាគ្របដណ្តប់ខ្ពស់និងកាត់បន្ថយបានអតិបរិមានូវអត្រាស្លាប់របស់មាតា-ទារកនិងកុមារ,ការឈឺនិងស្លាប់ដោយសារជំងឺឆ្លង សំដៅឆ្លើយតបគោលដៅអភិវឌ្ឍន៍ប្រកបដោយស្ថេរភាព។
ថ្លែងក្នុងឱកាសបើកសន្និបាត លោក ញ៉ែម សូភឿន អនុរដ្ឋលេខាធិការក្រសួងសុខាភិបាល បានបញ្ជាក់ថា ដើម្បីចូលរួមលើកកម្ពស់ការអនុវត្តន៍នូវយុទ្ធសាស្ត្រចតុកោណសីុជម្រៅដំណាក់កាលទី៤ របស់រាជរដ្ឋាភិបាលនិងដើម្បីកែលម្អសូចនករសុខភាពសំខាន់ៗឲ្យកាន់តែប្រសើរឡើងថែមទៀត ស្របតាមផែនការយុទ្ធសាស្ត្រអភិវឌ្ឍន៍ជាតិ២០១៤-២០១៨ របស់រាជរដ្ឋាភិបាលកម្ពុជានីតិកាលទី៦ នៃរដ្ឋសភាជាតិកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលមានចក្ខុវិស័យវែងឆ្ងាយ និងត្រឹមត្រូវសម្រាប់ការអភិវឌ្ឍប្រទេសជាតិ និងបានធ្វើឲ្យមានវឌ្ឍនភាពជាច្រើនដូចជា៖ ហេដ្ឋារចនាសម្ព័ន្ធរូបវ័ន្ត,សន្តិសុខ សណ្តាប់ធ្នាប់សាធារណៈ ស្ថេរភាពនយោបាយ, ទេសចរណ៍ ,ការអភិវឌ្ឍធនធានមនុស្ស ជាពិសេសនៅពេលថ្មីៗនេះរាជរដ្ឋាភិបាលបានអនុវត្តសមហរកម្ម កាន់តែសីុជម្រៅទៅក្នុងតំបន់ និងពិភពលោកលើការផ្តល់សេវាសាធារណៈលើកកម្ពស់ស្ថានភាពសុខភាពប្រជាជនកម្ពុជា ពិសេសសុខភាពស្ត្រី, កុមារ និងប្រជាជនក្រីក្រ ដោយបានដាក់ចេញនូវគោលនយោបាយបេឡាជាតិរបបសន្តិសុខសង្គមនិងមូលនិធិសមធម៌សុខាភិបាល៕
សេង ណារិទ្ធ
