ស្វាយរៀង៖ លោក ម៉ែន អេង អភិបាលរងខេត្ត តំណាង លោក ប៉េង ពោធិ៍សា អភិបាលខេត្តស្វាយរៀង ប្រតិភូវៀតណាម ដឹកនាំដោយលោកវរសេនីយ៍ឯក Nguyễn Văn Cường អនុប្រធាននាយកដ្ឋាននគរបាលស៊ើបអង្កេតបទល្មើសគ្រឿងញៀន និងដោយមានការសម្របសម្រួលពីអាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា ដែលមានវត្តមានចូលរួមពីឧត្តមសេនីយ៍ឯក ជ័យ បុប្ផា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន នៅថ្ងៃទី២៧ ខែឧសភា ឆ្នាំ២០២៦ បានរៀបចំកិច្ចប្រជុំពិភាក្សាការងារជាមួយក្រុមការងារក្រសួងនគរបាលនៃសាធារណរដ្ឋសង្គមនិយមវៀតណាម និងចុះសិក្សាទីតាំងគ្រោងសាងសង់មជ្ឈមណ្ឌលបន្សាប និងស្តារនីតិសម្បទាអ្នកញៀនគ្រឿងញៀន។
គោលបំណងសំខាន់នៃកិច្ចប្រជុំ និងការចុះពិនិត្យទីតាំង គឺដើម្បីសិក្សាឈ្វេងយល់បន្ថែមលើគម្រោងសាងសង់មជ្ឈមណ្ឌលបន្សាប និងស្តារនីតិសម្បទាអ្នកញៀនគ្រឿងញៀន នៅលើផ្ទៃដីជាង ៥៣ហិកតា ស្ថិតនៅឃុំក្រសាំង ស្រុករមាសហែក ខេត្តស្វាយរៀង។
ក្នុងឱកាសនោះ ភាគីទាំងពីរបានពិភាក្សាយ៉ាងស៊ីជម្រៅលើទិដ្ឋភាពច្បាប់ ប្លង់ទីតាំង សាវតាដី និងការរៀបចំហេដ្ឋារចនាសម្ព័ន្ធចាំបាច់នានា ដើម្បីធានាថាការសាងសង់នឹងដំណើរការទៅដោយរលូន និងមានប្រសិទ្ធភាពខ្ពស់។ ក្រៅពីកិច្ចប្រជុំនៅសាលាខេត្ត ក្រុមការងារបានចុះពិនិត្យស្ថានភាពភូមិសាស្ត្រជាក់ស្តែង និងពិនិត្យលទ្ធភាពប្រើប្រាស់ច្រកទ្វារព្រំដែន ដែលនៅជិតទីតាំងសាងសង់ សម្រាប់ការដឹកជញ្ជូនសម្ភារសំណង់ និងបរិក្ខារផ្សេងៗ។
លោក ម៉ែន អេង អភិបាលរងខេត្ត បានគូសបញ្ជាក់ពីមិត្តភាព និងកិច្ចសហប្រតិបត្តិការដ៏ល្អប្រពៃរវាងកម្ពុជា-វៀតណាម ដែលជាបងប្អូនជួយគ្នាទៅវិញទៅមក។
លោកបានវាយតម្លៃខ្ពស់ចំពោះគម្រោងនេះថា ជាសមិទ្ធផលថ្មីមួយទៀតក្នុងខេត្តស្វាយរៀង ដែលនឹងរួមចំណែកយ៉ាងសំខាន់ក្នុងការផ្តល់សេវាព្យាបាល និងស្តារនីតិសម្បទាដល់អ្នកញៀនគ្រឿងញៀន មិនត្រឹមតែក្នុងខេត្តស្វាយរៀងប៉ុណ្ណោះទេ ប៉ុន្តែថែមទាំងសម្រាប់ខេត្តជិតខាងដូចជាព្រៃវែង និងត្បូងឃ្មុំផងដែរ។
តំណាងភាគីវៀតណាម លោកវរសេនីយ៍ឯក Nguyễn Văn Cường ក៏បានបង្ហាញពីឆន្ទៈយ៉ាងមុតមាំក្នុងការគាំទ្រ និងសហការសាងសង់មជ្ឈមណ្ឌលនេះ ដើម្បីបង្ហាញពីចំណងសាមគ្គីភាព និងមិត្តភាពយូរអង្វែងរវាងប្រទេសទាំងពីរ។
រដ្ឋបាលខេត្តស្វាយរៀង បានត្រៀមលក្ខណៈរួចរាល់ក្នុងការសម្របសម្រួលលើគ្រប់ទិដ្ឋភាព រួមទាំងការអនុញ្ញាតច្បាប់សំណង់ ការដោះមីន និងសម្អាតដី ដើម្បីបង្កលក្ខណៈងាយស្រួលដល់ភាគីវៀតណាមក្នុងការចាប់ផ្តើមសាងសង់។ តាមការបញ្ជាក់ពីមន្ទីររៀបចំដែនដី នគរូបនីយកម្ម និងសំណាង់ខេត្ត ទីតាំងគម្រោងនេះជាដីរបស់រដ្ឋ និងមិនមានបញ្ហាវិវាទទេ។
កិច្ចប្រជុំបានបញ្ចប់ដោយបរិយាកាសស្និទ្ធស្នាល និងការប្តេជ្ញាចិត្តខ្ពស់ពីភាគីទាំងពីរក្នុងការបន្តសហការគ្នាយ៉ាងជិតស្និទ្ធ ដើម្បីធានាឱ្យគម្រោងនេះសម្រេចបានជោគជ័យតាមផែនការគ្រោងទុក ក្នុងគោលដៅរួមគឺការលុបបំបាត់ និងប្រយុទ្ធប្រឆាំងគ្រឿងញៀនឱ្យមានប្រសិទ្ធភាពសម្រាប់សង្គមជាតិទាំងពីរ៕
